The Definitive Guide to Living in the Capital , Cairo , Egypt

مطبخنا الشرقى يعتبر جزء من تجربة أى سائح بـ ييجي يزور مصر، وده اللى بـ يحصل لما تروح بلد أهلها بـ يعشقوا بجد حاجة اسمها "أكل".

الأكل الشرقى بـ يندرج تحته كل ما يصنف من مأكولات منطقة الشرق الأوسط، وفى مدينة زي القاهرة، معايير جودة الأطباق الشرقية بـ يكون عالى جدًا لأنها أكلات حافظينها عن ظهر قلب، وبالتالى بـ تجعل المنافسة صعبة، والفائزين فى الفئة دي بالفعل تميزوا واعتلوا القائمة.

الفائزين فى جوائز اختيارات محررى كايرو 360 لأفضل المطاعم الشرقية:

أبو السيد – Abou El Sid

مطبخنا المصري غنى بالأكلات المدهشة، أبو السيد يعتبر واحد من أشهر المطاعم فى مجال تقديم أطباق مصرية لذيذة بلمسة مميزة، ده غير أنه بـ يقدم أكثر من مجرد أكل شرقي، وقدر يوفر لكل زبائنه تجربة متكاملة.

أندريا – Andrea

الإجابة الفورية اللى هـ تتقال لو اتفتحت سيرة الفراخ المشوية، سمعة المكان ده ما جاتش بالساهل، مافيش مكان هـ يكون عنده الجرأة الكافيه أنه يقدم فراخ مشوية بس من غير أى أنواع لحوم ثانية، بس هو ده أندريا من ساعة ما بدأ.

كازوزة – Kazouza

فكرة أنك تدمج مفهوم "القهوة" مع "مطعم راقى" فكرة مجنونة فى حد ذاتها، كازوزة قدر يثبت أنه مخطط أن يكون له طابع وذوق وطعم مختلف.

أيادينا – Ayadina

علشان تدخل تنافس وسط مجال المطاعم الشرقية كمطعم لبنانى الموضوع مش سهل، بس أيادينا أثبت نفسه بالفعل سنة ورا سنة من لحظة بدايتهم.

بيسترو زيتونة اللبنانى – Zeitouna Lebanese Bistro

مزج ما بين جو البيسترو والمطبخ اللبنانى، بيسترو زيتونة اللبنانى بـ يمزج بين أناقة نايل سيتى تاورز مع طعامة الأكل البيتى اللبنانى.

تنورين – Tanoureen

هـ تعيش أجوائه المريحة جدًا فى أحد شوارع المعادي الهادئة، تنورين بـ يقدم أكل لبنانى بجودة عالية فى جو مناسب لتقديم نوعية أطباقه.

كركاس – Caracas

الأكل اللبنانى عبارة عن تشكيلة كبيرة من المزات، أطباق رئيسية لذيذة، والشيشة الجامدة، وبالفعل كركاس تفوق فيهم كلهم.

الكبابجي – El Kebabgy

"تجربة متكاملة للطعام حيث يجب أن يكون"، بـ تمزج بين المزات الباردة اللذيذة وسلة العيش الرائعة اللى ما بـ تنتهيش، ما ينفعش تروح هناك من غير ما تذوق الميكس جريل والكبدة المشوية.

لا بالميري – La Palmaeraie

لأن التخصص فى المطبخ المغربي نادر فى القاهرة لكن لذيذ فى نفس الوقت، تجربة الأكل فى لا بالميرى هـ تخلى لعاب لسانك يسيل وهـ تلاقى نفسك عاوز ترجع تذوق أطباق ثانية.

تبولة – Taboula

تبولة هو أساس المطعم اللبنانى، المطعم الرئيسي فى جاردن سيتي أرسى أساسيات الأكل اللبنانى منذ افتتاحه وفضل محافظ على مستواه من وقتها.

بيسترو تمارا اللبنانى – Tamara Lebanese Bistro

من الصعب على أى مطعم أنه يتوسع فى الفروع بتاعته وفى نفس الوقت يحافظ على نفس المستوى اللى نجح به، بيسترو تمارا اللبنانى قدر يعمل كده بالفعل، سواء لو رايح هناك تشرب شيشة أو تأكل وجبة رئيسية تجنن.

طشة – Tasha

طشة أستاذ فى الأطباق المصرية اللى تحس أنها أكل بيتى أصيل، المنيو بتاعته تجرى الريق وطعم الأطباق كمان، أى حد متربي فى مصر وعارف الأكل المصرى اللى بجد هـ يوافق على الكلام ده.