-
39 شارع محيي الدين أبو العز
-
عالمي
-
-
الكافيه: 7 صباحاً - 1:30 صباحاً، المطعم: 10 صباحاً - 1:30 صباحاً -
Basma Mostafa
في
مدينة زي كايرو بـ يفتح فيها مطعم كل كام أسبوع، بـ يبقى صعب جداً أن الواحد يقدر
يتابع كل إختيارات الأكل الجديدة. ومن حظنا الحلو أننا عدينا على «توسكانيني»،
المطعم اللي فتح جديد في الدقي. «توسكانيني» يبقى مكان مكون من دورين للأكل في
شارع محيي الدين أبو العز، المطعم في الدور الأول والكافيه في الدور الثاني.
جو «توسكانيني»
بنوره الهادي، والديكور الخشب، والمزيكا الهادية اللي بـ يشغلوها، كل ده بـ يخلّي
الواحد يرمي الدنيا ورا ضهره وبـ يخللي تجربة الأكل هناك هادية جداً ومُريحة
للأعصاب.
الأصناف
في منيو «توسكانيني» كتيرة ومتنوعة جداً، وفيه إختيارات كتيرة من المطابخ
الإيطالية، المكسيكية، والعالمية. كبداية، إحنا طلبنا ناتشوز الجبنة المقرمشة
اللذيذة (21.99 جنيه) ونزل معاها صوص جبنة كريمي ولذيذ جداً. إختيارات الناتشوز
التانية كان فيها فراخ (29.99 جنيه)، لحمة (32.99 جنيه)، وسي فوود (44.99 جنيه).
أمّا أصناف المقبلات التانية كان فيها السپرينج رولز المحشية والسلطات العادية زي
السيزر (13.99 جنيه) والسيزر بالفراخ (23.99 جنيه).
المنيو
فيه الأطباق الرئيسية من أنواع الفراخ، اللحوم، والسي فوود. «توسكانيني» بـ يقدم
ساندويتشات كمان، زي الراپ المكسيكي (الساندوتشات الملفوفة)، والفاهيتا. ده غير
النودلز، أطباق المكرونة، الپيتزا، والبرجر كمان. ومن كُتر الإختيارات اللي في
المنيو إحنا كُنا مش عارفين نختار إيه ولا إيه.
وبعد
تفكير كتير جداً، طلبنا راپ الفراخ المكسيكي المشوي (26.99 جنيه)، وده كان ساندوتش
فيه قطعة فراخ معمولة بالمشروم، البصل، والجبنة الشيدر، وكل ده ملفوف في عيش
التورتيا المكسيكي، والحقيقة الخليط كله على بعضه كان طِعِم جداً. الساندوتش كان
متقدم مع بطاطس محمرة متقطعة كبير وصوص پيكانتي الحار مع “پيكو دي جالو”
pico de gallo (وده عبارة عن خلطة توابل مكسيكية من قطع الطماطم، البصل، والفلفل
الحار).
طلبنا
كمان پيتزا بالفراخ الباربيكيو (29.99 جنيه)، بس كانت حراقة شوية زيادة لدرجة أننا
كُنا بـ نضطر نشيل الفلفل منها بنفسنا، ورغم كده كان طعمها حلو. قسمنا مع بعض كمان
طبق مكرونة الفراخ بصوص الألفريدو الأبيض (29.99 جنيه)، والصوص كان حلو لدرجة أننا
ندمنا أننا قسمناها.
الحلويات
في «توسكانيني» بـ تتقدم في الدور التاني اللي فيه الكافيه، وبالنسبة لنا الإختيار
كان سهل جداً: أوريو مادنس Oreo Madness (21.99
جنيه) اللي بـ يبقى خليط حلو جداً من بسكويت الأوريو، الأيس كريم، وصوص
الشوكولاتة.
«توسكانيني»
ينفع جداً لو عايز تهرب من دوشة الحياة في كايرو وتطير مع أكلة جميلة في جو هادي
في الويك إند أو حتى في خروجة عائلية وسط الأسبوع.
