The Definitive Guide to Living in the Capital , Cairo , Egypt

المهندسين كانت في وقت من الأوقات هي عاصمة الكافيهات والمطاعم، لكنها سابت الشرف ده لأماكن زي 6 أكتوبر والقاهرة الجديدة. لكن واضح إنها مصممة تفضل عاصمة للخروج، علشان ظهرت فيها أماكن مهمة زي بوكا ودسوقي أند صودا، وكمان نينوز بيكري وشيكاجو ريستوران أند كافيه، وأحدث مكان فيهم هو “ريبابليك-Republic” اللي لفت الأنظار.

ريبابليك فتح على شارع عبد المنعم رياض وهو متخصص في اللحوم والباستا، بس الغريب في الموضوع إن ديكوراته بتقول كلام تاني. ألوان المكان غالب عليها اللون الرمادي مع الكراسي التركواز والنجف والكتابة على السقف. الفكرة إن اختيار الكراسي مع تصميم الحيطان والصور الأبيض والأسود مش ماشيين مع السقف المرسوم بنظام الجرافيتي، وطبعًا مختلفة عن نوعية الأكل المعتمدة على اللحوم والباستا.

الموظفين هناك شاطرين جدًا وبيهتموا بكل تفصيلة. في الأول شرحوا لنا فكرة المطعم وإنهم بيعملوا كل حاجة بنفسهم في المطعم. جايز في ناس ممكن تشوف إن دي مبالغة بس أكيد حاجة حلوة إن الموظفين يكونوا فخورين بفكرة المكان ويروجوا لها.

شوية ووصل الجرسون ومعاه كاسات صغيرة فيها عصير فريش خوخ على عنب والمفاجأة إنه طلع كوكتيل تحفة، وقدموا لنا كمان سلة عيش وثلاثة صوصات: ثوم بالزبدة روعة وليمون مخلل مزز وصوص تالت ملوش أي طعم خالص.

المنيو محدودة شوية ومافيهاش تنوع، يعني فيها طبقين مقبلات مع شوية سلطات وستة أطباق رئيسية وخمسة أطباق باستا.

طلبنا من المقبلات سجق Merguez Sausage ثمنه (70 جنيه) وده عبارة عن بطاطس مهروسة من تحت مع صوص السجق المليان توابل وبهارات روعة وشوية شطشطة علشان توزن الطعم قصاد نكهة الفلفل الأحمر المسكرة. السجق كان مستوي كويس جدًا وواضح إن جودته عالية بس العيب الوحيد في الطبق كان شكل الطبق، يعني البصل المحمر كان مغطي السجق والطاسة السوداء والبوردة الخشب الخفيفة، وكمان الطاسة الشفافة اللي شكلها مش على المستوى.

تعالوا معانا نروح للأطباق الرئيسية ونبتدي مع البلاك سباجيتي سيف وود (120 جنيه)، وهو خلطة كاليماري وجمبري وبلح بحر وباستا وكلهم في صوص ليمون، والطبق ده له مزايا وعيوب هنقولها دلوقتي. مرة تانية لازم نتكلم عن شكل الطبق المتواضع اللي مش مبين جمال الطبق، وكمان الكاليماري كان مستوي بزيادة وصعب المضغ والأكل محتاج توابل، أما الباستا فكانت أقرب للنودلز. أما الحلو في الطبق إنه كان مستوي صح الصح ومليان سي فوود، وبعد لما رشينا شوية ملح وفلفل الموضوع اتحسن كتير.

جربنا كمان تي بون ستيك بالبلو تشيز وزبدة اللوز (200 جنيه). الستيك كان مستوي medium زي ما طلبنا ومعاه خضار مشوي بالثوم، وطبعًا البلو تشيز عملت شغل عالي مع الستيك. الفكرة إن جودة قطعة الستيك كانت أقل من المتوقع وصعبة المضغ شوية، وكمان ماحسيناش بطعم اللوز في الزبدة.

اخترنا من أطباق الحلو القليلة في المنيو ترايفل باشون فروت وأناناس (41 جنيه)، عبارة عن طبقة كيكة أسفنجية خفيفة عليها كمية كريمة مخفوقة محترمة ورشة عصير باشون فروت ومكعبات أناناس معلب. بصراحة الطبق كان أي كلام وشكله مش حلو وحسسنا إننا بناكل في 1998.

النهاية دي أحسن من أي شرح لتجربتنا في ريبابليك، المكان هناك باختصار عنده إمكانيات هايلة لكن محتاجة تتوظف صح. شكل الأكل وطريقة تقديمه كمان محتاج شغل أكتر وفكرة المكان محتاجة تظهر بشكل أوضح في المنيو. جايز الكلام ده حصل علشان إحنا روحنا في مرحلة الافتتاح التجريبي، والموضوع هيتحسن في المستقبل القريب.