The Definitive Guide to Living in the Capital , Cairo , Egypt

مؤخرًا كان فيه أزمة بسبب افتتاح الفنان الشعبي سعد الصغير لمطعم وكافيه جديد في الدقي، واتقال كلام كتير عن إن المكان بدون ترخيص، وإنه عامل إزعاج للسكان، لكن بعيدًا عن الجدل ده إحنا قررنا نزور المكان علشان نجربه، ونقولكم رأينا فيه، وتجربتنا كاملة هتتعرفوا عليها في السطور الجاية.

في البداية لازم تعرفوا أن المكان دوشة، والحركة فيه كتير، سواء من فريق العمل اللي زي خلية النحل في كل حتة، أو من الزبائن اللي 90% منهم شباب صغير بأصواتهم العالية وهزارهم، ورغم كده، المكان لطيف، والقعدة حلوة، وهو مفتوح 24 ساعة، والحقيقة طوال قعدتنا في المكان ماسمعناش ولا أغنية للفنان سعد الصغير، رغم إننا كنا متوقعين عكس كده.

مطعم وكافيه Grigio، واجهته عليها اسم “الصغير”، مع جيتار بديزاين حلو، ومنورين طبعًا، ولما تدخل المكان هتستغرب، لأن حجم الكراسي كبير جدًا زيادة عن اللزوم، وكان يفضل أنهم يعملوا كراسي بحجم أصغر، وهتلاقوا كمان البار بتاع المشروبات مكشوف قدامكم، ولو قعدتم قريب منه هتشوفوا المطبخ وتجهيز الأكل والاتنين كانوا نضاف جدًا والشيفات محترفين جدًا.

طلبنا تشيكن ستريبس، بـ39 جنيه، ودي عبارة عن صوابع فراخ مقرمشة ومعاها صوص بييجي لوحده اسمه سويت شيلي، وكان طعم الفراخ حلو قوي، لكن القرمشة ماكنتش مظبوطة، لأنها كانت زيادة عن اللزوم لدرجة إنها ناشفة، أما الصوص فكان طعمه مميز جدًا، لكن كنا نتمنى مايكونش مسكر بدرجة كبيرة ويكون سبايسي أكتر.

كمان جربنا من عندهم ميكس جريل، بـ166 جنيه، ونزل لنا “كفته وفراخ” بس، ومعاهم بطاطس محمرة وأرز، وعجبتنا الكفتة جدًا، طعمها مميز، ومن زمان مادوقناش طعم الكفتة اللي تحسها بيتي في مطعم وخاصة لما يكون جديد، أما الفراخ فهي ماكنتش أحسن حاجة، وكنا نتمنى يهتموا بتسويتها أكتر، وتقعد فترة أطول في التتبيلة، وبجد البطاطس المحمرة كانت تحفة ومتحمرة صح، مع التتبيلة اللي إديتها طعم خليتنا مش محتاجين أي إضافات تانية عليها، بعكس الأرز اللي للأسف حسينا أنه كان مسلوق لمريض مش لأكيل، ولو هما بيعملوه كأكل صحي ياريت يعرفونا بعد كده.

قررنا نحلي ونطلب أم علي بـ30 جنيه، وعلى الرغم من إننا بنحبها ساقعة، لكن لما نزلت لنا سخنة بالوش المحمر صح والطعم الحلو اللي دوقناها وهي متغرقة فسدق أكلناها كلها وماهتمناش باللي بنحبه، واللبن الحقيقة فيها كان واضح انه لبن طبيعي 100%، وده إداها تماسك حلو وخلى طعمها حكاية.

في المجمل تجربتنا كانت كويسة في المكان، وخاصة أنه لسه فاتح جديد، والمكان موفر جراج أمامه علشان اللي هيروح بعربية، وبنتوقع أنهم يكونوا رقم في المنافسة في منطقة الدقي والمهندسين قريب، وهنقولكم على سر، لو عاوزين تتصورا مع سعد الصغير اطلبوا من المدير وهو هيدخلكم ليه لو موجود تتصوروا براحتكم.

تقدروا تعرفوا أكتر عن المكان بزيارة صفحة الفيسبوك من هنا.