The Definitive Guide to Living in the Capital , Cairo , Egypt

تجربتنا النهارده كانت تجربة مختلفة جدًا، من أول اسم المكان “Heart Attack” لحد الأكل اللي فعلًا يستاهل إنك “تموت علشانه” زي ما بيقول شعار المكان، وده كله بأسعار مناسبة جدًا وخدمة فوق الممتازة، تعالوا نحكي لكم عن تجربتنا بالتفصيل.

في جولة كايرو 360 في مول “Hub 50” في شارع الخمسين في زهراء المعادي، لفت نظرنا اسم المكان اللي كان مختلف ومربك في نفس الوقت، يا ترى إيه نوع الخدمة اللي بيقدمها المكان ده علشان يبقى اسمه “Heart Attack” أو “أزمة قلبية”وبعد لما قربنا أكتر عرفنا من الزحمة اللي كانت على الترابيزات إنه “مطعم” بس مختلف حبتين.

في البداية بعد ما قعدنا خدنا جولة سريعة بعنينا في المكان، اللي كانت ديكوراته معظمها من الخشب باللون البني، اللي بيدي إحساس بالهدوء والراحة، ده غير إنه كان واسع بما فيه الكفاية لإنه يستوعب أعداد كبيرة من الناس من غير ماتحس إنه المكان زحمة أو مليان أو حر.

المطعم ملحق بيه تراس خارجي في الدور الأرضي، واسع وفيه قعدة حلوة ومريحة وبتبقى منك للسماء، وفي الغالب بيفضلها المدخنيين على اعتبار إنها منطقة مفتوحة، وبلفته بسيطة بيتم توفير طفايات سجاير على الترابيزه، لكن في العادي مش بتبقى محطوطة.

المنيو بسيط وسهل جدًا، مقسوم لجزئين رئيسيين، الجزء الأول عبارة عن الوجبات اللي تقريبًا كلها فراخ بروست على طريقة كنتاكي، لكن مع اختلاف الطعم أكيد، وبتبدأ من اول قطعتين فراخ، لحد 21 قطعة، على حسب عدد الأفراد، وطبعًا مع امكانية إضافة كولوسلو أو بيبسي أو بطاطس حسب حجم الوجبة، مع صوص من اختياركم.

لحد هنا المنيو طبيعي، لكن اللي مش طبيعي هو الجزء التاني من المنيو اللي مقسوم لـ 3 أقسام، سندوتشات التشيكن برجر، وسندوتشات البيف برجر، والمقبلات أو الأبيتيزر، ودي لوحدها حكاية في ريفيو لوحده.

نبدأ بالمقبلات، واللي وقع اختيارنا فيها على 5 صوابع جبنة موزاريلا متبلة بخلطة هارت آتاك الخاصة، واللي عملت لها طعم مطرقع، مع نوعين من أنواع الصوص المميزة من اختيارك، وفي الحقيقة كان صوص “تويستر” مميز جدًا، وكل ده بـ35 جنيه بس.

كمان ماننساش إن المكان بيقدم أكبر نافورة جبنة في مصر، ودي عبارة عن نافورة خاصة بكل ترابيزة، بتنزل جبنة سايحة طول الفترة اللي بتاكل فيها، وبتكفي من 5 لـ 10 أشخاص، وفي حالة إنها خلصت، بيتعاد مليها تاني فورًا، وسعرها 79 جنيه.

في الأطباق الرئيسية كان طلبنا سندوتشين من قائمة التشيكن برجر، الأول كان Fire In The Hole ( بـ 48,5 جنيه للسندوتش السنجل) وفي الحقيقة كان السينجل مشبع جدًا جدًا وكفاية لفرد، وده لإن السندوتش مش محشي برجر بالمعنى التقليدي للبرجر، وإنما السندوتش عبارة عن قطعتين كبار من صدور الفراخ الكرسبي، معاه بطاطس، وحلقة بصل مقلية، مع جبنة بيير جاك الرهيبة، وخس وخيار وطماطم وفلفل الهالوبينو.

السندوتش التاني كان Angry Heart ( بـ 49,5 جنيه للسندوتش السنجل) وده بقى فعليًا مقدرناش احنا كأكيلة نكمله، لإنه بالإضافة لقطعتين الفراخ الكرسبي الكبار في السندوتش، والبطاطس معها قطعتين بيف بيكون كبار، وقطعة تشكن برجر، مع صوص هآرت آتاك المميز، مع شوية تحابيش تانيه.

حقيقي الأكل كان طعمه مختلف ومميز، وفعليًا لو مش جعانين أو أكيله، مش هتقدروا تخلصوا الأكل، ده غير إن السعر مناسب جدًا جدًا للكمية اللي بتتقدم، سواء في المقبلات أو في السندوتشات والوجبات.

الخدمة كانت فعلًا ودوده وظريفة وخفيفة، ومفيش أي نوع من أنواع التأخير، لا وأنتم بتطلبوا الأوردر من الكاشير (برغم الزحمة في نظام) ولا وصول الأكل للترابيزة، ده غير الإستجابة السريعة لطقم الخدمة لأي طلب هتطلبوه أثناء الأكل، ودي كانت من الحاجات اللي أسعدتنا جدًا في تجربتنا لـ Heart Attack.