The Definitive Guide to Living in the Capital , Cairo , Egypt

مافيش أجمل من تجربة أنك تكون جعان في الشغل فتطلب حاجة سخنة تدفيك وتشبعك، والحقيقة إننا لما شفنا الصور اللي فيها أكل “عجينة” ماقدرناش نقاوم خالص، حتى لو كان الشكل أحلى من الحقيقة.

عجينة فاتح من زمان في الزمالك، وكنا عملنا له رفيو قبل كده. بس لاقينا أكثر من حاجة جديدة في المنيو، وقولنا نجربها.

عجينة المنيو بتاعه غني جدًا ما بين أنواع الفطائر اللي بيقدمها، سواء مشوية أو مقلية مربعة أو رول أو الجديد كورة صغيرة بكل المكونات اللي ممكن تتخيلوها، بس المفاجأة الوحيدة بالنسبة لنا أننا كنا فاكرين العجينة هتكون أشبه لعجينة البيتزا أو العيش من شكل الصور واتفاجأنا أنها عجينة فطير بالرغم أن الطعم كان حلو إلا أن العجينة نفسها محتاجة يكون فيها توابل أكتر.

كمان عجينة بيقدموا ساندويتشات، فحبينا نجرب حاجات مختلفة خاصة أنهم كانوا عاملين عرض على بعض منتجاتهم لو طلبت ساندوتش يجي معاه واحد تاني هدية، فطلبنا رول هوت دوج (25 جنيه)، وساندوتش كبدة (7 جنيه) وبطاطس محمرة بنفس السعر، وفطيرة نوتيلا (30 جنيه)، وأخر أختراع Box Balls بـ 25 جنيه.

رول الهوت دوج كان مكون من بصل وفلفل وجبنة وهوت دوج وده كان أجمل حاجة في تجربتنا، صحيح هو مش شبه الكورن دوج زي ما كنا متخيلين، بس هو كان لذيذ وطعمه حلو، برغم أن بسببه الأوردر اتاخر ساعة زيادة عن معاده لأن ماكنش عندهم هوت دوج.

كمان كور العجينة كان طعمها كويس برغم أنها كانت هتبقى أحلى لو جواها جبن أكتر وتوابل أكتر لأننا ماكناش حاسين بأي طعم مميز. البطاطس كانت كويسة بس طرية شوية مش مقرمشة وحجمها صغير، أما فطيرة النوتيلا فكانت أجمل حاجة، النوتيلا كانت كتير وطعمها يجنن.

عجينة بشكل عام أكله كويس وإن كان متمكن أكتر في الفطير، ونتمنى أنهم ما يتأخروش في توصيل الطلبات كده تاني، ساعتين توصيل شيء مش مقبول أبدًا.