The Definitive Guide to Living in the Capital , Cairo , Egypt

القعدة في مكان كلاسيكي مع الحصول على خدمة مميزة، معادلة صعبة، لو توفرت بتكون من الحاجات المبهجة اللي تنفع لخروجة تغير المود، وكمان لو الأكل والمشروبات جودتهم عالية والسعر مناسب، بيكون اليوم كله جميل، وكمان فيه فيو النيل، حتى لو ماكنش واضح بالشكل الكافي، بس مجرد انكم تشموا ريحة النيل مودكم هيبقى حلو، وده اللي بيقدمه مطعم Zi المعادي، اللي قررنا نزوره ونجربه، وخلال السطور الجاية هنقول لكم على تجربتنا مع المكان.. جاهزين؟

ديكور المطعم كلاسيكي وفيه كراسي وترابيزات خشب طويلة وعادية، وأنتم بتختاروا اللي يعجبكم منها، وكمان المكان هادئ والموسيقى بتاعتهم عظيمة، وعندهم فريق عمل فريندلي ومبتسم دايمًا وبيساعدكم بكل حب، وخلينا نعرفكم أن المطعم شغال يوميًا من 9 صباحًا حتى 8 مساءً، وبعدها بيكون فيه حفلات وبار بيقدم مشروبات كحولية، ودي معلومة مهمة للناس اللي عندها تحفظ من الوجود في أماكن فيها مشروبات كحولية.

جربنا في مطعم Zi، شوربة كريمة الفراخ ودي سعرها 50 جنيه، وكانت عظيمة وقطع الفراخ كتيرة، وقوام الكريمة في الشوربة كان تقيل وعظيم، وكمان جربنا شوربة سي فود مخلية، بـ85 جنيه، واللي كانت متزينة بواحدة استاكوزا ومليانة من خيرات البحر وطعمها حلو.

وكمان طلبنا طبق مكس مقبلات سعره 110 جنيه، وكان فيه ورق عنب وممبار وتشيكن ستريبس وفرايد موتزاريلا، وخلينا نقولكم أنه ينفع وجبة لوحده، وطريقة تقديمه مبهرة وتفتح النفس، ومن حلاوته أكلناه كله.

أما الطبق الرئيسي فده عاوز أكيلة حقيقيين بسبب حجمه، وقررنا نطلب ريب آي ستيك، وسعره 220 جنيه، وكان عبارة عن ستيك متسوي على حجر بركاني، مع 3 صوصات مختلفة، وتقدروا تختاروا اللي أنتم عاوزينه منها، وبييجي معاه 2 سايد، وإحنا طلبنا بطاطس وطعمها كان خرافي لدرجة إننا بشكل شخصي طلبنا نعرف مكان التوابل اللي فيها بتتباع فين، وكمان طلبنا أرز أبيض، وطعمه كان لطيف جدًا.

كمان جربنا من عندهم إسكالوب إلا بارميزان، وكان سعره 185 جنيه، والطبق كان عبارة عن قطعتين كبار جدًا من الإسكالوب المدخن ومعاه صوص الطماطم وكمان متغرق بالجبنة البارميزان العظيمة واللي طعمها يحلى أي حاجة، وبصراحة معرفناش نكمل الطبق من حجمه خصوصًا بعد المقبلات والشوربة.

المكان بكل تفاصيله وخدمته عظيم، لكنه مابيحتويش على كراسي مخصصة للأطفال، لكن فيه كيدز إيريا بره في اللاونج تقدروا تسيبوا أطفالكم فيها.

عرفنا كمان إنه بعد الساعة 8 بالليل بيكون فيه حفلات مميزة ودي بتكون عن طريق الحجز، وفي المجمل المكان مناسب لموعد رومانسي، وقبل الساعة 8 ممكن كمان يكون مناسب لمقابلة عمل لهدوءه في كل حاجة حتى المزيكا.

تقدرو تعرفوا أكتر عن Zi من خلال صفحة الفيسبوك من هنا.