The Definitive Guide to Living in the Capital , Cairo , Egypt

المحل كان بـ يلفت
نظرنا دائمًا وإحنا معديين من شارع رمسيس وماشيين في إتجاه غمرة والعباسية، الشارع
زحمة وطريق سريع، والمكان ما يشجعش أنك تركن أو تقف حتى 5 دقائق بالعربية علشان
تلقي نظرة، رغم أن المحل من بره شكله مغري جدًا وتصميمه أنيق واسمه مش محتاج
تعليق. عرفنا من أصدقاء لينا أن «كوكو الحاتي» هو الكبابجي المفضل بالنسبة لهم،
وأنه عنده شيفات محترفة لهم صنعة وخلطة مميزة للمشويات والحمام المحشي. فقررنا
نكتشف المحل المعلوم المجهول بالنسبة لنا، وكانت تجربة مش بسهولة تتنسي.

قدام المحل الوقوف
بالعربية كان صعب لكن مدير المحل كان واقف بنفسه بـ يستقبل الزبائن وبـ يسهل عملية
الركنة رغم أن ده مش دوره، بس علشان هو عارف صعوبة الوقوف في شارع
“رمسيس” الرهيب. دخلنا المطعم المكون من دورين. المطعم شيك وديكوراته
ألوانها أحمر غامق رقيق جدًا وفيه مرايات على الأعمدة الفاصلة بين الترابيزات اللي
عددها مش كبير (حوالي 8 ترابيزات) بس الجو عمومًا هادئ ومالوش دعوة بالدوشة اللي
في الشارع بره. ولاحظنا أن المكان نظيف جدًا ومعتنى به، ومايفرقش كثير عن شكل
المطعم الأنيق من الخارج.

لما شوفنا المنيو
اتفاجئنا أنه مش بس بـ يعمل مشويات وحمام زي ما كنا فاكرين، أنما طلع عنده مطبخ
مأكولات بحرية متكامل، وبـ يقدم كل أنواع السمك والجمبري وشوربات السي فوود
وبأسعار أقل من المحلات المتخصصة في الأسماك زي «كاستن» و«البرج»، لكن زيارتنا
المرة دي كان هدفها الكباب والكفتة وقولنا نجرب البحريات مرة تانية. منيو المشويات
بسيط وواضح، كباب (155 جنيه للكيلو) وكفتة (115 جنيه) والكيلو المشكل (120 جنيه)
وموزة ضاني بالبطاطس (60 جنيه) وممبار (66 جنيه للكيلو) وحمام محشي (54 جنيه للجوز
وواضح أن لازم يتباع بالجوز) وفيه كبد وكلاوي وفراخ مشوية وشيش طاووق (84 جنيه
للكيلو) ومحاشي وأرز بالخلطة ومكرونة فرن وكل أنواع السلاطات. فيه كمان ساندوتشات
لحوم وأسماك بـ 10 و15 جنيه حسب الحجم.

طلبنا كباب وريش
وكفتة ضاني وطبق شيش طاووق وأرز بالخلطة وسلاطات بابا غنوج وطحينة وطماطم وطبق
مشهيات كده فيه بتنجان وطماطم مخللة وبطاطس بالكاري وكان حلو قوي. رغم أن السلاطات
والأرز نزل الأول على الترابيزة وقعدنا نأكل منها بالعيش لحد ما حسينا أننا شبعنا
ومش هـ نقدر ندوس في كمية اللحوم اللي هـ تنزل، لكن الشيش طاووق لغى الفكرة دي
تمامًا وحسينا قد ايه الفراخ فريش ومشوية على نار هادئة بس كانت ناقصة شوية طعم،
ودي مش مشكلة قوي طول ما جنبنا ملح وفلفل ومقبلات. الكباب والكفتة هم درة المكان،
طعم خرافي ما ذوقناش زيه من زمان، بالذات الريش وقطع الكباب بتتبيلتها العبقرية،
والتسوية المثالية، نادرًا لما تلاقي كبابجي بـ يعمل كباب مستوي كويس ولون اللحمة
مش غامق أو محروق، الكباب عند «كوكو» لونه فاتح وجميل وشكله يفتح النفس، والكفتة
حلوة بس شبه اللي جربناها في محلات تانية كثير. والكيلو المشكل هناك بـ يكون كباب
وكفتة من غير طرب، بس أكيد الطرب هـ يكون جامد مادام بـ يعمله نفس الشيف. السلاطات
حلوة (أي نوع بـ 3 جنيه) والأرز بالخلطة (7 جنيه) كويس بس الكمية قليلة قوي في
الطبق.

الخدمة في «كوكو»
أكثر من ممتازة، غير أنها سريعة ومحترفة، أنما كمان دمها خفيف رغم الملابس الرسمية
للجرسونات، والترحاب والإهتمام الحقيقي خلانا ننسى أن المشويات إتأخرت شوية في
النزول، وقررنا أننا لازم نروح مرة تانية ونجرب باقي المأكولات بعد ما اتصاحبنا
على كل العاملين بالمحل تقريبًا.