The Definitive Guide to Living in the Capital , Cairo , Egypt

انتشرت في الفترة الأخيرة ثقافة الأكل الصحي، بالتزامن مع ده بدأت تظهر فكرة التخلي عن اللحوم ومنتجاتها. وبقى فيه أكثر من نظام أكل صحي. ونحب نقول لكل الملتزمين بالنظام النباتي PBD ولكل اللي عندهم حساسية من منتجات الألبان إليكم أخيرًا الخبر السار! مكان بيعمل أكل بلبن جوز الهند أو الصويا وكل منتجاته أو أغلبها طبيعي.

بنتكلم عن مطعم Sea Salt اللي المنيو فيه مش كبير، ما بين أصناف فطار ومخبوزات من القمح الكامل، أختارنا أكثر من حاجة علشان تكون تجربة متكاملة، اختارنا من المنيو سموزي بالتوت ولبن الجوز والأفوكادو واللي كان سميك وفيه طعم أقرب للموز شوية بـ 35 جنيه.

المهم من وسط السلاطات واللي هم 3 أنواع بس تقريبًا طلبنا سلاطة Sea Salt بـ 45 جنيه، ودي كانت أجمل حاجة كلناها هناك، وهي عبارة عن خس وجرجير وتفاح وبرتقال وصوص مسكر يعتبر بديل للهوني ماسترد نعتقد أنه فيه أفوكادو ومانجو وننصح أي حد أنه يجربها.

كمان طلبنا شوربة بـ 40 جنيه، وكل يوم نوع الشوربة مختلف وعلى حظنا كانت شوربة مشروم بالجنزبيل، كان طعمها هايل الحقيقة وقوامها كمان، لكن قطع المشروم كانت قليلة والعيش اللي جنبها كان ناشف جدًا وفيه قطع بصل مكرمل، ونعتقد أنه ناشف كده علشان نوع الدقيق.

أحتارنا جدًا نختار مكرونة ولا رافيولي واختارنا الأخير بلبن جوز الهند وعجين القمح الكامل، وحشو من الخضروات بـ 75 جنيه، ودي تقريبًا أغلى حاجة هناك، بس للأسف اتفاجئنا أنه جاب لنا 4 رافيولهات بس، تخيلوا! صحيح العجينة سميكة والطعم حلو، بس إحنا كنا جعانين الصراحة والكمية دي لا تغني من جوع خالص يعني، كمان جربنا براونيز بـ 30 جنيه، وقهوة موكا بـ 25 جنيه، والقهوة كان طعمها غريب شوية علشان بلبن جوز الهند، بس البروانيز كانت مفتقدة تمامًا للطعم، أو أنها تكون طازة، حسينا بخيبة أمل كبيرة قوي منها.

خلصت تجربتنا هناك وكنا نتمنى أننا نلاقي أصناف أكتر بأسعار متفاوتة، ويكون عندهم ناس بتفهم في مكونات الأكل أكتر من كده لما يكون أصحاب المكان مش موجودين، لأن الجرسون كان يفتقد للخبرة بأغلب المكونات في الأطباق.