The Definitive Guide to Living in the Capital , Cairo , Egypt

السمان من الأكلات العظيمة اللي بنقدرها وبنحبها، وحقيقي بنعتبره من أجمل الأكلات الخفيفة والمفيدة للإنسان، لأنه بيحتوي على الفوسفور والكالسيوم المفيدين لعلاج هشاشة العظام، وكمان لحم السمان ممتاز في علاج أمراض الجهاز التنفسي والربو والسل وضمور الأوعية الدموية، وعلشان حلاوة السمان وفوائده قررنا نزور مطعم عبلة في كرداسة، اللي سمعته سبقاه ومعروف أنه من أفضل الأماكن اللي بتقدم وجبات السمان مشوي ومحشي مع شوية حاجات تانية.

خلال السطور الجاية هنقولكم على تفاصيل تجربتنا داخل مطعم عبلة. جاهزين تجربوا أحلى سمان؟

أولًا؛ خلينا نقول أن المطعم اسمه عبلة بس، علشان متتلغبطوش بينه وبين أماكن تانية حاطة أسماء قبل أو بعد اسم عبلة، وهو مطعم شعبي في تصميمه وديكوراته وخدمته، ولكن المكان واسع ويساع من الحبايب 1000، وعندهم مكان إن دور ومكانين آوت دور، والترابيزات والكراسي عادية، وفريق العمل ابن بلد وخدوم وشايفين شغلهم كويس.

بدأنا بشوربة لسان عصفور وكان سعرها 15 جنيه، وفي الحقيقة هي شوربة عادية مش واو ولا فيها حاجة مميزة، بس خلينا نقول أنها شوربة بيتي مصرية أصيلة، وكمان طلبنا طبق ممبار سعره 30 جنيه، وكان حلو ومتسوي كويس ولكن خلوا بالكم من أنه ممكن يكون معمول بشوربة الجمل، علشان كده طعمه مش هيكون محبب لكل الناس.

كمان طلبنا طبق كبدة سمان وسعره 50 جنيه، واللي ما أكلش كبدة سمان فايته كتير، لكن كان عيبه بس الزيت الكتير، وياريت لو يدخلوا خدمة الكبدة المشوية هتبقى أعظم بكتير.

ودخلنا على طول على السمان المشوي اللي كان سعره 50 جنيه، واللي كان مشوي بمعلمة وطعمه حكاية وعجبتنا اللحمة الطرية الخفيفة الحلوة بتاعة السمان، وكمان جربنا السمان المحشي أرز وسعره كان 60 جنيه، وكان متحمر ولونه أصفر كده وحشوه حكاية، والسمانة كانت كبيرة، ونقدر نقول إننا اتمزجنا من أكل السمان وحلاوة السمان وطعامة السمان.

دي كانت تجربتنا في مطعم عبلة، ورغم أن عندهم مشويات كتير وأكلات مختلفة إلا أننا كان هدفنا ناكل السمان وما يتعلق به علشان نقدر نقول أن عبلة واحد من أحسن الأماكن في مصر بناءً على التجربة مش على السمعة، وهو فعلًا يستحق سمعته، ونتمنى أنه يستمر في الجودة وكمان يطور من نفسه طول الوقت للأحسن.

تقدروا تعرفوا أكتر عن عبلة من خلال صفحة الفيسبوك من هنا.