The Definitive Guide to Living in the Capital , Cairo , Egypt

برج القاهرة مش مجرد مبنى مرتفع عن الأرض، واصل إلى 187 متر، البرج حدوتة مصرية كبيرة، وعلامة بيقولوا إنه اتسمى في وقت من الأوقات (شوكة عبد الناصر)، ومن هنا بتبتدي الحكاية.

بيقول بعض المؤرخين إن حدوتة البرج، بدأت لما المخابرات الأمريكية أعطت الرئيس الراحل جمال عبد الناصر 6 مليون جنيه مصري، علشان يغير موقفه من القضايا العربية، خاصة قضية تحرير الجزائر في الوقت ده، وهنا قرر جمال عبد الناصر إنه يبني برج على شكل زهرة اللوتس، بالمبلغ كله، علشان يكون رمز إنه عمره ما هيغير مبادئه ناحية القضية العربية، واعتبره البعض أكبر (لا) اعتراضية اتعملت في التاريخ.

ومن ناحية تانية بيقول بعض المؤرخين إن برج القاهرة كان معمول كبرج لتطوير الشبكة اللاسلكية في مصر للاتصالات العالمية، ولما وصلت نقود المخابرات الأمريكية، استخدمها عبد الناصر في بناء البرج على الشكل ده.

والبرج واحد من أبرز معالم القاهرة، موجود في منطقة الجزيرة بالزمالك، ويعتبر تحفة معمارية، بناها المصريين على شكل مرتبط بحضارتهم القديمة، على شكل زهرة اللوتس، اللي قدسها واهتم بيها قدماء المصريين.

وقاعدة البرج معمولة من أحجار الجرانيت الأسواني، وهي نفسها الأحجار اللي استخدمها المصريون القدماء في بناء معابدهم ومقابرهم.

المهندس اللي أشرف على بناء البرج لبناني الجنسية، وهو المهندس نعوم شبيب، المشهور بتصميماته لكتير من المبانى العالمية والمصرية، أشهرها برج القاهرة  والكاتدرائية المرقسية.

أول ما تقف تحت برج القاهرة بتحس إنك واقف قدام أثر قديم، أو مسلة عملاقة عملها قدماء المصريين، طريقة بنى البرج، وتقسيمه، وطوله الضخم، بيخليك مش عايز تسيب المكان، ولما بتطلع للدور الأخير وتقف، بتشوف بانوراما كاملة للقاهرة، الأهرامات، وماسبيرو، والمقطم، وأبو الهول، والنيل، وقلعة صلاح الدين، والأزهر، يعني بتزور مصر كلها، وأنت واقف، ولو عايز كمان تستخدم التيلسكوب، هتنبسط قوي، وأنت بتتفرج على معالم القاهرة عن قرب، وعلى فكرة التيلسكوب ليه تذكرة لوحده ومش غالية خالص ب 5 ج.

أما عن أسعار الدخول، فأسعار دخول برج القاهرة للمصريين هى 25 جنيه للفرد، وأسعار تذكرة برج القاهرة للأجانب هي 150 جنيه للفرد، وسعر التلسكوب فى برج القاهرة 5 جنيه، روحوا وانبسطوا هناك.

معلومات أكتر:

دخول الأطفال أقل من 6 سنوات مجانًا – أكثر من 6 سنوات : تذكرة كاملة

مواعيد العمل يوميًا من الساعة 9 صباحًا حتى الساعة 11 مساءً.

وهنا هتلاقوا صفحة البرج على الإنترنت