The Definitive Guide to Living in the Capital , Cairo , Egypt

الفناء الصغير بـ يوصلك مباشرة للمطعم الغريب إلى حدٍ ما. الباب الخشب مع الستائر اللى على الستايل الأوربى بـ تغطي نصف الشباك والتصميم الداخلى الدافئ مع الشموع المنيرة داخل زجاجات كلهم بـ يشدوك أنك تدخل. أكبر عدد أفراد ممكن يقعدوا هناك فى نفس الوقت هو 20، والمطبخ مغطى بنصف حائط وأدوات الأكل والأكواب مُخزنة فوق رف مكشوف؛ تحس نوعًا ما أنك دخلت فى كوخ داخل جبل.
احتلت مجموعتنا المكونة من 12 فرد جانب كامل من المحل وبدأنا بطلب من مقبلات اللحم البارد (Grison 30 جنيه) وتشيز فوندو (مع مشروب كحولي 130 جنيه). اللحم كان عادى، وبـ يقدم مع خبز ومخلل. مع أن الخبز كان لذيذ وشهى، بس خالى من النكهة. التشيز فوندو على الناحية الثانية كان تحفة، غنى وله نكهة مميزة، وفى نفس الوقت مش ثقيل قوى، الطبق خرج بـ يلمع بعد ما خلصنا أكل.
كمان بـ يقدموا نسخة حديثة من الراكليت raclette  يسعر 130 جنيه على شواية وكوبليه  ‘coupelles’ ودى عبارة عن أوعية صغيرة بـ توضع فيها المكونات علشان تسيح وبعدين تأكلها، تقدر كمان تطلب نوع معين من اللحوم علشان تشويه (حوالى 100 جنيه) بجانب الجبن، والبطاطس والبصل اللى بـ يكملوا الوجبة؛ وكمان تأكدنا أن المخلل لا غنى عنه مع الأكل.
الجبن كان طعمه رائع، وبـ يذوب كويس مع الحرارة. وكمان لما يضاف مع البطاطس بـ يعملوا مزيج لذيذ، بس بـ يملأ البطن شوية، إحنا بقى شوينا البطاطس مع اللحم وكان برضه حلو جدًا. اللحم كان مقطع على شكل شرائح رفيعة، وكان طرى، وJuicy ودهنه قليل. السلطات الجانبية رغم أنها بسيطة، بس مكوناتها كانت طازجة وعليها dressing لذيذ.
للأسف من كثر ما إحنا شبعنا ما قدرناش نطلب الحلو، بس مع اختيارات زى تشوكليت فوندو (50 جنيه) وآيس كريم مغطى بالمارينج (30 جنيه) أكيد المرة اللى جاية هـ نعمل حسابنا.
من الحاجات اللطيفة فى المكان أن ممنوع التدخين، بس الفناء الصغير بـ يقدم أماكن للناس اللى نفسها فى نَفَس أو اثنين.
طاقم الموظفين عدده صغير والحقيقة لازم نشيد بمجهودهم فى الشغل. بـ يميزهم السرعة، والكفاءة والانتباه، زيهم زى تشارلوت صاحبة المكان، اللى بـ تتمتع بحسن الاستضافة. خلاصة الموضوع ببساطة، دى غالبًا كانت من أحسن تجارب الأكل بالنسبة لنا فى القاهرة.