The Definitive Guide to Living in the Capital , Cairo , Egypt

الخروجات في منطقة زايد وأكتوبر لا تعد ولا تحصى، وده بسبب كثرة المولات والأماكن اللي محتاجة خطة خمسينية علشان نقدر نزورهم كلهم. لكن وسط كل الجديد، فيه خروجة بمبدأ “من فات قديمه تاه”، وهي مول العرب، واحد من أقدم الأماكن الترفيهية اللي اتبنت في أكتوبر. قررنا نزوره، وأول ما وصلنا استقرينا على تجربة مطعم وكافيه Blaze، والتجربة بالنسبة لنا كانت متوسطة. في السطور الجاية هنحكيلكم التفاصيل.

المكان فيه إن دور وأوت دور، ولو الجو حلو طبعًا الأوت دور بيكون اختيار مميز، لكن مش مناسب للأطفال لأنه فيه شيشة. أما الإن دور، فهو ضيق شوية لكنه لطيف، والتدخين ممنوع فيه. كمان عندهم شاشات كتير لمتابعة الأفلام أو الماتشات، والموظفين هناك بصراحة متعاونين جدًا وبيخدموا بسرعة.

الأكل والمشروبات

طلبنا سلطة تاكو بـ225 جنيه، وكانت أفضل طبق في تجربتنا، ونرشحه بشدة، فعلاً يستحق الشكر. كمان طلبنا تريو ديناميت بـ195 جنيه، وبيضم جمبري وبطاطس وفراخ، وأحسن حاجة فيه كانت البطاطس.

أما فرايد تشيكن رايز بـ290 جنيه، فطعمه كان كويس، لكن المفروض يكون سبايسي، وبما أننا طلبناه سبايسي، كان مفترض يكون أقوى في النكهة، لكنه جه عادي جدًا، وده قلل من التوقعات، بس يظل طبق ممتاز.

بالنسبة لـ الباستا باللحمة بـ270 جنيه، فكانت متوسطة. أما فاهيتا الفراخ بـ295 جنيه، فكانت محتاجة تتبيلة أقوى رغم إن التسوية ممتازة، لكن الأرز كان جميل جدًا، مع إن كميته قليلة شوية.

على جانب المشروبات، جربنا كابتشينو بـ81 جنيه، وزجاجة مياه صغيرة بـ32 جنيه.

تقدروا تعرفوا أكثر عنهم من خلال صفحة الفيسبوك من هنا.