The Definitive Guide to Living in the Capital , Cairo , Egypt

دايمًا المكان اللي بيكون الفيو بتاعه على النيل بيكون مميز في قعدته، علشان حلاوة نيل القاهرة بتخلي أي قعدة مريحة للأعصاب، ومع خدمة كويسة وأكل حلو كده المعادلة اكتملت في خروجة تخلينا مبسوطين، وده اللي لقيناه -تقريبًا- في مشويات الملك فاروق فرع الدقي.

تعالوا نعرفكم أكتر على المكان وعلى تجربتنا فيه مؤخرًا.

أولًا؛ المكان أوبن إيريا وفيه مستويين للقعدة، ومن أي مكان هتشوفوا النيل بشكل عام والنافورة الراقصة بشكل خاص، والديكور بتاعه كلاسيكي والترابيزات والكراسي حديد من الكبيرة المشغولة، والخدمة عندهم كويسة وفريق العمل خدوم، لكن بسبب الزحمة أحيانًا ممكن متلاقوهوش قريب منكم طول الوقت، وعلشان تفطروا عندهم في رمضان لازم تحجزوا الأول، ويفضل أنكم تحجزوا من خلال الصفحة مش التليفون علشان إحنا واجهنا مشاكل في حجز التليفون مرتين، يا إما كان مشغول، يا إما ماكنش فيه رد!

بدأنا تجربتنا بوجبة قمر رمضان، وسعرها 245 جنيه، على الرغم من أنهم كاتبين على صفحتهم 225 جنيه، وهي عبارة عن وجبة فيها شوربة لسان عصفور وكانت حلوة ولطيفة وسخنة، وقطعتين سمبوسك جبنة وكانت كويسة بس الزيت كتير فيها، وقطعتين كباب مزجونا بطعمهم، وقطعتين كفتة معمولين بطريقة ممتاز، وفردة سمان مشوي، وللأسف مكنتش أحسن حاجة ومقدرناش ناكلها.

الوجبة كان معاها أرز بالشعرية بس كان ساقع وده ممكن يكون علشان الجو واننا ركناه للآخر، وطاجن بامية كانت مسكرة ولطيفة.

كمان طلبنا من عندهم وجبة ربع كيلو كفتة وسعرها 74 جنيه، وكانت عظيمة جدًا في تتبيلتها وتسويتها، ومعاها ربع فراخ شيش بسعر 85 جنيه، ومانقدرش نقول أنها كانت مميزة، يعني حسينا إنها عادية وبردوا ماحبيناش نكملها للآخر! وماتنسوش أن مع كل وجبة بينزلكم مشروب رمضاني مجاني.

جربنا من عندهم القهوة وسعرها 20 جنيه، واللي كانت حلوة، وعصير ليمون بالنعناع وسعره 30 جنيه، وكان لطيف ومش مسكر زي ما طلبنا، وطلبنا الحلويات الشرقية وكانت هدية من المطعم مع الوحبة، ودي كانت لفتة جميلة منهم.

طلبنا كمان أم علي ورغم انها كانت معمولة طازة وسخنة إلا أنها كانت مسكرة بزيادة وده شيء إحنا ماكناش حابينه.

تجربتنا بشكل عام كانت لطيفة وانبسطنا من القعدة جدًا ومن فريق العمل، وحتى الأكل كمان كان معقول رغم بعض الملاحظات، وأكيد هنكرر التجربة تاني وتالت وخاصة في ليالي الصيف.

تقدروا تعرفوا أكتر عنهم من خلال صفحة الفيسبوك من هنا.