The Definitive Guide to Living in the Capital , Cairo , Egypt

كنا متحمسين جدًا أول ما فتح
مطعم أسلوبه جديد بـ يعتمد على أسلوب أدبي مختلف على ضفاف نهر النيل الشهر إللي
فات في الزمالك. وأول ما عرفنا أن «ليفت بانك- Left Bank » بـ يستضيف أحداث وبـ يعمل نشاطات كثيرة، قررنا أننا
ننضم لواحدة من الأحداث دي. وطبعًا لأن صوتنا مش حلو قوي فـ قلنا ما نجربش يوم
الغناء أو “المايك المفتوح” ونجرب حاجة ثانية. فكرنا في أننا نروح يوم
درس تصميم الزهور لكن طبعًا قدرتنا الفنية القليلة منعتنا من أننا نروح، لكن تحمسنا
جدًا لدروس الطبخ الأسبوعية، وبطبيعة الحال أي حاجة متعلقة بالأكل بـ تخلي كايرو360
متحمسة.

لكن برضه لازم نقول لكم أن الطبخ مش من الحاجات اللي بـ نتقنها قوي، رغم أن إحنا
ذواقين أكل لكن ده بـ يختلف تمامًا عن خلط مقادير مع بعض علشان نقدم أكلة حلوة
ومتميزة. علشان كدة إحنا كنا قلقانين جدًا أننا نفشل في درس الطبخ مع الشيف “بينويت
لابوريكس”. درس الطبخ بـ يبقى كل يوم ثلاثاء من الساعة 10 صباحًا إلى الساعة
12 ظهرًا، هو طبعًا بدري. بس في الآخر أنت بـ تحضر لنفسك فطار حلو قوي، وقت
زيارتنا كان في الدرس مجموعة من السيدات المتحمسين جدًا وكان بـ يشرف عليهم الشيف
بينويت ومساعديه.

الدرس بـ يبقى على الترابيزة الرئيسية في المطعم وبـ
تبقى جاهزة قبل ما توصل. وقت ما رحنا درس الطبخ كان المنيو فيه لفائف أو رول تونة بالسلامون
وآيس كابتشينو، ما تتوقعش أنك تتعلم أربع وجبات كاملين في الدرس، شيف بينويت بـ
يختار أطباق من التحلية والمقبلات بسيطة لكن في نفس الوقت رائعة. بجانب أنه بـ
يعلمك إزاي تطبخ الطبق بنفسه هو كمان بـ يعلمك إزاي تقدم الطبق بشكل حلو للضيوف، وبـ
يمشي معاك في جميع الخطوات لتحضير الأكل وكمان بـ يقول لك منين تجيب مكونات الأكل
ومعظمها بـ يبقى موجود في سوبر ماركت عادي وفيه أنواع ثانية مش بـ تبقى موجودة غير
في سوبر ماركت كبير أو متخصص. رول التونة بالسلامون كان تحضيره سهل جدًا وأحلى جزء
في التحضير كان وقت التهامنا للأكل اللي حضرناه. حبينا قوي رول التونة بالسلامون وكنا
فخورين جدًا بأنفسنا علشان إحنا اللي حضرناه وكان طعمه طازج ولذيذ، طريقة تحضيره
سهلة جدًا وسهل أنك تعمله في البيت لوحدك.

المرحلة الثانية كان تحضير الآيس كابتشينو، واللي كان
تحضيرها صعب. وإحنا في طريقنا للتحضير تعلمنا وعرفنا نصائح كثيرة جدًا زي مثلاً أنك
دائمًا تحط فنجان إسبريسو على صوص الشوكولاتة اللي أنت عامله في البيت لأن ده بـ يعطي
للصوص طعم قوى، وممكن كمان تجمد القهوة من بالليل وبعد كده تقشطها وتحطها على وش
الحلويات بتاعتك أو على القهوة. وأخيرًا وليس آخرًا تعلمنا إزاي ممكن نلف سكوب الآيس
ونضعه على وش أي حلويات.

زي ما قلنا في الأول، دروس تعليم الطبخ بـ تبقى يوم
الثلاثاء صباحًا من 10 إلى 12 ظهرًا ومجانًا، لكن لازم تسجل قبلها على info@leftbankonline.com. شيف بينويت شخص متعاون ولطيف جدًا وهـ يساعدك في جميع مراحل
الطبخ. وسمعنا أنه بـ يعلم الناس إزاي يعملوا “ترافل الشوكولاتة” بتاعته
اللذيذة. أما تروح الدرس ما تستغربش لو لقيت فرد من فريق عمل كايرو 360 بـ يحاول
يشتغل بقلب جامد مع الناس هناك.