The Definitive Guide to Living in the Capital , Cairo , Egypt

بـ نفرح جدًا لما أماكن جديدة تفتح بـ تعمل أكل صحي، خاصة لو حلو، لأن ده بـ يسهل علينا كثير أننا نشتري وجبة مفيدة ولذيذة وبـ تشبع في نفس الوقت، وده لو تعرفوا حاجة مش سهلة إطلاقًا، وكل الحاجات دي متوفرة في جرين هابيتس – Green Habits في دجلة في المعادي اللي فعلًا بـ يساعدك أنك تغير عادات أكلك غير الصحية بتوفير بديل مناسب.

أول ما دخلنا لاقينا بار (ترابيزة لازقة في الحائط) و3 كراسي، وبار السلاطة العادي غير المنيو اللي على الحيطة مش مطبوع على ورق، كان فيه أنواع سلاطات كثيرة متنوعة، وكان فيه اختيار أننا نكون السلاطة بتاعتنا وده اللي عملناه.

 السلاطة سعرها الأساسي 35 جنيه، وأي إضافة عليها غير الحاجات الأساسية لها سعرها الخاص، أول خطوة أننا نختار الأساس وهو بـ يبقى خس أو جرجير، وثاني خطوة بـ نختار من أربعة مكونات: ما بين طماطم وخيار وذرة وزيتون ومشروم وجزر وبصل أو فاكهة زي التفاح والرمان، وثالث خطوة بـ تختار حاجات زيارة كل واحدة لها سعرها زي الأفوكادو والجبنة بأنواعها والدجاج والسلامون أو الجمبري أو البيض، ورابع خطوة هي اختيار الدريسنج وعندهم أنواع جديدة عجبتنا زي بالبلوبيري والراسبيري والحاجات الثانية العادية.

اختارنا أول حاجة خس وجرجير لحبنا فيهم، وبعد كده زودنا تفاح ورمان وشيري طماطم وفي ثالث خطوة زودنا كينوا (18 جنيه) ودجاج (20 جنيه) وجبنة بارميزان (6 جنيه) وأفوكادو، ومن الصوص اختارنا الشيري صوص واللي مكون من خل بلسمى وعسل وتوت أحمر ومسطردة ولازم نعترف أن كان طعمه رائع، المكونات كلها كانت طازة وتركيباتهم على بعض مميزة، صحيح الأسعار غالية شوية بس تستحق التجربة لأن الكمية كانت كبيرة جدًا لدرجة أنها شبعتنا طوال اليوم.

كنا عاوزين نجرب السموزي عندهم بس للأسف الخلاط كان بايظ، فـ قولنا نجرب العصاير الطبيعية ومنها Protect بـ 22 جنيه واللي مكون من عصير برتقال وجزر وجنزبيل، والمفروض أنه بـ يحمي الجسم من البرد ويمده بفيتامين سي، طعمه كان فريش ورائع خاصة أنه اتعمل أمامنا، وطلبنا كمان Burn بـ 26 جنيه وده نوع من أنواع الديتوكس اللي بـ ينظف الجسم من السموم وبـ يساعد على حرق الدهون، ومكون من خيار وسبانخ وتفاح أخضر وKale وجنزبيل وليمون، وللأسف ما عجبناش خالص لأن طعم الخيار كان طاغي على أي طعم ثاني معاه.

"جرين هابيتس" فعلًا مكان يساعدك أنك تغير عادات أكلك لعادات صحية، بس حاول تنظم مرتبك على أساسه، فما تطلبش إضافات كثيرة بقى، وإلا مرتبك هـ يخلص من أول أسبوع.