The Definitive Guide to Living in the Capital , Cairo , Egypt

لما نتكلم على الأكل فى القاهرة، الموقع الجامد يقدر يخلق الفرق. مطاعم كثير بـ تقدم نفس الأكل باختلافات بسيطة، بس حتى فى الحالة دى، لما الأكل يكون معاه خدمة كويسة ومنظر حلو، كله بـ يبقى تمام.

“كوى لاونج & ريستوران – Koy Lounge & Restaurant” قرر يفتح فرع جديد له بعد فرع المهندسين، تحديدًا فى ذا بلاتفورم المعادى. مع ديكوراته اللطيفة باللون الرمادى، والأبيض والأصفر، كوى بـ يقدم أطباق رئيسية، وسلاطات، ومقبلات، ومكرونات وبيتزا بجانب السوشى.

وصلنا الجرسون سريعًا لمكان ترابيزتنا وسلمنا المنيو العادية ومنيو السوشى. طلبنا طبق ديناميت ميكس (79 جنيه) جمبرى تمبورا مع السلامون وصوص الكريمة، ونصف طلب من الكريسبى رولز (45 جنيه) جمبرى تمبورا مع الأفوكادو وعليهم صوص ترودو.

بالنسبة للسوشى، الموضوع كله بـ يتوقف على قد إيه المكونات طازجة، وصحيح الجمبرى والسلامون طعمهم فعلاً كان طازج، راب طحالب البحر كان للأسف صعب المضغ، الكريسبى رولز الملفوفة فى أرز محمر، كان فيها نفس المشكلة، ومقرمشة بزيادة عن المتوقع من “كريسبى” رول.

نروح على الأطباق الرئيسية، اللى طلبنا منها كوى فيليه (100 جنيه) فيليه اللحم على فرش من الجرجير، وجبن البارميزان وصوص البلسميك، ويكون متوسط الطهى، ومعاه طبق بيف مشروم (96 جنيه)، عبارة عن فيلية اللحم مع مشروم طازج مطبوخين بدرجة أقل من المتوسط.

الكوى فيليه قدر يحافظ على درجة من الرطوبة رغم أنه مطبوخ أكثر من المتوسط، أما جبن البارميزان مع خل البلسميك عملوا مزيج لذيذ، بس الملاحظ أن كمية الجرجير كانت كثيرة. الفيليه كان معاه بطاطس محمرة مقرمشة وخضار سوتيه متبّل كويس.

البيف مشروم فيليه على الناحية الثانية، كان عالمى، درجة الطبخ كانت مضبوطة، وده عليه عامل كبير فى مصر، والخليط البسيط بين مرقة اللحم مع المشروم، قدروا يخلوا الطبق فعلاً ممتع. الطبق كان معاه نفس الخضار السوتيه وكمية من الأرز الأبيض؛ بجد يستاهل ترجع كوى علشانه مرة ثانية.

مع موقع ممتاز، وكمان خدمة كويسة وسريعة، كوي يعتبر واحد من أحسن المطاعم الموجودة فى ذا بلاتفورم. كمان دلوقت أحسن وقت ممكن تروح فيه، الجو منعش ولطيف الصبح مع منظر النيل الرائع، وبالليل مش برد للدرجة.