The Definitive Guide to Living in the Capital , Cairo , Egypt

أغلب المطاعم وأماكن الكل المميزة في رمضان بتكون زحمة. وعلشان تروح تاكل فيها لازم تحجز. ده بينطبق على “طبلية بلدي”، اللي روحنا جربناه أكله وجايين نقول لكم تجربتنا.

المكان مش معروف لكتير. والحقيقة مشفناش حتى يافطة فيه. لازم الحجز قبل ماتروح، وده عن طريق التليفون أو صفحة فيسبوك. المحل قطعتين، والمطبخ مكشوف. وبيتقدم لك الأكل بيتي. كل يوم عندهم منيو مختلف تختار منه. يعني لازم تراجع الأول عندهم إيه وبعدين تحجز.

وصلنا المكان وكان زحمة جدًا. ورغم الضغط الشديد، كانوا خلية نحل شغالة. وابتسامتهم سابقة أي حاجة. الطلب كان عبارة عن بطاطس بالفراخ (55 جنيه). البطاطس كانت مطبوخة بشكل صحى، والزيوت قليلة فيها وصحية. عجبتنا جدًا. والفراخ كانت حلوة رغم إنها ناشفة شوية. وكانت محتاجة تتحمر بشكل أفضل.

كمان طلبنا مكرونة بشاميل (قطعة 35 جنيه). البشاميل كان كتير، واللحمة كانت محتاجة تزيد شوية. طلبنا طبق محشي (30 جنيه). كان فيه 7 قطع باذنجان، وقطعة كوسة وزيها فلفل. ماكنش فيه ورق عنب. بس عمومًا طعمه كان حلو.

طلبنا برضه قطعتين جلاش باللحمة المفرومة (15 جنيه القطعة). دي كانت أحسن حاجة في الأكل، وطعمها تحفة. العصير الطبيعي عندهم بـ 15 جنيه، وده غالي جدًا بالنسبة لأسعار وسط البلد في رمضان.

صفحتهم على فيسبوك.