The Definitive Guide to Living in the Capital , Cairo , Egypt

أكل السمك المملح بشكل عام مهما أختلفت طرق عمله وطعمه، مزاج حقيقي. والرنجة والفسيخ بشكل خاص لهم تقدير كبير عند المصريين اللي بيتجهوا لأكلهم في مناسبات كتير أشهرها يوم شم النسيم، وإحنا في كايرو 360 سمعنا عن “ملك الرنجة” في الدرب الأحمر، اللي بيعمل رنجة بس سواء سندوتشات أو أطباق.

قررنا نروح ناكل هناك شوية رنجة وفسيخ علشان ننقل لكم تجربتنا اللي بنعتبرها مغامرة مش مجرد تجربة وخلاص.

أولًا؛ المكان موجود في حارة داخل منطقة الدرب الأحمر، وهو مجرد محل صغير بيعمل أنواع كتير من الرنجة، والترابيزات بتاعته موجودة في الشارع، والعمال اللي عنده أحلى وأجمل حاجة في المكان، ولاد بلد وعندهم جدعنة مش هتلاقوها بالساهل، وخدومين جدًا، ولكن العيب الوحيد أنه المكان في حارة ضيقة وصعب توصلوا له بالساهل، ولو رايحين بالعربية هما عندهم جراج مخصوص بعد ما تخلصوا أكل بيدوكم كارت بيعفيكم من دفع فلوس للجراج، ومش هننسى أن كل الناس في المنطقة يستاهلوا الشكر بيساعدوا ويتعاملوا بكل جدعنة واحترام.

تجربتنا بدأت بسلاطة ملك الرنجة سعرها 80 جنيه وده أكبر حجم، وهي كانت عبارة عن رنجة عادية وعليها طماطم وخس وشوية خضروات، ولكن للأسف غلطتهم أنهم كانوا مقطعين عليها خيار، لأننا مابنحبش الخيار مع الأكلة دي، وبعتبره بشكل عام عدو السمك، ونتمنى أنهم يخلوا الخيار بره.

كمان جربنا من عندهم حواوشي رنجة صغير سعرها 40 جنيه، وهي رنجة محشية في رغيف ومتحمرة، ماكنتش وحشة بس إحنا علشان مش متعودين عليها ماتقبلنهاش، ولكن تستاهل التجربة لو بتحبوا الافتكاسات.

وبمناسبة الافتكاسات جربنا من عندهم حاجة اسمها “رضعة الحوت” وسعرها كان 40 جنيه، ودي كانت اقتراح الويتر هناك وكنا رافضين الأول لأنها معمولة بالسمنة وإحنا مش بنتقبل السمنة، ولكن هو صمم انه ينزلها ولو ماعجبتناش نرجعها، وطلعت أحلى حاجة في الأكل كله، وطعمها كان مميز وتستاهل التجربة، وبيعملوا طبق بطاطس محمرة بلدي سعر الحجم الكبير 50 جنيه، وبيكون عبارة عن صوابع رفيعة قوي من بتاعة زمان وبدون أي إضافات، وكانت حلوة لدرجة اننا طلبنا طلب كمان.

كمان طلبنا طلب فسيخ صغير سعره 60 جنيه، وماكنش أحسن حاجة لأنه كان ني وإحنا مش بنحب الني، ولكن اللي بيحب الفسيخ بالطريقة دي هيعجبه، وهنا بقى ندخل على الرنجة، طلبنا طلب رنجة عادي وسعره 40 جنيه، وكان رنجة عادية وطعمها عادي، وكمان طلبنا طلب رنجة على الفحم سعرها 45 جنيه، وده نقدر نقول عليه اللي مأكلش رنجة على الفحم يبقى مكلش رنجة، طعمها مدخن وحلو وعجبتنا جدًا.

مغامرتنا بشكل عام كانت لطيفة بداية من محاولات الوصول، وسط جمال البيوت القديمة لمنطقة الدرب الأحمر، والجراج كان خدمة عظيمة،، وبعدها معاملة أهل المنطقة وفريق المطعم اللي بسطونا جدًا بتعاملهم.

بننصحكم بشدة لو كنتم من محبي الفسيخ والرنجة لازم تزوروا المكان، وطبعًا متنسوش أن تقدروا تجربوا عنده سندوتشات الرنجة وجلاش وبيتزا وكفتة بالرنجة، وكمان صواني الرنجة، وطريقة التقديم والعيش الطازة والبصل الأخضر والجلافز هيفرقوا معاكم في التجربة. 

تقدروا تعرفوا أكتر عنهم من خلال صفحة الفيسبوك من هنا.