The Definitive Guide to Living in the Capital , Cairo , Egypt

رنا شرف

لو بتعشق الأكل اللبناني وبتدور على تجربة مميزة تجمع بين الطعم الأصيل والأجواء الحلوة، يبقى لازم تزور مطعم قلب بيروت اللي فتح أبوابه في قلب مصر الجديدة. المطعم ده بيقدّم تجربة لبنانية 100% تستحق التجربة.

وأحنا ماشيين في روكسي، لفت نظرنا مطعم “قلب بيروت” الموجود في  شارع القبة بمصر الجديدة. الاسم بيدل من البداية على الروح اللبنانية. المكان صغير لكن دافئ ومثالي لخروجة أصحاب أو حتى لقاء عائلي بسيط. الأجواء هناك بتديك إحساس بالراحة، والأسعار معقولة جدًا مقارنة بجودة الأكل اللي بيقدموه.

بدأنا رحلتنا مع المقبلات، وأول حاجة جربناها كانت السمبوسك. مقرمشة ولذيذة، والأحلى إنها مش مليانة زيت، وسعرها 55 جنيه بس. كمان جربنا التبولة، وكانت طازة ونكهاتها متوازنة، وسعرها 40 جنيه.

لما دخلنا على الأطباق الرئيسية، طلبنا بيتزا شاورما فراخ. الكمية كانت سخية جدًا، والطعم لذيذ، وسعر الحجم الصغير 180 جنيه. لكن المفاجأة الحقيقية كانت في الشاورما اللبنانية، اللي العيش بتاعها كان مميز جدًا ومن صناعتهم الخاصة، وسعر الساندوتش 50 جنيه.

في المجمل، التجربة كانت أكتر من رائعة، وأكيد هنكررها. مطعم “قلب بيروت” مش بس مكان للأكل، لكنه تجربة بتاخدك في رحلة للمطبخ اللبناني بكل تفاصيله.

وأخيرًا..
لو نفسك في أكلة لبنانية أصيلة، “قلب بيروت” لازم يبقى وجهتك الجاية!