The Definitive Guide to Living in the Capital , Cairo , Egypt

مافيش أكثر من مطاعم الوجبات السريعة فى القاهرة، وقدرتهم على جذب حشود من الجماهير الجائعة مالهاش حدود. باعتباره واحد من الأسماء العالمية المشهورة، “تشيب ستيكس – Chipstix” حقق نجاح من تقديمه أكلات سريعة خفيفة ومتنوعة، منها علامتهم المميزة شيش تشيب ستيكس (10 جنيه)، وده عبارة عن بطاطس مقلية على شكل حلزون ملفوف على عود.

بجانب فرعهم الموجود فى نادى الجزيرة فى الزمالك، واحد من أكشاكهم المضيئة انضم مؤخرًا لمول داون تاون القطامية فى القاهرة الجديدة، وهناك بـ يقدم لعشاق التسوق ما لذ وطاب من الكربوهيدرات وسط رحلتهم. مكانه وسط مجموعة من المطاعم، من غير أى مكان للقعدة، والاختيار الوحيد هو التيك أواى؛ الحقيقة أن الأكل والمشى وسط المول مش عملى شوية، وفى نفس الوقت التعبئة السيئة بـ تصعب عليك تروح بيتك بالأكل، لو فكرت تعمل كده يعنى!

الموظف اللى معانا كان للأسف جاف ومعاملته فاترة، واحتاج وقت طويل لتحضير طلبنا. لاحظنا أنهم كانوا بـ يستخدموا جوانتيات يتم التخلص منها بعد استعمالها، رغم أن ولا الشواية ولا القلّايات الضخمة كان واضح عليهم شكل النظافة.

على حسب كلام المنيو الورقية، حبات البطاطس المستخدمة فى شيش تشيب ستيكس والبطاطس المقلية مستوردة من هولندا، بـ تمنع امتصاص الزيت، وبكده يكون زيتها أقل بكثير من البطاطس التقليدية. المنيو كمان فيها كوز ذرة (12 جنيه)، كورن دوج فراخ (14 جنيه) أو لحم (11 جنيه)، واختيارات مسكرة منها كيكة شوكولاتة (12 جنيه) أو وافل ستيكس (11 جنيه). المشروبات محدودة على مشروبات غازية (3.50 جنيه) ومياه (3 جنيه).

شيش تشيب ستيكس له 16 نكهة حادقة مش عاديين، يشملوا صوص سى فوود، وبيرى-بيرى البرتغالى وورشيستر. طلبنا نكهة الملح والفلفل التقليدية (10 جنيه)، وتفرجنا عليهم وهما بـ يرشوا المسحوق بكثافة على سيخ البطاطس بتاعنا. البطاطس كانت مقلية كويس وبقشرها، لدرجة أن لونها بنى مائل للذهبى، مع نكهة قوية للملح والفلفل. طبعًا سيبك من موضوع خالى من الزيت وكده، وجود شوية زيت أكيد كان هـ يفرق فى الطعم.

طلبنا كمان بطاطس تشيب ستيكس (8 جنيه) الرفيعة المقرمشة، وكوز ذرة طازج بطعمه اللذيذ (12 جنيه) متغطّس فى الزبدة. علشان ما كانش فيه شوكولاتة، طلبنا وافل ستيكس، بـ تتحضر بزبدة دسمة، والكمية السخية من النوتيلا خلقت صنف حلو لذيذ بس مش اللى هو يعنى.

لو فصلت من كثر الجوع ومحتاج أكلة سريعة ورخيصة، تشيب ستيكس بـ يقدم أفكار بطاطسية جديدة، يمكن تكون شيقة بس مش استثنائية.