The Definitive Guide to Living in the Capital , Cairo , Egypt

الفرايد تشيكن من الأكلات السريعة اللي لها جمهور عريض وكبير في مصر، والمنافسة في النوع ده من المطاعم قوية بأسماء عالمية ومحلية، وفي النص كده فيه براند اسمه Shihlin بدأ في تايوان وحاليًا موجود في دول كتير ومنها مصر، المكان ده بيحقق نجاح في صمت، وبيعمل أكبر فرايد تشيكن ممكن تاكلوه، وإحنا جربناه 3 مرات وبالتالي التجربة كانت متعمقة وهننقلها لكم بالتفصيل في الريفيو ده!

مطعم Shihlin عبارة عن كشك في كورت يارد المعادي، وهو مطبخ صغير للتجهيز، و6 ترابيزات بسيطة جدًا للقعدة آوت دور، وعدد العمالة قليل ولكن فيه سرعة استجابة منهم كويسة جدًا، يعيبهم بس لما بتطلبوا أوردر الموظفين هناك مش بيعرفوكم على العروض، اللي بتكون موفرة جدًا حقيقي، مانعرفش ده تقصير منهم ولا تعليمات من الإدارة، عمومًا ده خطأ لازم يتداركوه.

طلبنا من عندهم فرايد تشيكين كرسبي وسعره كان 145 جنيه، وهو عبارة عن قطعة فرايد تشيكين كبيرة ورفيعة ومتتبلة حلو ومقلية بروفيشنال، وفيه منها الأوريجنال وميديم سبايسي وسبايسي، وده بيتحدد بالألوان، وبصراحة كده لو أنتم أكيلة وأشباح تاكلوا ميديم سبايسي علشان الإسبايسي ده لون وشكم هيتغير وهتعرقوا من أول قطمة، لا تقولي أسواني ولا سوداني، الأسبايسي عندهم غير.

كمان جربنا من عندهم نودلز تشيكن باربكيو في عرض الكومبو وكان فرايد تشيكن وبطاطس و2 عصير وسعر العرض كان 299 جنيه، والنودلز كان طعمها حلو والتشيكين تتبيلتها ممتازة، ولكن الخضروات اللي كانت في النودلز كانت محتاجة تبقى معتدلة شوية وتقل علشان متأثرش على الطعم، لكن بشكل عام الطبق عجبنا وانبسطنا من التجربة.

العنوان: محل رقم 1 – كورت يارد – شارع فلسطين – المعادي.

رقم التليفون: 01550051332 – 01021350040

وتقدروا تعرفوا أكتر عنهم من خلال صفحتهم على فيسبوك من هنا.