The Definitive Guide to Living in the Capital , Cairo , Egypt

وسط عدد كبير من المطاعم الممتازة المغرية في كايرو فيستيفال سيتي، مغامراتنا مستمرة في مول التسوق الموجود في القاهرة الجديدة ومطعمنا المرة دي هو ذا إدواردز – The Edward's اللي بـ يقدم أكلات عالمية منتقاة وسط أجواء مميزة.

ديكورات المكان تشمل ممتلكات كثيرة خاصة بعائلة صاحب المكان -من الآلة الكاتبة بتاعة والده للجراموفون الخاص بجده ومطحنة القهوة الخاصة بجدته– وذا إدواردز يتميز في الحقيقة بأجواءه اللطيفة العتيقة بكنب أنتيكة وصور جرائد قديمة وموسيقى كلاسيك هادئة، المميز كمان هناك أن مساحة المكان الواسعة بـ تعمل جو هادئ خصوصًا مع ألوان الحوائط الهادئة والكراسي والترابيزات برسومات الورد، وده بـ يضفي على المطعم جو بسيط مميز كأنك قاعد في مكان تاريخي نوعًا ما.

ندخل على المهم، المنيو هناك متنوعة وتشمل أصناف شوربة ومقبلات وسلاطات وأطباق آسيوية وسوشي وساندويتشات، وإحنا ما كذبناش خبر وطلبنا من المقبلات باربيكيو وينجز (42 جنيه) ومن الأطباق الرئيسية سلامون بيستو (115 جنيه) وإيطاليان برجر (69 جنيه).

الباربيكيو وينجز بـ تُقدم في وعاء صغير ومعاها قفازات للاستعمال مرة واحدة، وكانت تتبيلتها ممتازة ومتحمرة صح الصح ومتغلفة بالسمسم وغرقانة صوص باربيكيو، كان ناقصها بس صوص الزبادي المشطشط أو صوص البافالو زي ما مكتوب في المنيو.

قطعة البرجر في الإيطاليان برجر المتغلفة بين عيش طازج لذيذ كانت معمولة تمام وميزتها أنها طرية وعصارية ويغطيها جبنة جودة سايحة لذيذة ومعاهم قطعة جبن جودة مقرمشة مع صوص مارينارا تحفة علشان اللمسة الجمالية الأخيرة، الطبق كمان وصل معاه بطاطس مقرمشة تتبيلتها ممتازة.

أما السلامون المشوي فلازم نحكي لكم عن تتبيلته الروعة وتسويته على نار هادئة وقوامه الطري، وكمان عليه بيستو فستق بس طعمه كان أقرب للريحان من الفستق، العيب الوحيد في الطبق كان البطاطس المهروسة اللي تحت السلامون، واللي صحيح كانت دسمة ومتماسكة بس طعمها كان غريب.

بعد نظرة سريعة على قسم الحلويات في المنيو، احتارنا بين تارت الفستق (42 جنيه) والنوتيلا بيتزا (38 جنيه) و"فوفة" فوندو (38 جنيه) –والاسم ده على اسم واحدة من أفراد عائلة إدوارد– وPain Perdu بـ (34 جنيه)، وفي الآخر طلبنا الأخير.

البين بيردو من الحلويات الفرنسية المكونة من قطعتين توست فرنسي مسكّر كبار ومتغرقين في الكريمة الإنجليزية الغنية بحيث التوست يطلع طري وفي نفس الوقت يحتفظ بقوامه، ومعاه بولة آيس كريم فانيليا كبيرة، وفوقهم كلهم صوص كراميل بـ يضيف طعم مميز للاختراع.

بعدها قررنا نطلب شيشة عنب (48 جنيه) فطلعنا للقعدة الأوت دور وكان الجو ثلج بصراحة، بس بعد حوالي نصف ساعة قدموا لنا بطانيات صغيرة إحنا والناس الموجودين، ودي فعلاً كانت مبادرة لطيفة من المطعم، الشيشة نفسها كانت ممتازة وفضلت مكملة معانا بقية اليوم.

خلصت أكلتنا اللذيذة بعصير ليمون نعناع هايل (22 جنيه) كان فعلاً مسك الختام، لو فيه حاجة ممكن ننتقدها أكيد هـ تكون الخدمة البطيئة، لكن مع جودة الأكل والموظفين الهايلين، كان من السهل نتغاضى عن المشكلة دي.