The Definitive Guide to Living in the Capital , Cairo , Egypt

لو بتحبوا التصوير وصناعة الذكريات الحلوة، فالقاهرة فيها أماكن كتير تقدروا تلتقطوا فيها صور مميزة من غير ما تدفعوا تذكرة دخول. ومن بين أجمل الأماكن دي، الكباري التاريخية اللي بتجمع بين جمال النيل، وروعة العمارة، وحكايات من تاريخ المدينة. وفي السنوات الأخيرة بقى فيه مصورين شباب موهوبين بيقفوا على بعض الكباري بكاميرات احترافية، وبيقدموا جلسات تصوير سريعة بأسعار رمزية، وبيطلعوا صور تستحق الاحتفاظ بيها.

في السطور الجاية هنرشح لكم 5 كباري تاريخية في القاهرة تستحق الزيارة والتصوير.

قصر النيل.. أشهر خلفية تصوير في قلب القاهرة

صعب نتكلم عن التصوير في القاهرة من غير ما نبدأ بكوبري قصر النيل. الكوبري الشهير اللي بيعتبر واحد من أهم معالم العاصمة، وكان أول كوبري أُنشئ لعبور نهر النيل في مصر سنة 1871 خلال عهد الخديو إسماعيل.

أخذ الكوبري اسمه من قصر النيل، اللي كان موجود في المنطقة قبل سنوات طويلة، قبل ما يُهدم ويُعاد بناء الكوبري بشكل جديد سنة 1933. وعلى جانبيه يقف أسدا قصر النيل الشهيرين، واللي بقوا من أشهر رموز القاهرة وأكتر الخلفيات اللي بيحب الناس تتصور معاها.

إمبابة.. كوبري حديدي بيحكي تاريخ السكك الحديدية

لو بتحبوا الطابع الكلاسيكي والصور المختلفة، فكوبري إمبابة من الأماكن اللي تستحق الزيارة. الكوبري الحديدي التاريخي اتبنى سنة 1892، وارتبط لسنوات طويلة بحركة قطارات الصعيد، علشان كده ناس كتير بتسميه “كوبري قطر الصعيد”.

الكوبري بيربط بين القاهرة والجيزة، وبيتميز بتصميمه المعدني الفريد اللي بيدي الصور طابع مختلف، خاصة وقت الغروب أو أثناء مرور القطارات.

المانسترلي.. كوبري خشبي بطابع فريد

من أجمل الأماكن اللي ممكن تلتقطوا فيها صور مميزة كوبري المانسترلي، اللي بيربط جزيرة الروضة بمنطقة مصر القديمة. الكوبري الخشبي اتطور خلال السنوات الأخيرة وبقى واحدًا من أجمل أماكن التنزه والتصوير في القاهرة.

التفاصيل الخشبية والزخارف المميزة والقبة الموجودة أعلى الممر بتدي المكان طابع مميز، وبتخلي الصور عليه كأنها ملتقطة في موقع سياحي خارج القاهرة.

عباس.. إطلالة ساحرة على النيل

كوبري عباس واحد من أشهر كباري القاهرة وأكثرها حضورًا في الذاكرة الشعبية. اتبنى سنة 1908 وسُمي على اسم الخديو عباس حلمي الثاني، وهو بيربط بين جزيرة منيل الروضة والجيزة.

المشهد من فوق الكوبري، خصوصًا وقت الغروب، من أجمل المشاهد اللي ممكن تشوفوها على النيل. وارتبط اسم الكوبري بأعمال فنية وأغاني شعبية كتير، وده زاد من شهرته بين أجيال مختلفة من المصريين.

الجلاء (بديعة سابقًا).. كوبري بيتحرك لعبور السفن

يمكن مش كتير منكم يعرفوا إن كوبري الجلاء كان اسمه في فترة من الفترات “كوبري بديعة”، وقبلها حمل اسم “كوبري الإنجليز” وقت افتتاحه سنة 1914.

الطريف في الكوبري إنه صُمم بطريقة تسمح بفتحه لعبور السفن الكبيرة، وهي ميزة هندسية نادرة وقت إنشائه. ومع تفاصيله المعمارية المميزة وإطلالته على النيل، بيعتبر من الأماكن المناسبة جدًا لعشاق التصوير واكتشاف القاهرة من زاوية مختلفة.