The Definitive Guide to Living in the Capital , Cairo , Egypt

«ماريتيم» موجود في منطقة من المناطق الرئيسية في أبو
تيج مارينا في الجونة، وهو واحد من أحسن المطاعم عشان تاخد فيها فطار هادي أو وجبة
خفيفة في وسط زحمة اليوم، والأحلى كمان، وجبة عشاء هادية ومش مبهرجة. أصحاب المطعم
– السويديين الأصل – قرروا أنهم يخلوا كل حاجة في المكان (زي المنيو والديكور)
بسيطة لكن برضه محتفظة بجو المارينا. «ماريتيم» واخد شكل السفن والطابع البحري
عموماً، وده بـ يبان في كراسيه المريحة باللونين البني واللبني، والترابيزات
الرخام، والبار الأبيض المدور البسيط، والأعمدة اللي عاملة زي صواري السفن ومغطية
المكان كله من فوق.

المنيو
والألوان اللي في المطعم بـ تدّي طابع سويدي للمكان. الفطار بـ يتقدم لغاية الساعة
1 ظهراً، وأطباق الفطار عندهم منها «فطار ماريتيم – Maritim Breakfast» وده بـ يتكون من أومليت، جبنة، شرايح ديك رومي،
كرواسون، سلة فيها عيش ومربى، وقهوة وعصير برتقال، وكل ده بسعر معقول (32 جنيه).
والـ English Breakfast أو الفطار
الإنجليزي بـ 32 جنيه برضه.

إحنا جربنا توست الـ Skagen اللي هما مشهورين بيه، موس سلمون وكاڤيار على
توست بالزبدة مع سلطة صغيرة على الجنب (45 جنيه). وكمان الـ Potato Gratin أو جراتين البطاطس مع الجبنة السايحة (15 جنيه)،
ورول فواكه البحر اللذيذ: خليط جمبري، لحم كابوريا، وكاليماري ملفوفين في كريپ
بالبشاميل، بالشبت والجبنة السايحة (80 جنيه).

فيه
أطباق تانية مشهورة في المنيو بتاعهم، زي شوربة المشروم كاپوتشينو (35 جنيه)،
واسمها ده جاي من لونها اللي بـ يبقى زي لون الكاپوتشينو. والـ Beef Penne
وهي مكرونة الپينا
باللحمة (65 جنيه). المنيو فيه كمان أطباق مأكولات بحرية متنوعة زي طبق ستيك
السلمون المشوي (79 جنيه)، طبق «Surf and Turf» وده عبارة عن مزيج
الستيك مع الجمبري المشوي بحوالي 100 جنيه. وطبق المأكولات البحرية (195 جنيه)
اللي بـ يبقى فيه جمبري، جندوڤلي، تونة، وكاليماري. وفيه طبق أخف شوية عبارة عن
موس السلمون مع السلمون المدخن (حوالي 50 جنيه)، والسلطات زي سلطة السيزر بالجمبري
(45 جنيه)، سلطة الفراخ بالريحان بـ 39 جنيه، وماريتيم كاپريس Martim Caprese
(42 جنيه) وللأسف ماكانتش قد كده.

«ماريتيم» بـ يقدم كمان عصاير فريش، مشروبات
غازية، أنواع مختلفة من القهوة، والأسعار كلها من 20 لـ 30 جنيه. «ماريتيم» مش من المطاعم
المتكلفة قوي في الجونة، يعني مش لازم تلبس أشيك حاجة عندك وانت رايح. إلبس اللي
انت عايزه واستمتع بالوجبة بتاعتك على منظر البحر الجميل ومنظر اليخوت النضيفة وهي
قدامك في المرسى.