The Definitive Guide to Living in the Capital , Cairo , Egypt

لو فاكرين من سنة فاتت في رمضان برضه، نشرنا مقال بننقل لكم فيه تجربتنا عن حواوشي الربيع. النهارده قررنا نجربه تاني، ونقولكم هو وصل فين بعد سنة من العمل.

أولًا علشان تفطر هناك، لازم تحجز. سواء إنك تروح لهم أو تتصل بالتليفون. غير كده هتبقى في قائمة الانتظار اللي ممكن تمتد لحد 8:15.

طلبنا ربع استيك جريل (70 جنيه). وبصراحة طعم اللحمة جميل جدًا، والتتبيلة مظبوطة. بس حراق شوية. بييجي معاه بطاطس صوابع وخلطة بصل بالدمعة طعمها حلو جدًا.

كمان طلبنا ورقة لحمة (70 جنيه). ودي بصراحة مكنتش قد كده، وكان طعم الدمعة والبصل مغطيها، رغم إن اللحمة لوحدها طعمها حلو جدًا، لكن هي مش أفضل حاجة. ونتمنى أنهم يتأكدوا من تطويرها علشان تبقى أحسن.

أما رغيف الحواوشي السجق (30 جنيه)، فممكن نقول فيه موال. لأنه مش بس معمول حلو، لأ ده متحبش. ومتحبش دي معناها أنه واخد حقه تالت ومتلت. البهارات تمام، والتسوية ممتازة، والحشو متكلف.

الربيع أصبح مميز في معاملته وأكلاته، وبينافس فعليًا أكبر محلات الأكل الشهيرة، وقريب هيكون في القمة لو استمر في خدمته وجودة أكله.