The Definitive Guide to Living in the Capital , Cairo , Egypt

في منطقة مصر القديمة، وبالتحديد بجوار بقايا الحصن الروماني القديم وبالقرب من محطة مترو ماري جرجس، هيقابلك مجموعة من الأماكن الدينية، اليهودية، المسيحية، والإسلامية، متمثلة في “المعبد اليهودي – كنيسة أبو سرجة – ومسجد عمرو بن العاص”، ده غير كمان 5 كنائس تانيين في نفس المنطقة “كنيسة القديس ماري جرجس – كنيسة القديسة بربارة – كنيسة القديس أبي سيفين – كنيسة القديس تادرش الشاطبي – كنيسة الملاك ميخائيل، بالإضافة للمتحف القبطي.

خلال السطور الجاية هنعرفكم على أبرز معالم منطقة مجمع الأديان.

زمان، منطقة مجمع الأديان كان اسمها “غري”، وبعدها أطلق عليها “عحا”، ومعناها “المكان اللي القتال فيه مستمر”، وكانت مشهورة بمعبد المعبود أوزير، وهي كانت محطة مهمة من محطات العائلة المقدسة في رحلتهم لمصر.

المعبد اليهودي

في عهد الدولة الطولونية، حصلت للكنيسة أزمة مالية كبيرة، فاضطرت أنها تبيع كنيستها لليهود واللي حولوها لمعبد يهودي، وسمي المعبد “بن عزرا”، واتجدد واترمم وتم تطويره لحد ما أصبح على شكله الحالي، وهناك فيه شخص موجود ممكن يشرح لكم كل حاجة في المعبد وتاريخه مجانًا، وهتتعرفوا على قعدات الصلاة والشمعدان السداسي ونجمة داوود.

كنيسة أبو سرجة

هي كنيسة الشهيدين سرجيوس وواخس، وتم انشاءها في القرن الرابع، وتعتبر من أهم الكنائس الأرية في العالم، والأقدم في مصر، ولها أهمية دينية كبيرة، وتم بناءها فوق المغارة اللي قعدت فيها العائلة المقدسة أثناء رحلتهم لمصر، وبترتفع عن سطح الأرض بـ13 متر.

ممرات الكنائس

لما تتمشوا في ممرات منطقة الكنائس اللي فيها كنائس ” القديس أبي سرجة، القديس مارجرجس، القديسة بربارة، القديس أبي سيفين، القديس تادرش الشاطبي، الملاك ميخائيل”، هتشوفوا جمال معماري هيبهركم، وكمان هتعرفوا تاريخ كل كنيسة من دول من خلال كشافة الكنيسة المتطوعين اللي هيدوكم كل المعلومات المتاحة لأن كل كنيسة من دول لها قصة وتاريخ مختلف.

مسجد عمرو بن العاص

بعد دخول عمرو بن العاص مصر وبناءه مدينة الفسطاط أنشأ أول مسجد في أفريقيا ومصر، سنة 641 ميلادية، وأطلق عليه أكتر من اسم زي “تاج الجوامع، والجامع العتيق”، حتى تم الاستقرار على اسمه الحالي، وجواه هتشوفوا طراز المساجد بتاع زمان وجمال العمارة الاسلامية المزخرفة والمتقنة، ولكن خلوا بالكم ممنوع الولاد يدخلوا بالشورت نهائي، وكمان البنات لهم قواعد في اللبس، والجميل إن المسجد بيأجر إسدالات بسعر رمزي للبنات علشان يدخلوا المسجد.

المتحف القبطي

بعد ما تخلصوا لفتكم في منطقة الكنائس اختموها بزيارة المتحف القبطي، وده بتذكرة سعرها 10 جنيه صباحًا، وتقدروا تتصورا في البهو المميز الجميل علشان يبقى معاكم أجمل صور، وهتلاقوا جوا المعبد كل اللي يخص التاريخ القبطي القديم والحديث، وهتلاقوا كمان مرشدين يشرحوا لكم كل حاجة فيه.