حمام السلطان.. تجربة من الدلع والاسترخاء في أجواء عثمانية بالمعادي
أماكن في القاهرة المعادي تجارب القاهرة حمام السلطان حمام مغربي دجلة المعادي رفاهية سبا سيدات عناية بالجسم
Cairo 360
رنا شرف
لو بتحبي تجربي أماكن مختلفة فيها شوية دلع وراحة واهتمام بالجسم، يبقى ممكن حمام السلطان في دجلة المعادي يكون تجربة تستاهل. المكان بيقدم أجواء عثمانية مميزة، مع الحمام المغربي والمسكات والسونا والجاكوزي، وكل ده في تجربة هدفها الأساسي إنك تخرجي حاسة إنك خدتي وقت لنفسك بعيد عن ضغط اليوم.
البنات بطبعها بتحب الدلع، ومع الاهتمام المتزايد بالبشرة والجسم والروتين اليومي للعناية بالنفس، بقى تخصيص وقت لنفسنا مش رفاهية زي ما كان البعض بيشوف زمان، لكنه نوع من الراحة والاهتمام اللي بنحتاجه وسط ضغط الحياة.
زمان يمكن ماكنش فيه نفس الاهتمام بالروتينات الخاصة بالبشرة والجسم، لكن دلوقتي بقى عندنا اختيارات كتير، من جلسات العناية بالبشرة لحد السبا والحمامات المغربية والمسكات المختلفة.
وعلشان كده، قررنا نجرب مكان يقدم تجربة كاملة فيها شوية رفاهية ودلع، ونشوف هل هنخرج فعلًا مبسوطين وفيه فرق نحسه بعد التجربة ولا الموضوع مجرد ديكور وكلام حلو.
المكان اللي رحناه هو حمام السلطان في دجلة المعادي.
أول حاجة.. نظام المكان
حمام السلطان مخصص للسيدات والرجال، لكن مش بشكل مختلط طبعا، وكل فئة ليها مواعيدها الخاصة.
السيدات بيقدروا يزوروا المكان من 10 الصبح لحد 4 العصر، بينما مواعيد الرجال من 7 مساءً لحد 1:30 بعد منتصف الليل.
وبالنسبة للسيدات، المكان بيقدم الحمام المغربي، بينما للرجال فيه الحمام التركي.
إحنا اخترنا نجرب الحمام المغربي بصابون الغار، ودي كانت بداية التجربة.
أول حاجة لفتت نظرنا إن المكان نضيف ومرتب، والأجواء نفسها معمولة علشان تخليك تفصلي شوية عن الدنيا بره. وقبل الحمام، بيتم توفير الليفة المغربية، وسعرها 150 جنيه.
الحمام المغربي.. التجربة الأساسية
سعر الحمام المغربي كان 850 جنيه، وده بيشمل تجربة الحمام بالإضافة إلى السونا والجاكوزي.
ومن الحاجات اللطيفة جدًا في المكان إن فيه مغربيات بيقدموا الحمام المغربي، ودي بالنسبة لنا كانت نقطة مهمة، لأنهم أكيد أدرى بطريقة الحمام على أصوله وتفاصيله.
التجربة نفسها كانت مريحة، خصوصًا لو أنتِ أصلًا محتاجة تفصلي شوية وتخرجي من ضغط الشغل والبيت والمسؤوليات.
وبعد الحمام، فيه فرصة تستمتعي بالسونا والجاكوزي، ودي بصراحة كانت من أكتر الحاجات اللي كملت إحساس الدلع والاسترخاء.
وبعد الحمام.. جربنا المسكات
طبعًا ماخلصناش عند الحمام المغربي.
المكان عنده كمان أكتر من اختيار للمسكات، ومن بينها ماسك الجولد وماسك السلطانة.
إحنا اخترنا نجرب ماسك السلطانة، وده عبارة عن مرحلتين: تقشير وماسك باستخدام مواد طبيعية.
سعر الماسك 350 جنيه.
والتجربة كانت لطيفة جدًا، خصوصًا إنك بعد الحمام بتكوني أصلًا في مود الاسترخاء، فإضافة ماسك للجسم بتحسسك إنك بتكملي جلسة عناية كاملة مش مجرد حمام وخلاص.
طيب والباديكير؟
بما إننا قررنا نجرب أكبر قدر ممكن من الخدمات، قولنا نجرب الباديكير كمان.
سعره 300 جنيه، لكن بصراحة دي مش أكتر تجربة حبيتها في المكان، وعلشان كده لو هتسألونا ننصحكم بإيه، فإحنا هنقولكم: ركزوا على الحمام والمسكات، لأنهم في رأيي كانوا أحلى وأميز جزء في التجربة.
الأجواء.. حكاية تانية
من أكتر الحاجات اللي عجبتنا في حمام السلطان الديكورات والأجواء.
أول ما تدخلي المكان هتحسي إنك دخلتي مشهد من مسلسل **حريم السلطان**. فيه روح عثمانية واضحة في الديكور والتفاصيل، وده بيخلي التجربة مختلفة عن أماكن السبا التقليدية اللي ممكن تكون كلها شبه بعض.
فلو بتحبي الأجواء الشرقية والديكورات اللي فيها لمسة عثمانية، غالبًا المكان هيعجبك.
في النهاية، حمام السلطان تجربة لطيفة لو نفسك تاخدي وقت لنفسك، وتجمعي بين الحمام المغربي والاسترخاء والعناية بالجسم في مكان واحد.
وأكتر حاجة عجبتنا إن التجربة مش بس مرتبطة بالخدمة نفسها، لكن بالأجواء كمان؛ من الديكور لحد السونا والجاكوزي والمسكات.
ولو هنكرر التجربة مرة تانية، فغالبًا هنختار الحمام المغربي مع ماسك السلطانة، وهنسيب الباديكير لمرة تانية.
مقترح
معالم وسياحة
علّم طفلك الهيروغليفية في متحف إيمحتب.. يوم صيفي مختلف بين آثار سقارة
أطفال أنشطة صيفية +10
معالم وسياحة
