The Definitive Guide to Living in the Capital , Cairo , Egypt

صعب إنك تلاقي مطعم إيطالي جامد خصوصًا وسط عدد المطاعم المهول اللي بيفتح يوميًا في القاهرة. بوينت 90 مول مكانش استثناء وكل شوية بنشوف فيه افتتاح مطعم جديد، بس “توتي ماتي-TuttiMatti” في الحقيقة قدر  يقدم لمسة إيطالي متميزة مع قعدة آوت دور هايلة بتصميمات بسيطة، وريحة الريحان والروزماري اللي بينادوا على الناس يدخلوا ويجربوا المكان.

بعد ما وصلنا لمكاننا على الكراسي الخشب قررنا نبتدي بطبق Crema Zuppa Di Pollo (ثمنه 39 جنيه) ومعاه فوتوتشيني ألفريدو كون بولو (75 جنيه) وآنجوس بيف فيليه (189 جنيه) وبيتزا فواكه البحر (95 جنيه) كبيرة.

بعد حوالي ربع ساعة قدموا لنا عيش يشبه البيتزاعلى صينية خشب ومعاه شوية زبدة وكريمة CremaZuppa Di Pollo.

نصفين العيش كان عليهم إضافات مختلفة، يعني نص منهم عليه زعتر وصلصة والتاني عليه زعتر بس. قوام العيش كان عامل زي البيتزا وله طعم مميز مع طبعًا طعم الزعتر القوي، أما النص المتغطي بالصلصة فكان أطعم وأحلى من النص الأولاني.

أما شوربة الكريمة فراخ فكانت خفيفة وفيها زيت كتير لدرجة إنه عايم على وش الشوربة. بالنسبة لطعم الشوربة فكانت عادمة ومحتاجة شوية بهارات وحتى الفراخ مقدرتش تضيف حاجة لطعمها.

بعد حوالي ربع أو تلت ساعة كمان وصلت الأطباق الرئسية وهي بيتزا فواكه البحرمتقدمة على صينية خشب مدورة، وفتوتشيني ألفريدو كون بولو في طبق أبيض كبير وآنجوس بيف فيليه اللي طلبنا معاه بطاطس مهروسة وويدجز.

البيتزا كانت بالعجينة الرفيعة التقليدية وعليها موتزاريلا وصلصة طماطم وشرائح بصل وكاليماري وجمبري صغير وريحان. العجينة كان فيها قرمشة نوعًا ما، بس المشكلة إن الريحان سيطر على طعم كل حاجة حتى الجمبري والكاليماري.

قررنا وإحنا بنطلب الفتوتشيني ألفريدو كون بولو إننا نغير ونخليهم يعملوها بباستا ريجاتوني. الباستا كانت غرقانة صوص ألفريدو أبيض ومشروم وقطع فراخ، بس كانت محتاجة شوية ملح وحسينا إن الطبق محتاج يتقلب كويس علشان الصوص بينزل كله لأخر الطبق بسرعة.

أما الآنجوس فيليه فكان قطعة متوسطة عليها قطع وصوص مشروم في طبق كبير، ومعاه طبقين صغيرين للبطاطس المهروسة والويدجز. كان ممكن طريقة التقديم تكون أحسن من كده عشان الطبق كان شكله كبير على قطعة البيف المتوسطة.

أول حاجة تلاحظها في الفيليه طعمه المدخن اللذيذ وطبعًا صوص المشروم المملح شوية صغيرين. بالنسبة للبطاطس المهروسة فكانت مالهاش طعم وناشفة ومحتاجة يكون لها صوص مخصوص، والويدجز كانت متميزة بالتوابل والأعشاب العطرية.

خلصت حكايتنا مع قطعة تشيز كيك (39 جنيه)غنية بالكريمة، ويا سلام عليها مع الطعم المزز الجميل لصوص الفراولة وطبقة البسكويت المقرمشة؛ بصراحة ماكناش قادرين نمسك نفسنا.

مع نهاية رحلتنا عند توتي ماتي نقدر نقول إنها كانت مغامرة مليانة بالذكريات الجميلة مع شوية أخطاء منعت المطعم إنه يظهر كل إمكانياته، ومن رأينا إنهم في الطبيعي يقدروا يقدموا واحدة من أحلى تجارب الأكل في القاهرة الجديدة.

بكل صراحة وشفافية هنقول إن تجربتنا مع توتي ماتي كانت كويسة جدًا، مع أخطاء بسيطة منعت عنهم تقدير “امتياز”. مافيش شك إن المطعم يقدر يثبت نفسه كواحد من أقوي المطاعم الإيطالي في القاهرة.