دليل كايرو 360 للسفر في العيد
Cairo 360
كل سنة وأنتم طيبين يا أهل المحروسة بمناسبة عيد الفطر (العيد الصغير) بالرغم أننا زعلانين شوية علشان شهر رمضان الكريم عدى على طول وما حسيناش، إلا أن حان وقت الاحتفال.
الأماكن اللي تقدروا تقضوا العيد فيها كثيرة من أول الفنادق اللي بـ تتملى بسرعة شوية ولو كنتم من المترددين فأنتم في خطر، أو على شاطئ تتشمسوا أو حتى السفر لبلاد مشهورة بتقضية الأجازات، جمعنا لكم شوية اختيارات على شواطئ مصر.
الساحل الشمالي:
هواء الساحل الشمالي برماله البيضاء ومياهه الصافية بلونها الأزرق الجميل من الأشياء اللي خلت الساحل من الأماكن المحتملة لقضاء أجازة العيد، معظم القرى محجوزة لكن لسه فيه شوية فرص ممكن تلحقوها في منتجعات شواطئ جاز ألماظة على بعد 38 كم من مرسى مطروح وعروض بـ تصل إلى 2600 جنيه في الليلة إفطار فقط، كمان اختيار ثاني في فندق شاطئ عايدة العلمين على بعد 15 دقيقة قيادة من مارينا، سعر الغرفة المزدوجة بـ 1500 جنيه في الليلة.
الجونة:
مكان آخر للاحتفال في أجازة العيد وفي نهاية شهر رمضان هي مدينة الجونة، الفنادق كلها مملوءة عن آخرها في الأجازة الجاية لكن لسه فيه فرصة في فندق الثلاث نجوم دوار العمدة اللي بـ يقدم غرفة عادية بـ 75 يورو إفطار فقط وغرفة ديلوكس بـ 94 يورو، أما لو عاوزين معاملة الخمس نجوم فندق موفنبيك أكيد هـ يكون اختياركم بأسعار تبدأ من 230 دولار شاملة الإفطار.
لو كنتم مجموعة مسافرين مع بعض تقدروا تأجروا فيلا أو شقة ودي هـ تلاقوا فيها اختيارات غير محدودة على مدار الأسبوع، الأسعار تبدأ من 800 يورو : 2000 يورو أو لو كنتم تحبوا تدفعوا بالليلة الأسعار تبدأ من 80 : 200 يورو، اضغطوا هنا لمزيد من المعلومات.
شرم الشيخ:
واحد من الأماكن التقليدية لتقضية أجازات العيد والأجازات عمومًا هي شرم الشيخ اللي فقدت كثير من مكانتها بسبب الأحداث الجارية، لكنها مازالت من الأماكن المفضلة للحفلات والاستمتاع، واحد من أهم الفنادق في مصر وهو الفور سيزونز اللي بـ يقدم غرف تبدأ من 290 دولار في الليلة شاملة الإفطار، كمان مش هـ تحتاجوا تسيبوا الفندق، لكن إذا كنتم بـ تبحثوا عن وقت احتفالي أكثر إيبروتيل ليدو بـ يقدم إقامة وإفطار بـ 700 جنيه في الليلة، كمان لاجونا فيستا في النبق على بعد 10 دقائق من خليج نعمة بـ يقدم غرف أسعارها بـ تبدأ من 800 جنيه في الليلة شاملة الإفطار.
العين السخنة:
لو بـ تدوروا على أجازة في مكان هادئ وسهل وسريع في الوصول.. العين السخنة ممكن تكون اختياركم على بعد ساعة ونصف من القاهرة، فندق موفنبيك بـ يقدم غرفة ديلوكس شاملة الإفطار والعشاء والضريبة بـ 360 دولار.
سيناء:
بالرغم من كل الأخبار السيئة في الفترة اللي فاتت إلا أن جنوب سيناء زي ما هي آمنة وفيها عروض جامدة علشان تهربوا من زحمة القاهرة ودوشتها، بساطة في أكواخها بالطابع السيناوي بأسعار للمصريين 70 جنيه في الليلة والأجانب 20 يورو مع إمكانية مشاركة ثلاثة أفراد في غرفة واحدة وحد أدنى للأسعار 55 جنيه على المأكولات والمشروبات، كمان كاسل بيتش بـ تقدم أسعار تبدأ من 183 جنيه للفرد شاملة الإفطار والعشاء، كمان عياش بـ تقدم اختيار آخر لكن مش بـ يأخذوا حجوزات مبكرة.
رأس سدر:
لاعب جديد في ساحة الأماكن السياحية في مصر وهي مدينة رأس سدر في جنوب سيناء المشهور بنشاط الـ Kite Surfing لكن الأغلب بـ يروحوها للاستجمام والاسترخاء، زي كل الأماكن الغرف بـ تخلص بسرعة لكن دلوقت تقدروا تلحقوا في موون بيتش اللي بـ يقدم غرفة عادية مزدوجة بسعر 600 جنيه في الليلة، كمان منتجع هوليداي فانتازيا بـ يقدم نفس العرض لكن بنصف السعر حوالي 300 جنيه في الليلة، الاثنين نصف إقامة.
مرسى علم:
مكان من أشهر مناطق الغطس وهي مرسى علم واحدة من أهم المنافسين على قائمتنا، لكن برضه الغرف بـ تخلص بسرعة الحقوا فرصكم في منتجع شاطئ كهرمانة اللي بـ يقدم باقة All- inclusive بسعر 1155 جنيه في الليلة، كمان منتجع هيلتون مرسى علم النوبية بـ يقدم نفس الباقة all-Inclusive بسعر حوالي 1000 جنيه في الليلة، شاطئ كاليميرا حبيبة بـ يقدم إقامة وإفطار فقط بسعر حوالي 560 جنيه في الليلة.
لو لسه بـ تدوروا على اختيارات أخرى اضغطوا هنا علشان تعرفوا إيه؟ وفين؟ وإمتى؟ وإزاي؟ افتكروا كويس أن الأماكن بـ تخلص بسرعة، علشان كده كل ما تحجزوا بدري كل ما يكون أفضل.
