The Definitive Guide to Living in the Capital , Cairo , Egypt

ثقافة الرحلات في القاهرة خصوصًا، ومصر عامة تغيرت في الفترة الأخيرة وبقى فيه عندنا أماكن مختلفة غير شرم الشيخ والغردقة وإسكندرية وغيرها من الوجهات اللي زهقنا منها على مدار عمرنا، وبقى فيه نوع جديدة من السياحة في مصر لأماكن جديدة تستحق الزيارة.

على سبيل المثال منطقة الواحات البحرية وما تشمله من أماكن جميلة زي الصحراء البيضاء والسوداء اللي مليانين بعجائب لو قعدنا نكتب عنهم مش هـ يكفي موضوع واحد، منطقة الفيوم اللي بـ نعتبرها كنز من الكنوز اللي للأسف ما نعرفش عنها حاجة غير قليل أوي وفي الضياع، منطقة جنوب سيناء زي نويبع وطابا ودهب، ومنطقة النوبة في جنوب أسوان، وغيرها من مناطق جميلة في مصر للأسف كثير مننا ما يعرفش عنها حاجة لغاية دلوقت والأغرب أننا بـ نلاقي ناس جاية من آخر الدنيا علشان يتفرجوا ويستمتعوا بجمال إحنا ما عندناش فكرة عنه.

وضع إن شاء الله هـ يتغير طالما فيه شباب عندهم عقول كويسة بـ تتعلم وبـ تدور على كل جديد وبـ تغامر، زي الشباب اللي هـ نكلمكم عنهم النهارده واللي كان لنا الشرف أننا نطلع معاهم رحلة ونتعرف عليهم.

موضوعنا النهارده بقى عنAmaken Trips  اللي نعرفهم ونسمع عنهم من زمان وإحنا بـ نعتبرهم من أهم مشروعات الـStart Up  اللي بـ نتوقع أنها تكون كيان كبير قوي وناجح ومتميز، "أماكن" بدأت في 2008 كمبادرة شبابية، وبقيت تحت اسم "أماكن" في 2011، بـ يهدفوا أنهم يتوسعوا ويبقوا أكثر من مجرد مبادرة إلى كيان لتنمية المسئولية الاجتماعية والبيئية والثقافية في المجتمع المصري، كمان بـ يشتغلوا على تنمية ودعم المجتمعات اللي بـ يزوروها خلال سفرياتهم سواء كان الدعم مادي، ثقافي، بيئي أو اجتماعي، كمان خلق روابط بين المسافرين والأفراد في المجتمعات المحلية.

معلومات كثيرة عن أماكن جعلتنا نتحمس لهم ونكتب عنهم وأفضل دليل هو أننا نطلع معهم وخصوصًا أن كثير من أصحابنا طلعوا وكانت الآراء إيجابية في كل الطلعات، في نهاية نوفمبر شوفنا إيفنت لأماكن بالتعاون معWorld Peace Initiative  في النوبة، تأمل ويوجا وسلام داخلي.. ده المطلوب لأيام غريبة بـ نعيشها في القاهرة علشان نفصل شوية من السلبية.

أية صالح من فريق أماكن قابلتنا في محطة مصر سلمتنا التذاكر ووصلتنا لغاية رصيف القطار، اللي كان متعب إلى حد ما لكن لو ركبتم القطار الجديد الـVIP  هـ يبقى التعب أقل شوية لكن التكلفة هـ تكون أكثر، بمجرد وصولنا لمحطة أسوان انتظرنا شوية ووصلت عربية علشان توصلنا للمرسى اللي هـ نركب منها مركب للجزيرة اللي هـ نقيم فيها، وهو عبارة عن فندق في جزيرة أجيليكا ولكن مش فندق بالمعنى الحرفي، هو عبارة عن عدد من البيوت الصغيرة (تكفي من 2: 3 أشخاص لكل بيت) مجهزة بالكهرباء وفيه تواليت حريمي ورجالي وبـ يقدموا وجبة فطار وغذاء وعشاء على حسب الاختيار.

وصلنا أول يوم وقابلنا أهم شخص في أماكن وهي "يسرا منير" اللي ما نقدرش نوصفها غير أنها عبارة عن طاقة إيجابية ما تتوصفش، يسرا كانت بـ تنظم وبـ تنسق كل زياراتنا للبيوت النوبية والمزارات السياحية زي معبد فيلة ومواعيد المراكب والعربيات والمكروباصات وكل حاجة، والبرنامج اللي كانت بـ تلتزم به، كمان الإضافات بـ تتعمل بمنتهى المرونة والترتيب.

خلال أيام الرحلة كل واحد من الموجودين كان بـ يقوم بدور معين زي أن كاتب الموضوع ده في أحد أيام الرحلة كان بـ يغسل صحون ومواعين الفندق وده كان بالترتيب مع بقية البنات والشباب، وفيه اللى ساعد الناس في تلوين البيوت من بره.

ضمن رحلتنا في جزيرة من الجزر النوبية وهي جزيرة عواد اللي بـ يعيشوا وضع مش مريح تمامًا وهو أنهم بـ يضطروا كل يوم يمشوا مسافة حوالي 2 كيلو متر طالعين نازلين، والغريب أن عندهم محطة مياه ولكنها مش شغالة، ليه؟ (سؤال يجاوب عنه أصحاب الشأن، اللي بالمناسبة سمعنا أن بقى فيه تحرك إيجابي من المحافظة وهـ نقول لكم الموضوع وصل لإيه).

ضمن نشاط الـPeace in Action  قرر أحد المنظمين أننا نساعد في نقل المياه من النيل للبيوت ولو ليوم واحد، تجربة ما تتوصفش من كل النواحي من أول الاستغراب على أطيب وجوه شوفناها (لسان حالهم "ليه بـ تعملوا كده") لغاية التعب اللي ما كناش حاسين به لغاية إحساسنا بمدى قوة الست النوبية اللي تقدر تشيل جردل كبير مليان مياه (من النيل مباشرة) وتطلع به لغاية بيتها علشان تكمل يومها الطبيعي لحد ما زوجها أو أولادها يرجعوا من شغلهم ومدارسهم في الجزر الثانية.

مش محتاجين نقول لكم عن ضيافة وأخلاق وجمال أصحابنا وأهلنا في النوبة وقد إيه الأكل جميل والجو رائع، وكل حاجة كويسة وقد إيه بركة الأرض بـ تنعكس على الناس، وده أكيد طبعًا ما كانش هـ يظهر إلا بتنظيم مميز وترتيب وتنسيق من شباب جامدين جدًا هـ يخلوكم ترجعوا من أي رحلة معاهم وأنتم ناس جديدة بنفوس جديدة.

فريق أماكن عبارة عن طاقة إيجابية مميزة تستاهل التقدير والدعم، وافتكروا أن كل رحلة أنتم بـ تطلعوها معاهم وراها تنسيق ومجهود كويس قوي، عرفنا يسرا وآية وبجد وبدون أي مبالغة "بنات بـ 1000 راجل".

لو عاوزين تعرفوا أكثر عن "أماكن" زوروا صفحتهم على الفيسبوك.