أكل وغوص وتسوق وأكثر.. 9 أنشطة لازم تجربهم في مصر (تقرير لـThe Independent)
أنشطة في مصر الأهرامات السياحة في مصر خان الخليلي رحلة الأقصر وأسوان رحلة نيلية ركوب الرمال فسحة في القاهرة
Mohamed Talaat
مصر دولة فريدة، بطبيعتها وآثارها وتميزها وموقعها الجغرافي، وبيزيد على ده الخدمات اللي بتتقدم فيها سواء للسياح أو المصريين، وحاليًا مصر حسب صحيفة “ذي إندبندنت” البريطانية العريقة، واللي بتقول إن المحروسة بقت مقصد بديل لأوروبا خاصة وأن فيها معالم قديمة فريدة، ووصفت القاهرة بأنها مركز حيوي ثقافي.
في الموضوع ده هنعرفكم على 9 من الأنشطة المميزة اللي ممكن تجربوها في مصر بحسب ما نشرت “ذي إندبندنت” لجمهورها.
الرحلات النيلية
من المتعارف عليه أن نهر النيل من أروع الأماكن اللي تقدروا تعملوا فيه رحلة وتستمتعوا بالمناظر الخلابة على جانبيه، وكمان مصر متميزة برحلات الكروز بين الأقصر وأسوان وسط الخضرة والطبيعة والآثار.
الاستمتاع برمال الصحراء
التزلج على الرمال ومشاهدة الكثبان من أهم رحلات السفاري اللي لازم تجربوها في مصر، وكمان تقدروا تستمتعوا ببحر الرمال العظيم اللي من أهم وأفضل المواقع للتزلج في العالم.
الغوص
البحر الأحمر ومياهه الدافئة دائمًا من أشهر وجهات الغوص في العالم، وكمان غني بالشعاب المرجانية وتقدروا من خلال رحلات الغطس أنكم تشوفوا شلالات تحت الماء وحطام السفن وحياة بحرية مدهشة، ده غير أن متاح في مصر تجارب للغوص البيئي.
خان الخليلي
وصف تقرير “ذي إندبندنت” التسوق في خان الخليلي بأنه من الأنشطة السياحية المهمة لأنه من أشهر أسواق مصر وينبض بالحياة، وفيه ورش حرفية مختلفة وبيتباع فيه سلع كتير هاند ميد.
سيوة
سيوة فيها ينابيع مياه طبيعية وبرك ملح نقي مميزة وهي مناسبة كنشاط سياحي، وكمان ممكن الناس تخيم على الطراز البدوي في الصحراء البيضاء للاستمتاع بالمغامرات والمناظر الطبيعية.
رحلات البالون
من أجمل الأنشطة المميزة في مصر رحلة البالون الطائر، وده بيكون في مدينة الأقصر ومن خلالها بتشوفوا وادي الملكات والملوك ونهر النيل والتماثيل المصرية العظيمة، وطبعًا بيتخلل الرحلة زيارة أثرية لمقابر النبلاء والملوك ومقبرة توت عنخ آمون.
التنزه في الجبال
من أجمل الأماكن اللي تشوفوا منها شروق الشمس وقمم الجبال والصحراء هي منطقة سانت كاترين، واللي التمشية فيها لمسافات طويلة بتهون. سانت كاترين بتعد من أجمل وجهات التنزه في الجبال عالميًا، وماتنسوش طبعًا زيارة دير سانت كاترين.
الأهرامات
من عجائب الدنيا السبع وهي من أهم الأنشطة اللي ممكن تتعمل في مصر مع زيارة تمثال أبو الهول، والتقرير أوضح أن زيارة مصر لا تكتمل إلا بزيارتهم.
المطبخ المصري
تقرير “ذي إندبندنت” أوضح أن تعلم مهارة جديدة عن المطبخ المصري نشاط مهم جدًا ووصف جولة التعرف على الأكل المصري بأنها “متعة كبيرة”.
