مافيش أكل بـ نحبه ونكرهه في نفس الوقت أكثر من الأكلات السريعة المقلية بزيوتها الزيادة، فيها حاجة حلوة بصراحة، لكن هنا لازم تفكر في كل مرة تطلب برجر أو فراخ مقلية بالليل متأخر؛ الموضوع بـ يكون اختيار بين عدد كبير من المطاعم ولازم تختار منهم أقل واحد زهقت منه.
بعد شهرته في هليوبوليس ومدينة نصر، "ولعتين" راح المعادي، واحتل مكان مستحيل يفوتك في تقاطع شارع النصر مع شارع اللاسلكي.
مش هـ تلاقي في ولعتين أي حاجة زيادة عن كنتاكي، كوك دوور أو هارديز –خلينا نتكلم بصراحة- المطعم ده مش مختلف في حاجة. الفكرة هنا أنهم بـ يقدموا بديل للمطاعم السابقة بسعر أرخص شوية.
المكان الواسع بإضاءته القوية وعدد من القعدات شكله على نفس طراز مطاعم الفاست فوود التقليدية، الموظف بـ يرحب بك من وراء الكاونتر بابتسامة وبـ يأخذ طلبك على طول، بعدها تقدر تنتظر الأكل على ترابيزتك أو هما يوصلوه لغاية عندك، نفس الكلام.
تخصص "ولعتين" الحقيقي في الأكل الحرّاق، وبـ يقدم ساندويتشات بأحجام مختلفة، منها التوربيني، الساندويتش العملاق اللي طوله 50 سم وبجد مش لأصحاب القلوب الضعيفة. طلبنا صب تشيكن كومبو (25 جنيه) وساندويتش حريقة (19 جنيه) مع إضافة بطاطس كريسبي (8 جنيه).
ساندويتش الصب تشيكن هو ساندويتش تقليدي جدًا من الفراخ الفيليه مع جبن شيدر، مايونيز وخس، لا هو بشع ولا تحفة. الفراخ مقلية كويس، الشيدر والمايونيز شغالين والخس طازج. البطاطس مستواها متغير وده كان واضح في زيارتين منفصلين للمطعم، وقت كتابة المقال، كانت محمرة كويس ومقرمشة، رغم أننا لما روحنا قبلها بيومين كانت جافة، مزيّتة وطعمها عمومًا مش لطيف خالص.
الفوز معانا في مسابقة الساندويتش الأجمد كان أكيد ساندويتش حريقة، المكون من صدور فراخ مقلية والمفاجأة أن صوص البافالو اللي عليها كان حلو، الفراخ كانت مقلية صح، بطريقة حافظت على كمية هائلة من القرمشة والتتبيلة كانت غنية بالنكهة رغم كمية الصوص الكبيرة.
البطاطس الكريسبي –بطاطس محمرة عادية مغطاة بتتبيلة خاصة- برضه كانت هائلة وقدرت تقدم قوام جديد ولذيذ للبطاطس يشبه البطاطس الكيرلي الشهيرة بتاعة هارديز.
صحيح مافيش حاجة جديدة تبهر الشعب الأكيل، لكن ولعتين بـ يعمل الصح: فاست فوود لذيذ بأسعار مناسبة، حتى لو ما كانش من مطاعمك المفضلة، دلوقت عندك بديل لسلاسل الفاست فوود الثانية اللي كلنا حافظين منيوهاتها.
أكتب تقييم
مقترح
تليفزيون
مسلسل 6 شهور: إزاي تحقق التارجت وتعمل دراما من غير مط ولا تكرار؟!
اعمال وتش ات الاصلية مراد مكرم +5
فن وثقافة
