The Definitive Guide to Living in the Capital , Cairo , Egypt

الموضوع ما بقاش مجرد هواية أو وسيلة انتقال استثنائية أو ترفيهية، فكرة السكوترز Scooters بقيت مسيطرة على دماغ ناس كثير، اللي بـ يفكروا فيها كوسيلة انتقال عملية مع زحمة المرور وأزمات الوقود، ده غير أن لها ستايل مميز في الشكل غير الموتوسيكلات العادية أو الموتوسيكلات الرياضية فائقة السرعة، هي حاجة كده شبه الـ Vespa الإيطالي القديمة لكن بتصميمات عصرية وشبابية أكثر، مريحة في الاستخدام واقتصادية في الوجود وأسعارها معقولة جدًا، لكن بما أننا مش بصدد شرح مميزات السكوتر في المقال ده فإحنا هـ ندخل في الموضوع ونحكي لكم على تجربتنا في «موتو لايف – Motolife» المتخصص في السكوترز بموديلاته المختلفة، وبـ يبيع كل الإكسسوارات والكماليات الخاصة بعالم الموتوسيكلات، وده كان الفرع الأحدث لسلسلة المحلات المشهورة في مدينة الرحاب والشروق وفي القاهرة الجديدة، الفرع الجديد في في شارع حسن أفلاطون اللي أمام مبنى الرقابة الإدارية مباشرة في شارع النزهة في مصر الجديدة.

معرض كبير نسبيًا، فيه مساحة داخلية كافية لعرض المركبات، مش بـ يستغل الرصيف اللي أمامه للعرض زي ما كثير من محلات الموتوسيكلات بـ تعمل، دخلنا المعرض وبدأنا نتفرج على الموديلات المختلفة ولاحظنا أنه بـ يشتغل في 3 ماركات بس في السكوترز وهم الـ sym والـ Kymco والـ Daelim الكوري.

الأسعار هنا أغلى شوية من باقي المعارض اللي بـ تبيع الموديلات نفسها، وتفسير موظف البيع لده أنهم شركة موثقة وبـ تقدم ضمان حقيقي وعندها مراكز صيانة في كل الفروع اللي ذكرناها، لكن أكيد ده مش مبرر كافي بالنسبة لما يبقى سكوتر في كل مكان بـ 9000 جنيه مثلًا ونلاقيه هنا بـ 9600 جنيه، لكن المهم هنا أن الخدمة جيدة والموظف متعاون جدًا وشرح لنا كل التفاصيل لأننا مش خبراء في عالم الدرجات البخارية.

موديلات الـ sym كلها موجودة بدءًا من الـ Fiddle التقليدي بسعر 7000 جنيه والـ Jet 4  بـ 9200 جنيه والـ Symphony بـ 9600 جنيه، كل الموديلات دي بسعة محرك 150 cc وده اللي بـ ينصح به لأي حد بـ يركب دراجة بخارية لأول مرة في حياته، الموديلات دي فيه منها الألوان الأسود والأبيض والأحمر والأزرق، لكن اللي كان في العرض كان الأبيض فقط، ولو عاوز تشوف لون مش موجود يبقى لازم تكون هـ تشتريه وتدفع عربون 200 جنيه علشان يجيبوه من المخزن، طيب أومال فائدة المعرض إيه!

الموديلات الـ 300 cc شكلها أفخم وأشيك كثير، حجمها أكبر وفيه منها الألوان الغامقة المطفية أو الـ Mutt وأسعارها كالتالي: الـ sym 300 بـ 28,000 جنيه والـ Kymco الـ Joyride والـ Roar بأسعار من  32,000 جنيه فما فوق، والـ Daelim المصنوع بالكامل في كوريا ومستورد من هناك وهو من نقاط القوة المميزة للمحل وفيه منه وموديلات الـ K-XCT والـ GTS 300i وأسعاره بـ تبدأ من 25,000  جنيه. الموديلات الـ 200 cc ناقصة هنا في المحل، وناقصة عمومًا في مصر، لكن هم قالوا لنا أن فيه شحنة جاية شهر أبريل اللي جاي. وفيه موديلات محدودة من البيتش باجي والموتوسيكل العادي لكن بما أنها مش التخصص هنا فما سألناش عنها بالتفصيل.

خوزات ماركة Zeus بكل الأشكال والأحجام والألوان بأسعار من 350 لحد 800 جنيه اللي بـ تغطي الرأس تمامًا، وفيه سترات واقية وقفازات وأقفال للأمان ونظارات وغيرها من الكماليات معظمها صناعة صينية لكن شكلها ظريف وأسعارها كويسة.

لو عاوز صالة عرض تشوف فيها أنواع وأحجام السكوترات المختلفة وتعمل مقارنة بينها وبين بعضها علشان تختار صح، بـ نرشح لك «موتو لايف» بكل فروعه، وحاول تفاصل في السعر شوية، بس الأكيد أنك هـ تلاقي خدمة مميزة أثناء جولتك داخل أي من المعارض الخاصة به.