The Definitive Guide to Living in the Capital , Cairo , Egypt

بما أن إجازة نصف السنة الدراسية بدأت والويك إند ده طويل فأكيد محتاجين نغير المود ونستمتع بحاجة مختلفة وشيقة تخلينا نخرج من مود المذاكرة والضغط والامتحانات، ومفيش أجمل من السفر علشان نعمل كده، والمرة دي اخترنا أننا نروح الفيوم في يوم داي يوز سريع نستمتع فيه بالطبيعة والآثار والتاريخ، واللي ميعرفش الفيوم فيها أماكن عظيمة لازم تزوروها في أي وقت، ومفيش وقت أفضل من الويك إند الطويل علشان تروحوا للمتعة اللي بجد.

البداية يفضل طبعًا أنكم تروحوا بعربية مخصوص علشان التنقلات أو تشاركوا في رحلة من الرحلات الكتير اللي اعلاناتها في كل حته، بس لو هتشاركوا في أي رحلة لازم تعرفوا البرنامج كامل علشان تقدروا تحددةا مناسب لكم ولا لأ، أما لو مش معاكم عربية فتقدروا تركبوا مواصلات عامة من موقف المريوطية وهناك هتتنقلوا لكل حتة بعربيات سواء أجرة أو تاكسي مخصوص.

الفيوم فيها أماكن ساحرة كتير هتستمتعوا بيها، وأول حاجة لازم تفتطروا فطير مشلتت وجبنة وعسل وده طقس ثابت هناك، وكمان فيه أماكن بتقدم خدمات زي ركوب الخيل والباتش باجي على بحيرة قارون، الصبح علشان تستمتعوا بالفطار وتتسلوا كمان، ومتنسوش التصوير علشان اليوم ده هيكون متعة بجد.

أما اقتراحتنا للزيارات فنبدأها بواحة الفيوم، واللي تعتبر كنز خفي من أسرار الفراعنة، وهي واحة صحراوية فيها بحيرات صغيرة وهي مناسبة جدًا للاسترخاء والاستمتاع بالهدوء، فلو عاوزين تهربوا من دوشة القاهرة لهدوء تام يبقى واحة الفيوم هي أنسب مكان.

وكمان الفيوم فيها وادي الريان، صحيح هو بيكون زحمة في الويك إند والأفضل زيارته في أيام منتصف الأسبوع إلا أنه المكان هتنبسطوا فيه، وهو محمية طبيعية فيهم بحيرتين وشلال يعتبر من أكبر شلالات مصر ده غير ان فيها وادي الحيتان واللي بيتميز بالكثبان المتحركة والعيون الكبريتية الطبيعية وسط منظر ممتع للجبال، ويعتبر متحف مفتوح ومسجل في قائمة اليونسكو للتراث العالمي، وهتلقوا هناك هياكل عظمية لحيتان وحفريات وأسماك قرش، ومتنسوش تتصورا عند البحيرة المسحورة اللي بيتغير لونها حسب التوقيت.

ومتنسوش في زيارة للفيوم تزوروا بحيرة قارون “الأشهر” على الاطلاق، ورغم أنها مش مخصصة للسباحة إلا أنها مخصصة لمراقبة الطيور اللي هتشوفوها هناك وعلى حسب الوقت هتلقوا الطيور المهاجرة أو المقيمة ولو انتوا حظكم حلو ممكن تشوفوا طيور لأول مرة واللي بتكون بحيرة قارون أهم محطة للراحة في رحلتها، ورغم أننا رحنا البحيرة مرتين قبل كده لكن مكنش لينا حظ نشوف حيوان الغزال وحيد القرون ونتمنى أن حظكم يكون أحسن وتشوفوه لأنه مهدد بالانقراض للأسف.

ولمحبي الآثار الفرعونية رحلتكم لازم تشمل هرم هوارة، اللي بناه امنمحات الثالث، وهو مبني من الطوب اللبن ومتغطي بالحجر الجيري، وجواه هتلقوا غرف كتير ودهاليز بتوصلكم لغرفة الدفن.

طبعًا طالما آثار يبقى لازم زيارة مدينة كرانيس في رحلتكم الممتعة لمدينة الفيوم، وهي مدينة بنيت في العصر اليوناني الروماني وأنشأها بطليموس الثاني، والمدينة بتحتوي على معبد اتبنى في القرن الأول الميلادي، وقدامه حوض كبير كانوا بيربوا فيه التماسيح، والمعبد عبارة عن صالة طويلة وفيها غرف كتير على الجنبين، وكمان فيه صالة قدس الأقداس وهو عبارة عن غرفة فيها مصطبة داخلية كان بيتعرض فيها التماسيح المحنطة، وده غير غرفة حفظ الأشياء الثمينة والقرابين، وكان بيستخدم المعبد قديمًا لعبادة الإله سوبك واللي كان تجسيده على شكل تمساح وانتشرت عبادته حتى دخول المسيحية مصر.

الفيوم مليانة أماكن كتير للزيارة ولكننا اخترنا حاجات بسيطة منها، وهي المتعة الحقيقية في يوم جميل مميز ورغم أنه هيكون مرهق إلا أنكم هتنتعشوا وتعملوا ريفريش لحياتكم وهتتحاكوا عن الزيارة كتير، ومتنسوش اللي يروح الفيوم مرة لازم يرجع لها تاني.