The Definitive Guide to Living in the Capital , Cairo , Egypt

القاهرة الفاطمية قدمت لنا مجموعة من المباني المبهرة في تصميماتها، وزيارة أي بيت مصري تاريخي هتخليك تحس إنك رجعت للزمن مئات السنين، وفيه حالة عشق عند المصريين للمباني والديكورات الفاطمية اللي بتحكي قصص وحكايات، وداخل مطعم خان المعز اللي موجود في التجمع لقينا نفسنا جوا الحقبة دي بديكوراتها المميزة من الأرابيسك والخشب واللي خلتنا ننبهر بالمكان.

خلال السطور الجاية هنقول لكم على كل اللي محتاجين تعرفوه عن المطعم والأكل فيه.

في البداية، المطعم موجود في فندق طيبة روز التجمع الخامس، والمكان فيه حديقة حيوان صغيرة، وكمان أوبن إيريا كبيرة، ومواقع تصوير مختلفة، ولكن بمجرد ما رجلكم تتخطى بوابة مطعم خان المعز، هتتنقلوا لمكان تاني خالص، هتحسوا أنكم موجودين في القاهرة الفاطمية بجد، الأرابيسك في كل مكان والترابيزات والكراسي الخشب مع ستايل الكنب بتاع زمان، وحاجة كده زي ما بيقولوا فخمة.

قررنا نطلب أكل بما أن المطعم متخصص مشويات، وعندهم المنيو بيكون أونلاين مش متاح ورقي، وقررنا نطلب من الموظف اللي كان بشوش ولطيف وبدأنا بطبق شوربة لسان عصفور وكان سعرها 15 جنيه، وطعمها كان حلو جدًا.

كمان طلبنا من عندهم ميكس جريل ومعاه “ريشة”، وكان سعر الطبق 210 جنيه، ومعاه أرز بالخلطة، وكان فيه 3 قطع كفتة ودي كانت أفضل حاجة، وقطعتين كباب متوسطين في الطعم، وشيش طاووق طعمه كان حلو، وريشة مشوية بردوا، وكانت للأسف مش أحسن حاجة، سواء في التتبيلة أو الطعم أو الريحة.

وكمان طلبنا من عندهم موزة ضاني، ونزلت لنا “فتة” ومدفونة جواها الموزة ومتقطعة، وسعرها كان 180 جنيه، وبالنسبة لسعرها فهي مقبولة، ولكن الموزة بالنسبة لنا لو ماكنتش كاملة وصحيحة ونخليها مش بنحس بيها، والفتة كانت عظيمة ونقدر نقول أفضل ما في اليوم.

المكان موجود في فندق طيبة روز بلازا القاهرة الجديدة، والدخول للفندق 40 جنيه للفرد، والسيارة 20 جنيه، وهو فندق قوات مسلحة ولكن متاح للمدنيين الدخول، وكمان عندهم جوا ميني حديقة حيوان تقدروا تأكلوا الطيور والحيوانات فيها وتتصوروا مع العصافير والبغبغان والنسر.

تقدروا تعرفوا أكتر عنهم من خلال صفحة الفيسبوك من هنا.