The Definitive Guide to Living in the Capital , Cairo , Egypt

يمكن بدايات التعارف ما بين أي اتنين بيحبوا بعض بتكون تقليدية ساعات، وساعات تانية بتكون خارجه عن المألوف، لكن بيفضل دايمًا سحر البدايات موجود بين الاتنين دول طول العمر، ودايمًا البداية دي بتبقى مميزة ومختلفة بالنسبالهم، مهما كان غيرهم بيشوفوها عادية.

لكن “عمر عطية” و”داليا الدبيكي” كانت بدايتهم مع بعض سواء هتشوفوها عادية وتقليدية، أو مختلفة وخارجة عن المألوف، إلا إنها كانت بداية ملهمة بكل المقايس، وتستحق إنه يتكتب عنها، وتتشاف وتتعرف.

الخطوة الأولى في مشوار “عطية” و” الدبيكي” كان بين حواري مصر القديمة ومتاحفها المختلفة، وبعد كده جه قرار الخطوبة على ضفاف نهر النيل، وبعدين كتب الكتاب في مسجد “محمد علي” في قلعة صلاح الدين، والفرح كان في قصر الأمير محمد علي بالمنيل.

يمكن لحد هنا ناس كتير هتشوف إن الموضوع عادي وممكن، لكن الملهم في الموضوع هو قرار الاتنين إنهم يبدأوا رحلة مدتها 60 يوم، هيلفوا فيها جميع أنحاء مصر ومحافظاتها الـ 27، وهدفا الكشف عن جواهر مصر الخفية، المتمثلة في مناطق الجذب السياحي، وكل ده علشان ترجع مصر على خريطة السياحة العالمية للأجانب مرة تانية، وده لإنها “تستحق إنها تكون من أفضل 10 مواقع سياحية في العالم” زي ما قال عمر في حوار ليه مع CNN العربية.

بدأ فعلاً “عطية” و”الديبكي” بعمل حساب على موقع “إنستجرام” لتوثيق الحدث ده، وخلوا الصفحة باسم يعبر عن رحلتهم خلال الـ60 يوم وسموها “Around Egypt in 60 Days” أو “حوالين مصر في 60 يوم”، وبيتابعها حالًا اكتر من 20 ألف شخص.

لكن مش بس كده، هيبدأ الثنائي في خطوة جديدة مستوحاة من رحلتهم خلال الـ60 يوم حوالين مصر، وهيبدأوا في تأليف كتاب هتنزل نسخته الأولى سنة 2020، وهدفه تثقيف الطلاب بالسياحة وأهميتها في الاقتصاد المصري، ودمج متعة السياحة والتعليم مع بعض.

لو حابين تتفرجوا على صور أكتر لـ”عمر عطية” و”داليا الدبيكي” وتتابعوهم على الـ “إنستجرام”.. أدخلوا هنا.