The Definitive Guide to Living in the Capital , Cairo , Egypt

ناس كتير بتعتبر مطعم IHOP هو أفضل مكان بيقدم بان كيك في العالم، علشان كدة كان فيه حالة سعادة لما قرر البراند الأمريكي المشهور يفتح فرع له في القاهرة. لكن هل يستحق IHOP لقب أحسن بان كيك في مصر، ولا فيه كلام تاني؟! الإجابة هتعرفوها من خلال تجربتنا في المكان.. يلا نبدأ.

في البداية المكان مريح نفسيًا وقعدته لطيفة، وفيه قعدة خارجية تقدروا تشوفوا منها النافورة الراقصة بتاعة كايرو فيستيفال، وكمان فيه قعدة داخلية مكيفة، وفريق العمل مميز وخدوم بس نتمنى أنهم ميدخلوش على العملاء وهما بياكلوا ويسألوهم عن رأيهم، إحنا نفسنا اتخضينا أول مرة ولكن اكتشفنا أن مع كل صنف بينزل بيحصل ده، وطبعًا كنا بنرد ميرسي، كله تمام لكن من جوانا كنا حابين نستمتع بالأكل من غير مقاطعة.

بدأنا تجربتنا بأننا جربنا الأكل الأول عندهم قبل البان كيك اللي رايحين علشانه، والبداية كانت طبق سلطة كريسبي تشيكن، وهو طبق كبير جدًا، وسعره 159 جنيه، والطبق ده حقيقي ينفع وجبة لوحده، وهو عبارة عن خضروات مختلفة مع فراخ كريسبي ولحم بقري وجبنة شيدر وبيض مسلوق وفيه خردل مع عسل، وبينزل معاهم توست بالثوم، والطبق رهيب وطعمه حكاية ومكوناته كتير، ولكن مش أي حد هيحبه لأن لخبطة المكونات مع بعض وخاصة فراخ عليها عسل رغم إن طعم العسل مش باين، ولكن مش كل الأذواق هتتقبله، بس إحنا حبيناه.

خلصنا السلاطة اللي مقدرناش نكملها علشان ندخل على الطبق الرئيسي واللي كان بناءً على نصيحة الموظف ستيك مشوي مع البطاطس والذرة الحلوة اللي متسوية بالزبدة، وسعره كان 239 جنيه، وهو عبارة عن ستيك لحوم متقطع وسميك بزيادة وطعم العسل مغطي على طعم الستيك، والبطاطس كانت عادية مافيهاش أي افتكاسة أو حاجة مميزة، ولكن الذرة الحلوة اللي متسوية بالزبدة كانت من أجمل الحاجات اللي جربناها وبنطالب أنها تكون طبق لوحده في المنيو من حلاوتها.

نيجي بقى لأساس التجربة وهي البان كيك، طلبنا من الموظف يرشح لنا أفضل بان كيك في المكان، فرشح لنا نوعين اخترنا منهم بان كيك نيويورك تشيز كيك، وسعره كان 192 جنيه، وخلينا نقول إنه كان عبارة عن 4 طبقات بان كيك “كبيرة” وعليها فراولة ومن فوق كريمة، ولكن للأسف البان كيك ماكنش أحسن حاجة لأسباب كتير، أولًا العجينة كانت تقيلة ومعجنة، ثانيًا صوص الفراولة ده كان “مربى” زي بتاعة زمان لو فاكرينها وبتحرق الزور، والكريمة ماكنش ليها أي طعم، ورغم آمالنا الكبيرة في البان كيك إلا أننا حقيقي جربنا أحسن منه بمراحل كتير في القاهرة والإسكندرية.

تقدروا تعرفوا أكتر عن IHOP من خلال صفحتهم على فيسبوك من هنا.