The Definitive Guide to Living in the Capital , Cairo , Egypt

زمان جدًا قبل ما تتبني مصر الجديدة قرر البارون إمبان أنه يبني القصر بتاعه في مكان مهجور، وعرض على الحكومة المصرية فكرة أنه يعمل حي فى الصحراء شرق القاهرة واختار له اسم (هليوبوليس) واللي معناها مدينة الشمس واشترى البارون الفدان بجنيه واحد بس، لإن المنطقة ماكنش فيها أي مرافق أومواصلات أوخدمات، وعلشان البارون يقدر يجذب الناس أنها تسكن في الصحراء أو مدينته الجديدة فكر أنه يعمل مترو، وقرر البارون أنه يبني القصر بتاعه، وعمله قصر أسطوري زي قصور الهند حتى كل تصاميه مستوحاة من هناك.

القصر اتصمم بحيث أن الشمس ما تغبش عنه وتدخل كل الغرف، وهو من أفخم القصور الموجودة فى مصر، أما غرفة البارون ففيها لوحة بتجسد إزاي بيتم تحويل عصير العنب لخمور، وبعدين شربه على حسب التقاليد الرومانية، وإيه اللي بتعمله الخمر في دماغ الناس اللي بيشربوها.

واكتمل بناء قصر البارون سنة 1911م، وصممه المعمارى الفرنسى ألكساندر مارسيل، كمان زخرفه جورج لويس كلود، وتخيلوا أنه تم استلام التصميم من معبد أنكور وات فى كمبوديا.

أما الحكاية الأسطورية الحقيقية فهي البارون إمبان، أو إدوارد لويس جوزيف إمبان  اللي اتولد في سبتمبر 1852 وتوفى  22 يوليو 1929، وهو مهندس ومؤسس مشاريع ومقاول بلجيكى غني جدًا، ده غير  أنه عاشق للآثار المصرية. بدأ يشتغل مع أخوه البارون فرانسوا إمبان وعدد تاني من أفراد عيلته وحققوا نجاح كبير وثروات ضخمة من عمل مشاريع مد خطوط السكك الحديدية والترام أو المترو غير الإنشاءات. كمان حصل على لقب بارون سنة 1907 لكنه توفى فى بلجيكا بس اتدفن فى مصر أسفل كنيسة البازليك الموجودة حاليًا فى مصر الجديدة، وتوفى البارون بمرض السرطان، بعد ما عمل  ضاحية مصر الجديدة والقصر اللي كان بيحلم بيه سنة 1911.

أما لو حبينا نوصف القصر فهو واخد مساحة 12.5 ألف متر ومستلهم من معبد أنكور وات فى كمبوديا ومعابد أوريسا الهندوسية، حتى شبابيك القصر الخارجية معمولة كأن تماثيل الفيلة الهندية شايلاها، والعاج منتشر جوه وبره القصر، والشبابيك بتطلع وتنزل مع  تصميم التماثيل الهندية والبوذية، لكن لو دخلنا جوه القصر نفسه هنلاقيه عبارة عن متحف بيضم تحف وتماثيل من الذهب والبلاتين، كمان جواه ساعة أثرية قديمة بيقال أنها لا مالهاش مثيل إلا فى قصر باكنجهام الملكى في لندن وبتوضح الوقت بالدقائق والساعات والأيام والشهور والسنين مع توضيح التغيير في أوجه القمر ودرجات الحرارة.

القصر دورين وفيه 7 غرف بس. الدور الأول عبارة عن صالة كبيرة وثلاث غرف 2 منهم للضيافة والثالثة استعملها البارون إمبان كصالة للعب البلياردو، أما الدور العلوى فبيتكون من 4 غرف للنوم وكل غرفة فيها حمام خاص بها. أما أرضية القصر فمن الرخام وخشب الباركيه، أما البدروم  فكان فيه المطابخ والجراجات وحجرات الخدم.