The Definitive Guide to Living in the Capital , Cairo , Egypt

القاهرة التاريخية مليانة مباني مهمة، كل تفصيلة فيها بتحكي حكايات عن زمن فات من أزمنة العاصمة المصرية، ومن البيوت الفخمة اللي تستحق الزيارة في القاهرة، بيت السناري بالسيدة زينب.. في السطور الجاية هنعرفكم أكتر على البيت العظيم ده وعلى حكايته وتاريخه وأسراره.

بيعتبر بيت السناري واحد من القصور الفخمة اللي لسة عايشة لحد النهارده في القاهرة، والبيت ده بناه صاحبه إبراهيم كتخدا السناري وصرف عليه مبلغ ضخم جدًا وقتها، وهو واحد من 3 بيوت بناهم صاحبهم، لكن بيت السناري هو البيت الوحيد اللي لسة باقي لحد النهارده من البيوت دي.

بيت السناري موجود في حي الناصرية بالسيدة زينب، وبالتحديد في نهاية حارة منج، وهي اسمها حارة “منج” نسبة لواحد من علماء الحملة الفرنسية اللي سكنوا في البيت ده أثناء احتلالهم مصر.

بيرجع تاريخ إنشاء البيت لسنة 1209 هـ – 1794 م، واللي أنشأه هو “إبراهيم كتخدا السناري” وهو من أثرياء القاهرة، وهو في الأصل من أهالي دنقلة بالسودان، واشتغل بواب بالمنصورة وبعدها سافر للصعيد وبقى بيتواصل مع الأمير “مراد بك” لحد ما أصبح من أعيان القاهرة وتوفي سنة 1216 هـ – 1801 م.

الفرنسيين صادروا البيت سنة 1798 وده لإسكان أعضاء لجنة العُلوم والفنون، اللي وصلت في بعثة نابليون العسكرية لعمل دراسة منهجية للبلاد.

وخصصت الحملة الفرنسية البيت لإقامة الرسامين والعلماء، واللي منهم “ريجو” الرسام المشهور اللي تم استخدام رسوماته في كتاب وصف مصر الشهير.

وتم نقل المجمع العلمي المصري لبيت السناري في سنة 2012 م، بعد احتراق مقره القديم في الأحداث اللي تلت ثورة 25 يناير 2011.

وبيتكون بيت السناري من جزأين:

الجزء الغربي، وده بيشمل المقاعد وقاعات الاستقبال، والجزء الشرقي اللي بيشمل الغرف الثانوية.

وللبيت مدخل كبير بيطل علي حارة “منج” وهو مدخل حجري بتعلوه مشربية بارزة، وبيؤدي المدخل بممر مرتفع بيوصل للفناء الداخلي اللي بيتوسطه نافورة، وبتطل الواجهات الداخلية علي الصحن الخاص بالبيت اللي بيتميز بالواجهات الحجرية وبالنقوش المنحوتة.

والبيت موجود فيه باب غني بالزخارف بيؤدي سلمه إلي بابين، الباب اليمين بيوصل لغرف البيت ثم القاعة الكبري والحمام، أما الباب الشمال فبيؤدي للمقعد والجناح الشرقي.

البيت النهاردة بيقدم مجموعة جميلة من الأنشطة وورش العمل والدورات الفنية.. تقدروا تتعرفوا عليها كلها من هنا.