The Definitive Guide to Living in the Capital , Cairo , Egypt

علشان بـ يعرض أكلات أسعارها مناسبة
للميزانية، واضح أن فندق كارﭭين الموجود فى هليوبوليس بقى من الأماكن المحبوبة فى
فترة قليلة. اكتشاف مطعم «مسالا»، واحد من أحسن مطاعم المأكولات الهندية كان اكتشاف
هائل، ودلوقتى أحدث إضافاتهم هو «تشاينيز لاونج-Chinese Lounge» الموجود فى الدور
الأرضى.

ديكور المكان عادى زى أغلب المطاعم الصينية،
مراوح متعلقة فى السقف ورموز صينية بالأحمر. على جنب من الحيطة، هـ نلاقى بينش طويل ومجموعة ترابيزات قدامه. لما وصلنا، اتضايقنا
شوية من رائحة القلي اللي عاملة زى روائح مطاعم الفاست فوود خارجة من المطبخ.

بدأنا بشوربة هوت آند ساور (18.5 جنيه) اللى كانت
سبايسى لدرجة أن الطعم اللاذع “ساور” ماكانش موجود. بعد ما خلصنا معاناة
الشوربة، لاقينا نفسنا بـ ندورعلى مناديل علشان نمسح أثار الشطشطة من عطس ودموع.

البطاطس المقلية مع صوص الثوم (14 جنيه) كانت لذيذة. البطاطس كانت مقلية على شكل كرات
صغيرة والثوم أضاف طعم ورائحة ممتازة. اللحم مع الزنجبيل وصوص الثوم (35 جنيه) كان برضه جامد،
خصوصا أن الزنجبيل والثوم كانوا إضافة هائلة مع بعض من غير ما طعم واحد فيهم يغطى
على الثانى. البيف واضح أنه كان من قطعية ممتازة ومقلي كويس علشان يوصل لسطح خارجى
مقرمش. الخضروات المشكّلة (10 جنيه) طعمها مش حلو قوى بس كويسة علشان جرعة
الفيتامينات اليومية. كمان هـ تلاقى اختيارات كثيرة من أنواع الأرز لكن اختيارنا كان
الأرز المقلى مع البيض (26 جنيه) علشان ندي فرصة للأطباق الدسمة الشهية، الأرز
كان مزيّت قوى وكان صعب نخلط صوص الثوم والزنجبيل اللي في طبق البيف عليه.

زى عادة معظم مطاعم القاهرة، أطباق «تشاينيز
لاونج» بـ تكون كمياتها كبيرة، علشان كده فكر كويس لوهـ تطلب وجبة متكاملة لـ 3 أفراد.

نقدر نقول فى المجمل أن الأكل حلو جدًاً، وطاقم
العمل مهذبين ومش مزعجين خالص. أحسن حاجة فعلًا عند تشاينيز لاونج هى الأسعار. فى
الأخر دفعنا 260 جنيه على مأكولات
ومشروبات كثيرة جداً لـ 3 أفراد، وده بالنسبة لأسعار المدينة سعر كويس جداً.