The Definitive Guide to Living in the Capital , Cairo , Egypt

رمضان قرب يخلص ومع ذلك الواحد فينا زحمة مشغولياته مابقتش تديله فرصة يحس به زي زمان، علشان تقريبًا مش بنحس باختلاف كبير، نفس الحياة الرتيبة ودوامة الالتزامات بنفضل دايرين فيها فمش بنلحق نحس أوي بالفرق بين دخلة رمضان وبين قبله.. لكن في كل الأحوال بتفضل فرصة أننا نطلع برة الجوة الرتيب ده موجودة، تعالوا بينا كده نجرب نعمل كام حاجة مختلفة تخلينا نفصل شوية ونخلي دخلة الشهر ماتعديش علينا زيها زي غيرها، ونعيش تجارب جديدة وإحساس مختلف.. تفتكروا ممكن نعمل إيه مثلًا؟

1- نسافر!
عادةً في رمضان الناس كلها بتحب قعدة البيت والسكون وآخرها في الحركة بيكون للعزومات وبس، وده بيخلي كل الرحلات متاحة ورايقة وأسعارها مناسبة.. ولو عايز بقى كمان تربط الرحلة بجو الصفاء الروحي الرمضاني خليها رحلة من الرحلات التأملية اللي بتخرج فيها منك للطبيعة.. زي الرحلات الفلكية اللي بترصد السما والنجوم واللي بتنظمها جهات زي الجمعية المصرية لعلوم الفلك أو Astrotrips أو غيرهم، أو الرحلات اللي بتزور المحميات الطبيعية، أو رحلات التخييم الصحراوي، أو أي حاجة كده.

2- ولا نجرب مثلًا نرجع المسحراتية تاني في شوارعنا.. بنفسنا!
يعني دي حاجة مش بس هتعيشك أنت في جو رمضاني جميل.. لأ كمان هتخليك تعيش غيرك معاك الجو! خدلك طبلة صغيرة وأنزل الشارع بتاعك وهاتك يا تخبيط ومنادية على الجيران علشان تصحيهم وقت السحور، وابقى احكيلنا عن شعورك وعن ردود فعل حبايبك وجيرانك معاك!

3- ولا تجرب مثلًا تفطر على مائدة رحمن!
الموضوع ده فايدته أنه هيعيشك في دور الأَرْزُقِي اللي بينزل وسايبها على الله، مَطْرَح ما الأذان بيأذن عليه يشوفله أقرب مائدة إفطار ويقعد عليها يقاسم ناس مايعرفهمش اللقمة! حالة جميلة جدًا من الألفة بتتخلق في لحظتها مع ناس عمرك ماقابلتهم وجايز مش هتقابلهم تاني في حياتك! من أول الناس اللي بتخدمك بطيبة نفس وخاطر.. لحد اللي قاعد جنبك بيقاسمك اللقمة بمنتهى الود واللطف ولا كأنكم عشرة عمر.. شعور يستحق أنك تعيشه!
 

4- طب وبعد الفطار؟
بعد الفطار الجوامع بتبقى مليانة بالناس اللي بتصلي التراويح وده عادي، لكن اللي مش عادي أن التجربة دي نفسها ممكن تبقى تجربة ممتعة لأبعد الحدود لو جربت تعيشها في المكان الصح..
الجوامع الأثرية الكبيرة في رمضان بتبقى غير.. روحها وسعتها الكبيرة اللي بتستوعب عدد كبير من الناس والأجواء اللطيفة اللي بتبقى فيها، زي الناس اللي تعدي عليك وتوزع عليك حاجة تاكلها أو تشربها.. حاجات هتحسسك ببهجة غير عادية، وهتاخد روحك في الحتة اللي نفسك تزورها!

5- جرّي رجلك!
رمضان زي ما بيقلب مع ناس أكل وشرب وزروطة، بيقلب مع ناس تانية اهتمام بصحتهم وتركيز في تظبيط عاداتهم وكده.. ومن ضمن المظاهر الجماعية اللطيفة جدًا لحاجة زي كده هي الدورات الرمضانية اللي بتبقى مالية كل أندية ومراكز شباب مصر، وبتلاقي جيوش من كل الأعمار، الشباب وكبار السن حتى مهتمين جدًا بالمشاركة الفاعلة والدخول في أجواء المنافسة وعيش روح الرياضة لآخر نفس! جرب أنت كمان تدوس في حاجة زي كده.. هتنبسط!

وفي الختام بقى ممكن نشاورلكم على كام موضوع كنا كتبناهم لأفكار في مساحات مختلفة، ممكن تعيش بيها الجو الرمضاني بصورة حلوة وممتعة ومفيدة.. زي موضوعنا عن أجمل أغاني رمضان بتاعت زمان، وموضوعنا عن أفكار لتزيين بيتك بزينة رمضان، واستنوا بقية مواضيعنا اللي هيتتابع نزولها خلال الشهر الكريم بإذن الله.