The Definitive Guide to Living in the Capital , Cairo , Egypt

مش عارفين إزاي عدى الوقت ده كله من عمر كايرو 360 وما عملناش ولا زيارة ولا
كتبنا مقال عن أي فرع من فروع مطاعم «دجاج تكا». طبعًا المطعم غني عن التعريف، لكن
اكتشفنا أن فيه ناس كثير عمرها ما جربت تكا رغم أنه دائمًا موجود بجوار المطاعم
الشقيقة التابعة لشركة أمريكانا زي كنتاكي وبيتزا هت، لكن «دجاج تكا» له زبائن من
نوع خاص وله طابع عائلي ووقور أكثر، علشان كده مش عليه إقبال كبير من الشباب،
وعامل ثاني مهم بـ يخلي الإقبال قليل أن المشويات بـ تحتاج 30 دقيقة على الأقل
علشان تكون جاهزة، وطبعًا أي حد عاوز أكلات سريعة أو تيك آواي هـ يفكر مرتين قبل
ما يدخل مطاعم تكا.

المطعم عمره أكثر من 30 سنة وهو واحد من منتجات شركة أمريكانا اللي موجودة
في الشرق الأوسط والدول العربية، وبـ يقدم المشويات وخصوصًا الدجاج المتبل بالطرق
الهندية والعربية وببهارات مميزة ممكن نعتبرها خلطة سرية ثانية زي خلطة كنتاكي.
لكن شكل وطعم الدجاج هنا مش زي أي مطعم ثاني، والأكيد أنه لازم يعجب أي حد مهما
كان ذوقه في الأكل.

زرنا فرع المعادي الجديدة الموجود في شارع النصر، وهو في دور علوي فوق مطعم
«بيتزا كينج»، الوقت كان متأخر وقت زيارتنا لكن المكان برضه كان مليان زبائن، وزي
ما قولنا في الأول؛ أغلب الموجودين كانوا عائلات أو رجال أعمال بـ يتعشوا عشاء
عمل، وما لاحظناش أي حد بـ ييجي يأخذ طلبات تيك آواي. المكان شيك من الداخل وأنواره
البيضاء الساطعة مريحة للعين، لكن الترابيزات والكنب مش مريح زي الموجود في
باقي مطاعم أمريكانا.

المنيو بسيط وأصنافه محددة، أطباق تكا الرئيسية هي الدجاج المخلي والطاووق
والفروج والكباب والكفتة والسمان الجامبو بأسعار من 32 لـ 44 جنيه. وكلها بـ تُقدم مع الخضار السوتيه
والأرز البسمتي أو البطاطس، وفيه منيو للمشهيات زي السمبوسك والخبز البوري المشهور به
المطعم وورق العنب والكبيبة والأسعار من 3 لـ 9 جنيه. وأخيرًا يوفيه السلاطات
المفتوح (زيارة واحدة) بسعر 18 جنيه.

السلاطات فريش وأكثر من رائعة، لكن الطبق اللي جابوه لنا علشان نحط فيه
اختيارتنا من بوفيه السلاطات كان حجمه مستفز جدًا، صغير جدًا رغم أن المفروض أن ده
الحجم الكبير، كان نفسنا نسألهم أُمال الصغير عامل إزاي! جربنا فروج تكا (45 جنيه)
وهو عبارة عن دجاجة كاملة صغيرة متبلة ومشوية على الجريل، الدجاجة طازجة وناضجة
تمامًا لدرجة أنك ممكن تأكلها بالعظم، مع الخضار السوتيه اللي في رأينا أحسن سوتيه
ممكن تأكله في مصر، وما تنساش العيش البوري المقلي في الزيت بلونه الذهبي الخطير،
وده علشان تغمس به الثومية.

طبق الميكس جريل (48 جنيه) كان فيه قطع قليلة من الكباب والكفتة والشيش
طاووق وربع دجاجة مشوية، طلبناه حار، وعجبنا طعم الدجاج والشيش طاووق جدًا لكن
الكباب كان أقل من العادي والكفتة كانت مفككة من بعضها وطعمها مش لذيذ خالص. عرفنا
بعد الطبقين دول أن تكا أستاذ في كل ما له علاقة بالدجاج والسوتيه والمشهيات، وأنه
مالوش علاقة باللحوم والمشويات أو ده كان إحساسنا. أو يمكن لأن الدجاج كان حلو
قوي، المقارنة كانت ظالمة بينها وبين اللحوم.

حبينا الأكل في تكا وخاصة الدجاج
والسلاطات، زيارتنا ممكن تتكرر كل لما نفسنا تروح لأكلة دجاج ما حصلتش وقعدة عائلية
هادئة وطبق سلاطة حلو وحجمه مستفز. الخدمة عادية وكان فيها شوية تباطؤ، والحمامات
صغيرة قوي في الفرع ده. لكن في النهاية يبقى الأكل والنكهة المميزة هو آخر وأهم
حاجة بـ تفتكرها من التجربة، و«تكا» نجح في الاختبار ده بامتياز.