لعشاق الكشري.. دليلك لأقوى 20 محل كشري في القاهرة
سيد حنفي كشري أبو سليمان كشري التحرير كشري الخديوي كشري الزعيم كشري السني كشري القاهرة كشري المجنون كشري حمادة كشري زيزو محلات كشري
Cairo 360
الكشري مش مجرد أكلة عادية، ولا هو البديل الرخيص آخر الشهر لما تبقى عاوز تتغدى ومش معاك فلوس، الكشري له وضعه، وله ملامحه اللي لازم تستوعبها قبل ما تاخد القرار وتدخل أرض الأحلام، الكشري زيه زي القهوة كده ماينفعش تتعامل معاه باستعجال، ولا تروحله بإهمال وأنت في الطريق من مكان لمكان وخلاص، ده يتراح له مخصوص وبكل حب واحترام.
قدروا النعمة، في العراق الكشري عبارة عن أرز أبيض وعدس أصفر وخلاص، وفي الشام الكشري بيكون إما عدس وأرز أو برغل وأرز مع بعض الإضافات البسيطة، أما بقى البلد الوحيد اللي بتقدم الكشري بالطريقة اللي بنشوفها ونعرفها، واللي ريحته بتدخل مناخيرك تثير مخك وترقص قلبك وتسخن كل خليه في جسمك، وتخليك في حالة استثنائية مستحيل تحس بيها فعلًا إلا لو كنت من عشاق الكشري، هي مصر أم الدنيا.
الكشري بيتاكل بالراحة، باهتمام، بتركيز شديد جدًا، مع كل حبة رز وعدس ومكرونة، أكل الكشري بجد لازم تجربه لوحدك، من غير تشتيت ورغي كتير حوليك، عشان تحس الطعم، مع كل نقطة صلصة، ودقة، عشان تقدر تحكم المكان اللي أنت فيه بيدلق زباينه ولا بيقدرهم ويحبهم.
فيه شوية محاذير كده وإنت بتاكل الكشري لازم تاخد بالك منها، والأصلح إنها تتكتب في ورقة على باب المحلات عشان ما حدش يقع في الأخطاء الشنيعة دي، أول تحذير إوعى تطلب الكشري في علبه وتاكله بره، الكشري بيتاكل في وسط المحل، مع الرفاق، اللي ماتعرفهمش على باقي الترابيزات، صوت المعالق وهو بيخبط في الأطباق المعدن، الإيدين اللي طالعة ونازلة تحط دقة وتحط شطة وأصوات من عينة “واحد لوكس ورد زيادة” وهكذا، دي الأجواء.
أما تاني تحذير وده أخطر واحد، إوعى تدلق كل حاجة على طبقك وتروح مقلبه وخلاص على كدا وتفضل تاكل فيه بزهق، اللي بيعمل كدا المفروض ياخد كارت أحمر ويتطرد بره المحل، لأن الكشري متعته بتبدأ مع كل ملعقة جديدة تاكلها، تختار هتأكلها إزاي.. مثلًا ملعقة من غير دقة ولا شطة ولا أي حاجة تستمتع فيها بطعم المكرونة السادة مع العدس والأرز والصلصة، وملعقة ثانية تزود فيها الشطة شوية لو بتحبها، ملعقة ثالثة تزود فيها الدقة، وملعقة رابعة فيها كل حاجة، وملعقة خامسة تتذوق فيها المكرونة مستوية كويس ولا لأ، على فكرة ده مش دلع ولا تهريج، ده مفيد جدًا لأنك مش بس هاتأكل وتستمتع، لأ كمان هاتمضغ كويس وهاتهضم كويس، وهتستفيد، لو عملت كدا نوعدك مجرد ما هاتروح البيت هاتحس إنك جوعت، لان فرط استمتاعك ومضغك واهتمامك بالأكلة هايخليها تتهضم بسرعة البرق.
كايرو360 من عشاق الكشري.. دخلنا محلات كثير، في السطور الجاية هانقول لكم على أكثر 20 مطاعم كشري نعرفها كويس مرتبة من الحلو للأحلى. يعني رقم 1 مطعم حلو، لكن رقم 20 هو أحلى مطعم في القاهرة.
1- حمادة
لسة لحد دلوقتي مش فاهمين السر وراء اختيار اسم حمادة لأغلب محلات الكشري، على اختلاف مواقعها وملاكها والطعوم فيها، لكن حمادة اللي نقصده هنا هو اللي ليه كذا فرع في شارع السودان وعلى أول شارع جامعة الدول العربية، تحديدًا في 23جامعة الدول العربية، محل موقعه متميز، وطعمه بالنسبة لناس ملفتش كتير على محلات الكشري حلو، لكن اللي لف بجد هايعرف إنه حمادة عادي، لو طالبة معاك أوي كشري روحله، لكنه مستحيل يكون رقم واحد رغم إنه عنده فرصة كويسة، لكن مش عارفين المشكلة فين.
حمادة معندوش تركيز يمكن، رغم إنه تقريبًا الوحيد اللي بيقدم مشتملات جمب طبق الكشري أكتر من الكشري نفسه، طبق فيه دقة توم، لكن تحس ناقصها حاجة، نفس الشيء مع الدقة والشطة، وطبق الكشري نفسه، هو لا بأس بيه بس مايكيفش محبي الكشري الأصليين، مع ذلك هاتلاقي معظم العرب اللي بيدخلوه بيروحوا بلادهم يشكروا فيه ويكتبوا ريفيوهات عنه انه الأفضل وهنا بنقول إنها أرزاق.
الرقم المختصر لحمادة 19713
2- ابو عماد الجيزة
ناس كتير بتحب أبو عماد جدًا، وبتعتبره مكان عبقري، في 5 شارع مراد في الجيزة، كسعر وطعم كشري وموقع، وغيره من باقي التفاصيل، لكن بالنسبة لينا كناس كييفة كشري، تجربة أبو عماد كانت عادية، والسبب الوحيد كان “الدقة” اللي لونها أخضر طعمها غريب، مش ممكن هاتلاقي زيها في أي محل كشري تاني، وهنا بيلعب اختلاف الأذواق دور كبير في التفضيلات، بالنسبة لينا حسينا إن معادلة الكشري اتضربت في مقتل، لكن بالنسبة لناس كتير من رواد ميدان الجيزة طبق أبو عماد لا يعلى عليه سواء في أسعاره اللي في متناول الجميع، أو في الكمية والجودة، لكن بالنسبة لينا وللناس اللي بتدور على طبق كشري مخدوم ويعمر الدماغ فأبو عماد أحسن واحد يشبعك بس مش أحسن واحد يدخل في عالم كييفة الكشري.
رقم أبو عماد 02 35728896
3- الونش
الونش من كتر ما سمعنا عنه وعن جماله وحلاوته وعظمته روحناله، في 17 شارع المحطة، الجيزة، مشينا مسافة محترمة من ميدان الجيزة لموقعه، في الأول اتصدمنا بحجم المحل اللي مكنش شبه تصوراتنا، كمان استغربنا إن مفيش ناس كتير، لكن لما الأكل جالنا فهمنا السر، طبق الكشري عنده أغلى من بره للأسف، مقارنة بزيزو اللي على أول الشارع، هو صارف على المحل كتير لكن الخدمة اللي بيقدمها مش مناسبة لسعر طبق الكشري عنده خاصة لو عيلة اللي هاتكل.
الكشري عنده تمام ومظبوط فعلًا، رغم الضجة وشهرته بين أوساط المطربين الشعبيين زي الليثي وعدوية لكن رهانه على إنه الكشري عنده مكون من 13 عنصر وإن اللي عنده هو الكشري بجد مش زي بره، وإنه رقم واحد مش حقيقي أوي بعد التجربة، كشري الونش في 17 شارع المحطة في الجيزة، تليفوناته لخدمة التوصيل 0100821545517 – 35717359 – 35730543
4- الإمبراطور
فيه مناطق كتير مظلومة بمحلاتها، يعني تلاقي منطقة عبقرية، بس ما فيهاش محل كشري يعمر الدماغ، زي الحسين مثلًا، أو تلاقي محل بس مش قوي أوي، يا دوبك موقعه وندرة وجود المحلات الحلوة جمبه بتديه ميزة، وده اللي حاصل بالظبط مع الإمبراطور، للناس اللي في محيط المنيرة وقصر العيني والسيدة زينب، صحيح قدامهم اختيارات، لكن مش كتيرة أوي، موقعه مميز في شارع بورسعيد واللي من عنده تبص تشوف جامع السيدة زينب، المحل مكون من ثلاثة أدوار، مش صغير،ومش ضخم جدًا، الخدمة هناك لا بأس بها، لكن الكشري مش بقوة الموقع، نقدر نديه متوسط، مع ذلك الناس أذواق يمكن لما تجربوه تحسوا إنه أجمل من أي محل تاني.
كشري الإمبراطور في 329 ش بورسعيد. السيدة زينب رقمه 23963634
5-هند
في المناطق الشعبية محلات الكشري أكتر من البني آدمين، والذواقة هناك عارفين طريقهم، وفي إمبابة عتاولة كشري زي أبو هشام وأشرف والمؤمن وهند، الأخير ده بقى أكتر واحد مبهر فيهم من ناحية التخديم على الكشري وعلى المكان اللي الناس بتاكل فيه، كشري هند صارف كتير وبيخدم بسرعة ومستوعب الأعداد والأذواق اللي داخلة ليه واللي ما فيش حد فيهم بيهزر.
صحيح زحمة جدًا والطلبات كتير لكن طلبك هيجيلك بسرعة جدًا وباهتمام وما فيش حاجة هاتنقصك، كشري هند لطيف للناس في إمبابة وعاوزة تاكل كشري معقول، طعمه كويسة وكميته كبيرة، وسعره حلو، يبقى هند طبعًا، شبعنا جدًا لما روحنا عنده وكنا راضيين عن الطعم والخدمة إلى حد كبير.
محلات كشري كتير اسمها هند، لكن هند اللي نقصده له فرعين اتنين بس، واحد في شارع المدينة المنورة في إمبابة والتاني بين الجنانين في الوايلي بالعباسية، صحيح مجربناش الأخير لكن الريفيوهات عنه بتقول إن الناس مبسوطة جدًا منه، لو في محيط إمبابة وجعانين عليكم وعلى هند على طول بدون تردد.
كشري هند مالهوش رقم واضح في إمبابة، أما بقى فرعه اللي في العباسية فرقمه 01127603064
6- الحلو
رغم الزحمة الشديدة والكثافة السكانية العالية في شارع فيصل، إلا إن محلات الكشري الحلوة مش مكافئة لطول الشارع وعدد سكان المنطقة عمومًا، من المحلات القليلة اللي عليها اقبال كبير هو كشري الحلو، في 194 شارع الملك فيصل، اللي جرب الحلو هايعرف إنه مشهور جدًا بالطواجن بتاعته واللي بتتفوق على طبق الكشري عنده بجداره.
مشكلة الحلو إنه مع الضغط والزحمة الجودة تراجعت شوية، طعم الدقة اتغير ومبقاش أحسن حاجة زي الأول، والمكرونة زادت شوية في الطبق، لكن عموما يظل من أفضل الأماكن اللي ممكن تاكل فيها طبق كشري حلو في فيصل.
تليفونه 0237413785
7- زمزم
فرعين اتنين بس لزمزم، منهم واحد حديث نسبيًا في الدقي، لكن نقدر نقول إنه محل بيحاول يقول حاجة ويحجز لنفسه مكان، مش بالجودة اللي ما فيش زيها لكن بالمواقع الحيوية جدًا، والطعم اللي يرضي واحد مش لاقي غير زمزم قدامه.
مواقع زمزم استراتيجية فوق الوصف، أولهم الفرع المشهور بـ “زمزم وسط البلد” في 1 شارع 26 يوليو، وتانيهم في ميدان الدقي، تحديدًا في 113 شارع التحرير، المكانين دول كفيلين مع أقل قدر من الجودة والمجهود يخلوا أي محل كشري ياخد مكانه على الخريطة وده اللي عمله زمزم، جودة مرضية في مواقع مميزة، مع شوية مآخذ، لو ظبطها هيكون في المقدمة.
الدقة عند زمزم مش بتكيفنا 100% خفيفة شوية، ومحتاجة تتقل علشان تمزج الناس، الشطة معقولة، الصلصلة محتاجة تتدلع شوية، غير كده ممتاز خصوصًا فريق العمل فرع الدقي، اللي لاحظنا إنه متعاون وخدوم جدًا جدًا، وحتى الأطفال الصغيرين بيلاعبوهم و بيرحبوا بيهم بشكل خاص عكس كتير من المحلات.
فرع زمزم في وسط البلد 01021540155
8- أبو طارق
الصيت ولا الغنى، هو ده بالظبط اللي نقدر نقوله عن أبو طارق، زمان كنا بنعدي وإحنا مبهورين جمبه، الريحة والمشهد المهيب للمحل العملاق، الشهرة الكبيرة وكل التفاصيل دي خلتنا نحس إننا قدام عملاق الكشري في مصر، لكن للأسف الشديد، مع الوقت ومع التجارب المتتالية نقدر نقول إن أبو طارق مستحيل يكون رقم واحد ف مصر، رغم أنه مطعم قوي ومميزة والكشري فيه حلو.
في 16 شارع معروف أكلنا تقريبًا في كل الأدوار، وفي كل مرة كان أملنا الانطباع يختلف، طبق كشري معمول على عجل، دون حب واهتمام، وما فيهوش الشيء اللي يرجعك مخصوص عشانه مرة تانية، غير إن الكمية مقارنة بالسعر قليلة جدًا جدًا، وده مش بيحصل في باقي محلات الكشري اللي جربناها قبل كده، اهتمامه بديكور الأدوار الخمسة أكبر من اهتمامه بطبق الكشري نفسه للأسف واللي حسينا إنه أصبح بيستهدف فئة معينة من العرب والأجانب والسياح، عمومًا اللي حابين يدوقوا طبق كشري لأول مرة لكن بالنسبة للكييفة، فهو مش أفضل مكان للكشري.
رقم أبو طارق 02 25775935
9-الزعيم كوبري القبة
عارفين المعادلة المستحيلة، الزعيم عملها في كوبري القبة، اماكن مريحة، طبق كشري معتبر، شطة ودقة يردو الروح، كميات معقولة، خدمة كويسة، الميزة كمان فيه إنه بيحقق الاسم اللي بترفعه معظم محلات الكشري ومابتعملش بيها إنه يكون “حلواني”، عليه شوية أم علي ورز بلبن يغسلوك من جوا بعد شوية الكشري المحترمين عنده، من الآخر كشري كويس بسعر معقول، محتاجين بس فريق العمل عندهم يحسن معاملته شوية مع الزباين.
عنوانه 10 ش الشيخ حسونة، حدائق القبة، محافظة القاهر ورقمه 0109 625 5755
10- الرحماني شبرا
تقريبا أي حاجة اسمها الرحماني بتبقى حلوة، سواء سوبيا الرحماني في السيدة زينب أو كشري الرحماني في شبرا، رغم إن الاتنين ملهمش أي علاقة ببعض، لكن الطعم الجميل بيجمعهم، في كشري الرحماني، ناس كتير بتعتبره من أفضل الاماكن اللي ممكن تاكل فيها كشري، لذلك قررنا إننا نبتدي بيه قايمة أقوى عشر محلات كشري بعد ما خلصنا قايمة المتوسط، القعدة جميلة والمكونات مظبوطة، الدقة والشطة مظبوطين، المكان مبهج وفريق العمل مهتمين بالزباين، لذلك من بين محلات الكشري في شبرا بنرشحلكم الرحماني
عنوانه عشان جوجل خرايط مايتوهكش، على شارع شبرا الرئيسي بجوار استديو موريس، محافظة القاهرة التليفون
01205837746
11- حلاوة زمان
عارفين المليونير اللي كان في الواد سيد الشغال اللي مكنش شكله غني ولا أي حاجة، وكل ما يعدي من جنبه يقوله “إنت إيه اللي جابك هنا” هو دا بالظبط اللي كنا حاسين بيه تجاه كشري حلاوة زمان، طيب عارفين صدمة الواد سيد الشغال لما عرف إن الراجل دا مهم جدا وحد مش عادي؟ هو دا برضو اللي حسينا بيه أول ما عرفنا إن حلاوة زمان هو أفضل كشري بشهادة سكان شارع فيصل، على مستوى الشارع واللي عنده ميزة مش عند باقي المحلات وهي إنه بيسوي الكشري بالبخار .
عمرنا ما تصورنا إنه ممكن يكون بالعظمة دي، بعد زيارتنا عرفنا فعليا إن الأمور مش دايما بالظاهر، المحلا شكله متواضع، صحيح واسع، لكن مش بيبرق زي باقي محلات الكشري، تحسه قديم شوية والناس اللي واقفين فيه شبهه تحسهم كبار ومخضرمين، كشري حلاوة زمان من محلات الكشري اللي واخدة 4.7 على جوجل خرايط باعتباره واحد من أفضل الأماكن اللي ممكن تاكل فيها كشري، وهو فعلا اسم على مسمى “حلاوة زمان”.
475 ش فيصل، فيصل، الجيزة
الهاتف: 0235856996
12- أشرف
عارفين الجملة اللي بتقول “أنا عامل دماغ بلدي” هو دا بالظبط اللي حسينا بيه واحنا خارجين من عند أشرف في امبابة، واللي بنعتبره أقوى محل كشري في المحيط هناك، زحمة شديدة، ناس كل الطبقات بتاكل، وهو مابيعملش غير إنه يقدم طعم حلو ورائع للجميع، أكلنا عنده في أوقات الذروة في الأعياد وفي الأيام العادية وفي كل الأوقات مخذلناش وخرجنا مبسوطين جدا بدماغ كشري على حق سواء الأجواء أو الطعم اللي ظابطه بجد أو بالسعر اللي ممكن يشبعك على الآخر حتى لو مفيش في جيبك اكتر من 10 جنيه.
كشري أشرف 0233559983
13 المجنون
من الاماكن اللي بنرشحها للناس اللي بتحب أجواء محلات الكشري اللي على حق، عارفين الناس اللي خالعة دماغها وعاوزة تعيش وتستمتع مع طبق كشري في أجواء شعبية بحتة تروح عند المجنون، دي جي عالي، أضواء، ألوان، أجواء كشري صميمة وطعم حلو وريحة ترد الروح.
أكتر حاجة مميزة عنده ماتفوتهاش طاجن المكرونة بالفراخ، وأكتر حاجة بسطتنا عنده هي الفصلة اللي بيتعمد يفصلها للزباين، فلو مش بتحب الأجواء المجنونة، ننصحك ماتروحش عند المجنون.
عنوانه 57 ش الملكة، فيصل، الجيزة
تليفونه 0237235151
14- زيزو
في شوية أماكن كدا من الآخر لما بنحب ناكل طبق كشري نضيف واثقين في طريقة عمله وإنه مظبوط بنروح من غير تفكير ولا قلق إن المستوى يكون قل أو حاجة في الطبق اتغيرت، لان الشغل ماشي في الاماكن دي بطريقة ستاندارد، دا اللي حاصل في فروع كشري زيزو، في أي وقت هاتروح هاتلاقي خدمة كويسة وسعر معقول وكشي كويس جدا، لو معدتك قوية و بتحب الكشري هاتستمتع به وهاتشبع عنده، يمكن أكتر فروعه اللي ليها روح هو فرع المنيل، ورواد الفرع دا بالذات عادة بيخلصوا أكل عنده وينزلوا يحلوا بأيس كريم من عند الجوكي، أما باقي الفروع فبتوفر ميزة مش موجودة في كتير من محلات الكشري وهي ميزة الفطاير والبيتزات اللي بتتعمل بحرفية عالية جدا، واللي رواد المكان بيحبوها زي ما بيحبوا الكشري بالظبط، الميزة دي بتخدم الأصحاب اللي أذواقهم مختلفة واللي بيقدروا ياكلوا حاجات مختلفة في نفس المكان.
زيزو له أكثر من فرع في الجيزة في شارع البحر الأعظم، وفي شارع دمشق في مصر الجديدة 01096255755، ومدينة نصر 01274329999 وشارع المحطة في الجيزة غير فرع المنيل الي اتكلمنا عنه.
15- – توم آند بصل
دي سلسلة محلات، عرفت تحط رجلها بقوة في السوق، أقوى “ورد” أو بصل دوقناه في حياتنا جوا محل كشري كان في توم ان بصل، الطبق طبق، والكمية محترمة، والوجبة تسد معاك فترة محترمة، مشكلتنا الوحيد والازلية مع توم أند بصل هو الدقة، اللي مش قادر لحد دلوقتي يدلعها، وبالتالي طبق الكشري عنده جد زيادة عن اللزوم، محتاج يدلع بشوية مزازة أكبر تليق باسم المحل وقوته وفروعه، والخدمة المميزة جدا جواه، واللي بتعرفك حقيقي يعني ايه تدخل محل تحس إن اللي فيه مهميتن يريحوك ويشبعوك.
النظافة الشديدة خلتنا نحطه في الخمسة الأوائل فروعه موجودة في المهندسين، وطريق مصر إسكندرية الصحراوي، وشبرا، ومدينة الرحاب، ومدينة نصر، ومساكن شيراتون، ووسط البلد.
رقمهم المختصر 16405
16- سيد حنفي
في آخر ريفيو عملناه عن أحسن مطاعم كشري، رشحنا سيد حنفي باعتباره رقم واحد في كل حاجة، وباعتباره كنز مدفون محدش يعرف عنه حاجة، صحيح هو كويس لكن يؤسفنا نقول إنه مبقاش رقم واحد، ودا رغم السباق العنيف اللي دخله سيد حنفي مع نفسه ومع باقي المحلات، واللي حاول يجتهد فيه على قد ما يقدر بأفكار مبتكرة وجديدة أبسطها فكرة اللبان والمنديل مع المعلقة المغلفة اللي بتتبعت مع الدليفري، شايفينهم مجتهدين وبيحاولوا فعلا، وبيتوسعوا بنظام إدارة محترم، وبقى ليهم تواجد على مواقع التواصل الاجتماعي والتطبيقات الخاصة بتوصيل الأكل، لكن زي أي حاجة بيحل عليها التطوير بتتغير روحها، أكتر من مرة روحنا عنده لاقينا جالنا الكشري بارد، الكمية قليلة مقارنة بالسعر، صحيح هو نجح يحافظ على طعم الكشري، ومازال مش بيهزر، ولسة نسبة المكرونة والرز والعدس فيه حلوة، وبـ يحط لك مع الطبق ليمون.
من الحاجات اللي افتقدناها في سيد حنفي الجو الحميم، الأكل السخن، بقى شبه أبو طارق شوية، كأنك في مؤسسة رسمية، مش مكان بتحبه ويحبك، طبق الكشري عنده بـ 9 جنيه ومعاك لـ 15 و22 جنيه.
صفحة الفيسبوك
رقمه المختصر 16920
17- كشري التحرير
كشري التحرير في حتة خاصة جدا لوحده، هو أكثر سلسلة محلات قادرة تحافظ على سر الطبق المحترم، وقادرة تحافظ على التوازن بين النسب، وعلى الطعم عموما وعلى نكهة معينة مش هاتحسها غير عنده، غير مستوى النضافة اللي بشكل أو بآخر أفضل من محلات كتير، صحيح مش أحسن حاجة في الدنيا لكنه بالمقارنة بأماكن تانية هو الأفضل بالتأكيد.
التحرير أكتر محل كشري في مصر برأينا عارف يمسك نفسه ويوازن مع بعض المآخذ على سرعة الخدمة جوا المحل مقارنة ببرا المحل، يعني لو طالب دليفري ممكن يوصلك أسرع من وصوله ليك جوا المحل ودا شيء غريب جدا بالنسبة لينا، لكن يشفعله الطعم المحترم والدقة والشطة اللي قادرين يعدلوا دماغنا ويحسسونا بسعادة الكشري الحقيقية رقمه 19719
18- السني
عارفين العبارة اللي بتقول يوضع سره في أضعف خلقه؟ أهو دا الحال بالظبط في “كشري السني” اللي في شارع سعد زغلول الجيزة، واللي بتمشيله حوالي خمس دقايق من محطة مترو الجيزة على رجلك، في ناس بتقول إن كشري السني تاني أحلى حاجة على الكوكب من فرط حلاوته، محل عمره أكتر من 45 سنة، ومساحته ماتكملش 10 متر.
لما بتدخل عند السني فانت بقيت خاضع لشروطه، اللي أولها طريقه غرفه الكشري، السني بيغرف الكشري بإيده، كبشة مكرونة على كبشة رز على كبشة عدس والصلصة بالمعلقة.
اللي بيروح للسني بيفضل كتير واقف قدام سر لطامطم اللي بالخل عنده، وناس كتير حاولت تعرف عاملها إزاي، معرفتش، المواعيد مش ثابته علي حسب ما بيخلص وهو له فرعين جمب بعض ساعات يخلص علي ٤ أو ٥ مساءا وساعات ٨ مساءا، أضمن وقت بيكون فاتح اكيد من ١٠ ص ل ٤ عصرا.
مالهوش في أجواء الإنترنت، ولا صفحة ولا موقع ولا يحزنون، تليفونه للدليفري 01013996514
19- الخديوي شبرا الخيمة
الخديوي مخذلناش، صحيح المحل ده مش قريب من وسط البلد، و روحناه أول مرة بالصدفة، من 8 سنين في منطقة المؤسسة وراء محطة شبرا الخيمة، لكن اكتشفنا إنه من أجمل الأماكن اللي ممكن تاكل فيها كشري، و من المحلات القليلة اللي تخرج منها وإنت حاسس إنك أكلت كشري بجد وتتمنى تروح له ثاني علشان تجرب أكتر لأنك مش هاتقدر تجرب اكله كله في مرة واحدة، مازال الكشري مظبوط، ومازالت التجربة مميزة، مايعيبهوش غير مشاكل الديليفري اللي بالجملة واللي محتاجة تتحل، صحيح هم عملوا لنفسهم صفحة على فيسبوك.
للتواصل لكن نصيحتنا الأثيرة لو عاوز تاكل كشري، روحله لحد عنده، ماتهينهوش وتجيبه لعندك.
20- أبو سليمان
مبدأيا هو في اختلاف إذا كان اللي بيقدمه أبو سليمان، كشري أو مكرونة، بس إحنا كناس خبرة في الكشري مانقدرش نقول على الطبق المعجزة اللي بيتقدم هناك غير إنه كشري إبن كشري ومن عيلة الكشري رأسا، المحل الصغير اللي في 2 شارع أرض شريف – في منطقة شارع عبد العزيز في العتبة قادر يغير مودك، يقنعك إن الكشري ممكن يتاكل وانت واقف، وممكن تستنى دورك عشان تاخد الطبق، وممكن كمان تاكل في الشارع بس تبقى جمبه وخلاص، أصل لجل الورد يتسقي العليق، في رأينا أبو سليمان هو رقم 1 لعشاق الكشري رغم إن مكونات الطبق مختلفة لكن الاكيد إنك هاتخرج من عنجه متكيف وسعيد وحاسس إن الدنيا حلوة.
مقترح
معالم وسياحة
زاوية أيدكين: حكاية أول خانقاه مملوكية في قلب القاهرة
اثار مملوكية في مصر خانقاه في القاهرة +2
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
