The Definitive Guide to Living in the Capital , Cairo , Egypt

في يوم طلب الموضوع معانا نأكل
وافلز، كان نفسنا فيه قوي، دخلنا على الإنترنت ندور وإذا بنا لقينا جروب على
الفيسبوك لمحل «وافل هاوس – Waffle
House» في أرض الجولف في شارع متفرع من نبيل الوقاد، دخلنا على جزء
الصور اللي كان له أكبر عامل على أنه يجر رجلنا نروح نجربه.

كل الصور لناس راحوا أكلوا و”ملغوسين”
شوكولاته من كل حتة، المنظر مغري واللي مغري بشكل أكبر أنواع الوافلز اللي بـ
يعملوها، وده بالفعل اللي حصل لنا ولقيناه لما رحنا هناك.

جنب «جولف كافيه – Golf Cafe» وأمام محل وحدات الإضاءة «لايتولوجي
– Lightology» محل صغير ألوانه أسود وأحمر مكتوب
اسمه بحروف مجسمة كبيرة بيضاء والناس واقفة بره وجوه، أول ما تدخل هـ تقابلك الأول
رائحة عجينة الوافل القوية قبل ما تقابل مصطفى اللي هـ يسألك أنت وأصحابك هـ
تطلبوا كام واحدة لأنه بـ يجهز العجينة بتاعتك فى ماكينة مخصوص عنده عقبال ما
تختار هـ تأخذ إيه علشان يخدمك بسرعة لأن الناس بـ تدخل بالمجموعات كل شوية.

المنيو على شكل عربية معلقة في
استاندات خلفك، كانت غريبة جدًا وما فهمناش ليه، عندك 6 أنواع وافلز تختار منها: بصوص
الشوكولاتة والفواكة (20 جنيه)، بصوص الشوكولاتة والأيس كريم (نفس السعر)، أما
الوافل أكستريم ده بـ يجمع بين الأيس كريم والفواكة والصوص سوا (30 جنيه)، وممكن
تأخذ وافل بيزيك بصوص الشوكولاته فقط (15 جنيه)، أو بولة آيس كريم سادة “موفنبيك”
(10 جنيه)، إلى جانب المشروبات اللي بـ يقدموها (5 جنيه) أو كوباية الفواكة بصوص
الشوكولاتة (10 جنيه).

على الناحية الشمال وأنت واقف
منتظر طلبك فيه ثلاجة فيها أطباق مكسرات وحبيبات كورن فليكس، وفاكهة زي الأناناس،
الكيوي، والكريز، والمانجا والفراولة كل ده مقطع حتت صغيرة، والفاكهة الوحيدة اللي
مش مقطعة هي الموز علشان ما يسودش لأن تأكد أنك هـ تأخذ على الوافلز بتاعتك كل
حاجة فريش بمعنى الكلمة، وخلفه أرفف عليها صوصات الشوكولاتة وعلب كورن فليكس، وعلى
الناحية الشمال ثلاجة آيس كريم موفنبيك وعلى الأرفف فوق جبل كوبايات كرتون.

مكان القعود مش كبير وده بـ يفسر
ليه الناس بـ تأكل أمام المحل بره، لكن الكل مستمتع، عبارة عن تقريبًا 3 ترابيزات
عالية مدورة، أهم حاجة تعملها قبل ما تقعد تأكل تحط مناديل حواليك في كل حتة من
علبة المناديل المحطوطة فوق ثلاجة الآيس كريم، مصطفى بـ يحط المكونات في الوافل
ويختمها بالصوص ويثني الوافل نصفين أكنها زي الساندويتش، وبالتالي كل كمية
المكونات دي بـ “تبُظ” من كل حتة وما تحاولش تعمل فيها شيك في الحالة دي
لأنك هـ تتبهدل هـ تتبهدل، لكن إحنا كنا مستمتعين جدًا بالإحساس ده، اختارنا 3
أنواع، بصفة عامة بدون تحديد عجينة الوافل برائحتها بالمكونات كلها اختراع.. وهمية..
منتهى الطعامة اللي في الدنيا، بقالنا كثير ما أكلناش حاجة حلوة كده.

في آخر المحل في الوش الكاشير،
جنبه فيه عمود رواد المحل كاتبين عليه تعليقات وكلمات تشجيعية لهم، وإحنا بـ نحاسب
عرفنا سبب أن المنيو شكلها عامل زي العربية، ده لأن وافل هاوس هـ يعملوا قريب بعد
أسبوعين أو ثلاثة 3 عربيات ديلفري وبـ تصنع وافل على الطريق في مناطق المعادي
وروكسي ومدينة نصر بحد أدنى طلبية 5 وافل للمكان، ده غير أنهم بالفعل عندهم عربية
راحت مناسبات وحفلات كثير منها في الجامعة الألمانية ومدينة الرحاب، ودي فكرة
هائلة جدًا وتأكد جملتهم “Made
in Car delivery”.

أهم حاجة وأنت ماشي أو وأنت هناك
يكون معاك زجاجة مياة (بـ تباع هناك) علشان هـ تعطش بعد الأكلة الجامدة دي.