The Definitive Guide to Living in the Capital , Cairo , Egypt

كل إنسان له شخصية مختلفة، فيه ناس بتحب تخرج لوحدها، وناس بتحب تخرج مع أصحابها، وناس بتفضل تخرج مع العائلة، وعلى الجانب الآخر فيه ناس تانية مابيفرقش معاها هتخرج مع مين، المهم يكون معاها ناس تانيين، لكن هل فكرت قبل كدة تخرج مع ناس ماتعرفهاش قبل كدة؟ والناس دول يكونوا بيشبهوا شخصيتك فعلًا؟ مؤخرًا ظهر تطبيق اسمه timeleft، آلية عمله مختلفة ومميزة، التطبيق ده بيخليك تخرج مع ناس شبهك، بيجمعك في عشاء على ترابيزة واحدة مع ناس اهتماماتها قريبة من اهتماماتك، والهدف أنك تكون صداقات حقيقية. تحب تخوض التجربة دي؟ إحنا هنقولك كل التفاصيل اللي محتاج تعرفها عن تطبيق timeleft.

Timeleft هو موقع إلكتروني وتطبيق متخصص في أنه يجمع 5 أفراد متشابهين في الاهتمامات مع بعض، وبيقدموا الفكرة دي في عدد كبير من مدن العالم، والقاهرة في القائمة! في البداية هتعملوا حساب جديد لو أول مرة تدخلوا الموقع، وهتجاوبوا على مجموعة أسئلة مختلفة بتبين شخصيتكم أكثر وبتوضح اهتماماتهم وأذواقكم في الأكل، وبناءً على الإجابات بتختاروا اليوم المناسب وتروحوا مكان ما تتجمعوا وتتعرفوا على ناس جديدة.

نقدر نقول إن فكرة timeleft بتعتمد على عدم شعوركم بالوحدة وبتشجع الناس على عمل صداقات جديدة وخوض تجربة خروج مميزة وجديدة وبدون أي شروط مسبقة ولا ترتيب ولا حتى دوشة مين عاوز يروح فين وياكل إيه، اللي كلنا بنعاني منها لما بنحب نخرج مع أصدقائنا المقربين. كل اللي عليكم تجاوبوا على الأسئلة وتدفعوا وتستمتعوا بالخروجة.

الأسئلة الموجودة في تطبيق timeleft عبارة عن النوع والسن والديانة وبتحبوا الطبيعة ولا الصخب وهل بتفضلوا الزحمة ولا الوحدة وشوية أسئلة خفيفة بتحدد اهتمامات كل شخصية، وده تقدروا تعملوه من خلال تطبيق الموبايل أندرويد من هنا، أو من خلال تطبيق iOS من هنا، وممكن كمان من خلال موقعهم الإلكتروني من هنا.

وبعد الإجابة عن الأسئلة والتفاصيل تقدروا تختاروا باقات مختلفة للخروجات، سواء خروجة لمرة واحدة، أو كل أسبوع، أو كل شهر، أو كل 3 شهور، أو حتى كل سنة، والأسعار عندهم مختلفة، بتبدأ من 230 جنيه في المرة الواحدة، ولكن هتحتاجوا يكون معاكم كريديت كارد للدفع مش ديبت كارد ويمكن ده العيب الوحيد اللي في الفكرة لأنه مش كل الناس معاها كريديت كارد.