The Definitive Guide to Living in the Capital , Cairo , Egypt

كل المتابعين والمعجبين بـالمذيع طونى
خليفة كانوا منتظرين رمضان علشان يشوفوا طونى هـ يقدم إيه السنة دى، فـ بعد أن قدم
لنا برنامجى: “لمن يجرؤ” و”لماذا” فى العامين الماضيين.. جاءت
الثورة علشان تقدم لطونى فكرة برنامجه الجديد “الشعب يريد”.

برنامج الشعب يريد واللى بـ يذاع
حصريًا على قناة “القاهرة والناس” يوميًا طوال شهر رمضان فى السابعة
والنصف تقريبًا مكون من ثلاثة أجزاء وهي على الترتيب:

الشعب يريد أن يعرف:

وفى الفقرة دى بـ يقوم طونى بسؤال
الضيف حول بعض القضايا الشائكة بأسلوبه “الحراق” اللى بـ يجذب المعلنين،
واللى بـ يكون غالبًا مستفز بالنسبة لضيوفه، المدهش فى الفقرة أن كرسي المذيع بـ يكون
أعلى شوية من كرسي الضيف فى وضع غريب وجديد، وبالتالي بـ يضطر الضيف أنه يبص لفوق
شوية!

الشعب يريد أن تسقط القناع:

فى الفقرة دى بـ يختار الضيف بين
صورتين لشخصيتين بـ يظهروا أمامه علشان يسقط القناع عن أحدهم، وطبعًا بـ يكون فيه
ارتباط بين الضيف وبين الصورتين بشكل أو بآخر، ولكن في بعض الأحيان وبخبث مقدم
البرنامج لو الضيف اختار شخص منهم علشان يتكلم عنه بـ يرجع طونى للشخص الآخر ويخليه
يتكلم عنه هو كمان.

الشعب يريد أن تعترف:

وهو الجزء الأخير فى البرنامج، و
بـ يقعد فيه الضيف شبه منعزل عن المذيع الجرىء في غرفة زجاجية مغلقة واللى بـ يسأله
أسئلة أكثر جرأه طوني الوحيد اللى بـ يسمعها وعارفها، لكن الإجابات طبعًا كلنا بـ نسمعها..
الجزء ده واخد شكل اعترافات للضيوف وهى حركة غريبة أننا ما نسمعش الأسئلة لكنها فى
حد ذاتها ذكية من “طونى” واللى بـ تخلى الضيوف تجاوب بطريقة عفوية بـ تخلينا
نعرف السؤال.

البعض بـ يأخذ على مقدم البرنامج أنه
بـ يقاطع الضيوف كثير، ولكن ده من وجهة نظرنا بـ يكون فى معظم الأحيان فى محله.. وبـ
يقدر بكده أنه يأخذ الضيف للجزء اللى ما كانش حابب يتكلم فيه، زى الحلقة اللى بكى
فيها طلعت زكريا على مبارك واللى ما كانش يعرف وهو بـ يصورها أنها هـ تذاع فى نفس
يوم محاكمته ومثوله فى قفص الاتهام.

أشهر ضيوف البرنامج السنة دى: يسرا،
عمرو واكد، خالد يوسف، ممدوح حمزة، يحيى الجمل، جيهان فاضل، إيناس الدغيدى، مفيد
فوزى، تامر أمين، مرتضى منصور، يسرى فودة، الراقصة ديـنا، أحمد فؤاد نجم، أيمن نور،
مصطفى الفقى، رغدة، حمدين صباحى، بثينة كامل، طلعت السادات.