The Definitive Guide to Living in the Capital , Cairo , Egypt

الأكل مزاج، وكل شخص له مود وحب لبعض الأكلات، ومهما كان مودكم في الأكل إيه، فمطعم صبحي كابر هيرضي كل الأذواق، ولأنه معروف بأكله المميز قررنا نروح ونجربه لأول مرة بعد التجديد ونقل المقر بتاعه من الشارع إلى مبنى على أعلى مستوى فيه 3 أدوار شغالين.

المكان بشكل عام ممتاز وهنتكلم عنه في نقط، أولها إنك لو رايح بعربية أوعى تركن بره، علشان السياس هناك معاملتهم سيئة، وكمان بياخد على كل عربية 20 جنيه، فيه جراج تبع المطعم تقدر تركن فيه، ورغم إننا سمعنا إن معاملتهم ماتختلفش عن اللي قدام المطعم لكن في الحقيقة مجربناش، تاني نقطة، المكان زحمة جدًا والترابيزات لازقة في بعض، بس مهما كان عددكم هتلاقوا أماكن تستوعبكم، أما فريق العمل، فنقدر نقول خلية نحل شغالين بكل طاقتهم، وينقصهم بس إنهم ياخدوا خبرة إزاي يتكلموا ويتعاملوا مع عملاء المكان بطريقة أرقى من كدة.

ندخل بقى على الأكل اللي بدأنا فيه بالشوربة، هي صحيح نزلت بعد الأكل بس مش مشكلة نعديها، وجربنا شورية لسان عصفور بـ10 جنيه، وكان طعمها حلو ومظبوطة، وشوربة كابر بـ10 جنيه، ودي بننصح أي حد بيحب الضاني يطلبها، لأنها معمولة بالضاني، وكمان هتلاقى جواها حتة ملبسة حلوة تمزمز فيها، أما شوربة الكوارع 31 جنيه، فدي حكاية تانية، متسبكة والشوربة تقيلة ومتخدم عليها صح، وتسلم إيد الشيف اللي عملها.

ودخلنا على المقبلات، وطلبنا ربع ممبار بـ33.5، وهو مش أحسن حاجة بس شغال، ومعاه محشي مشكل بـ21 جنيه، وبداية من شكله اللي تحسه مهروس أو كان مضغوط فطالع مش حلو، والطعم كمان ماكنش قد كده.

كمان طلبنا نص فراخ شيش بـ37 جنيه، وكانت تتبيلتها كويسة، ومتقطعة قطع حلوة تساعدك عى الأكل بسهولة، ولكنها ناشفة شوية ومحتاجين إنهم مايستعجلوش في التسوية، ومعاها كان ربع ريش ضاني بـ71 جنيه، وهنا بقى لو أنتم مالكمش في الضاني يبقى لازم تجربوا الريش دي علشان هتحبوا الضاني جدًا من بعدها.

ومن ضمن الطلبات اللي جربناها كمان، ربع لحمة باللية 71 جنيه، رغم أن اللحمة كانت مش كتيرة، بس كان طعمها يجنن وواخدة كده طعم حراق مديها لذاذة، ده غير بقى الملوخية السادة وكانت بـ22 جنيه، وأي حد لازم يروح أكيد هيجربها، لأنكم حتى لو مش بتحبوها هتحبوا طريقة تقديمها، والتقلية بتاعتها حكاية.

ومانسيناش نجرب طاجن العكاوي بـ111 جنيه، وده ممكن نقول فيه شعر، وخلينا نقولكم إن رغم إن دي أول مرة نجرب العكاوي إلا أننا بنشكر الظروف اللي خلتنا نجربها وننبهر بيها، تحسها كده مسكرة، وده علشان بيستخدموا فيها صلصة طماطم بشوربة حمام.

ونيجي بقى لطاجن الحمام بالفريك بـ53 جنيه، ناس كتير قالولنا ماتطلبوش حمام من صبحي، لكن كان لازم نجرب بنفسنا ونقول رأينا، أكيد مش هناخد برأي حد، وياريتنا سمعنا كلامهم، أسوأ حمام أكلناه في حياتنا كان عند صبحي كابر، الحمامة شكلها مش أحسن حاجة، ومش متحمرة، والجلد بتاعها يقفلكم، والفريك اللي جواها طعمه مش أفضل حاجة، وننصح المكان بتطوير جودة الحمام، أو يشيلوه من المنيو خالص.