The Definitive Guide to Living in the Capital , Cairo , Egypt

خلال شهر رمضان، بتزيد الزيارات للمناطق الإسلامية في القاهرة، وخصوصًا المساجد ومنطقة القاهرة الفاطمية اللي بتضم أجمل المعالم الإسلامية. ومن أهم الأماكن اللي لازم تزورها في رمضان هو متحف الفن الإسلامي، اللي بيضم مجموعة ضخمة من المقتنيات الإسلامية من عصور وبلاد مختلفة. علشان كده، هنقولك كل التفاصيل اللي محتاج تعرفها عن زيارة المتحف في أجواء رمضان.

متحف الفن الإسلامي.. تاريخ غني وكنوز لا تقدر بثمن

فكرة المتحف بدأت سنة 1880، لما قرروا تجميع وعرض التحف الإسلامية، لحد ما تم افتتاحه رسميًا سنة 1903 في عهد الخديوي عباس حلمي الثاني. المتحف بيضم واحدة من أكبر وأروع مجموعات الآثار الإسلامية في العالم، وبتغطّي أكتر من 1400 سنة من التاريخ الإسلامي. تصميم واجهة المتحف مستوحى من العمارة المملوكية، وده بيخليه تحفة فنية في حد ذاته.

المتحف اتقفل مرتين، مرة للتجديد لمدة 8 سنين، وتم افتتاحه تاني سنة 2010، وبعد كده اتعرض لأضرار بسبب تفجير مديرية أمن القاهرة واتقفل تاني 3 سنين، لحد ما تم افتتاحه من جديد سنة 2017.

إيه اللي هتشوفه جوه المتحف؟
المتحف مليان كنوز إسلامية نادرة، وأول ما تدخل هتلاقي البهو الرئيسي، وعلى يمينه القاعة الأولى اللي فيها مقتنيات من العصر العباسي والأموي. أما القاعات من 2 لـ 13، فدي بتضم آثار من العصور الفاطمي – الأيوبي – المملوكي – العثماني – وعصر محمد علي.

الجناح الأيسر من المتحف فيه:

قاعة 14: مقتنيات العملات والأسلحة.
قاعة 15: آثار من شرق العالم الإسلامي.
قاعات 17 و18 و19: كتابات قديمة من عصور مختلفة.
قاعات 20 و21: مقتنيات النسيج والسجاد.
قاعة 22: معروضات من الحياة اليومية في العصور الإسلامية.
قاعة 23: مقتنيات عن المياه والحدائق.
قاعة 24: آثار مرتبطة بالعلوم.
قاعة 25: مقتنيات عن الطب والجراحة.

أهم القطع اللي لازم تشوفها
المتحف فيه مجموعة مقتنيات نادرة، ومنها، درع من الصلب المطعّم بالذهب والفضة، خوذة حربية لحماية الرأس، مبخرة إسلامية قديمة، إبريق الأمير طبطق، باب إسلامي مصفح، أسطرلاب قديم لتحديد القبلة، مشكاوات وزخارف إسلامية فريدة.

مواعيد العمل خلال رمضان:

من 9 الصبح لـ 3 العصر.

أسعار التذاكر:

للمصريين والعرب: 20 جنيه بس.

مجانًا للأطفال أقل من 6 سنين، وكبار السن، وذوي الاحتياجات الخاصة.

العنوان: شارع بورسعيد – ميدان باب الخلق – أمام مديرية أمن القاهرة سابقًا.

تقدروا تعرفوا أكتر عن المتحف من خلال الموقع الإلكتروني من هنا.