The Definitive Guide to Living in the Capital , Cairo , Egypt

لما وصلنا للمكان اللي هنكتب عنه المقال، ترددنا شوية في الدخول وماكناش متأكدين هل العنوان اللي معانا صح ولا لأ! المطعم طلع فعلًا في عمارة قديمة على شارع بغداد شكلها مش مبشر خالص.

في النهاية دخلنا لمكان تحس أنه مدخل شقة في الدور الأول، لكن عرفنا إننا كنا غلطانين. المكان طلع مساحته كبيرة فيها كراسي مريحة وترابيزات خشب، أما منطقة الآوت دور ففيها حوالي ثمان أو تسع ترابيزات خشب وكراسي زي اللي بنشوفهم على البحر.

بتشوف كمان على الحيطان نباتات خضراء طالعة من مواسير ومعاهم لمبات إضاءة في برطمانات ولوحات بتمثل الفن المعماري الإيطالي.

بعد وصولنا لأماكننا وصلت المنيوهات المكتوبة بالإيطالي والانجليزي فورًا، والموضوع أكيد هيحيرك شوية إلا لو كنت خبير في الأكل الإيطالي. طبعًا كنا محتاجين مساعدة في فك شفرة المنيو، والجرسون بصراحة كان مفيد وساعدنا.

المنيو فيها كل أنواع الأكلات الإيطالية من الباستا والبيتزا وأطباق السمك للفراخ واللحوم. لازم نكرر إن الموظفين هناك هايلين. المهم إننا طلبنا بيتزا ماما جيوستينا Mama Giustina (80 جنيه) وفيليتو دي سالمون كون فارفاليFiletto di salmone con farfalle (160 جنيه).

بعد ما عملنا الأوردر قدموا لنا طبق إيطاليان بروسكيتا هدية من المطعم. أكيد البروسكيتا من بيبينيروهتشرَّف المطبخ الإيطالي، وهي عبارة عن عيش توسكان عليه كمية كبيرة من الطماطم الطازة مع زيت زيتون وملح وريحان وثوم.

دقائق قليلة ووصلت البيتزا. هي المفروض إنها بيتزا بالتونا، لكن المفاجئة إنها معمولة بموتزاريلا بقري إيطالي وكانت دسمة وفيها زبدة أكثر من المتوقع وفي نفس الوقت مش مزيتة. الإضافة الوحيدة غير التونا كانت بصل مع شوية صلصة طماطم، وعمومًا نقدر نقول إنها بيتزا كويسة وحجمها كبير.

الطبق الثاني جمع بين السالمون وباستا فارفالي؛ الباستا كانت معملة آل دينتي وغرقانة في صوص سالمون أبيض ثقيل، بس كانت عايزة تتبيلة تعمل نكهة للأكل. أما تتبيلة السالمون نفسه فكانت تمام، وكمان كان طري جدًا ونكهته قوية وطبعًا لونه البرتقالي المايل للحمرة كان يفتح النفس.

سمعنا من بعيد نداء بيقول لنا لازم نضرب حاجة حلوة، وكنا محتارين بيت النوتيلا كالزون (100 جنيه) وبيتزا دولشي (90 جنيه) وشوكليت سلامي بالآيس كريم (75 جنيه)، لكن في النهاية طلبنا طبق إيطالي كلاسيكي وهو التيراميسو (80 جنيه).

‘

أحسن حاجة نقولها للتيرامسيو اللذيذ عند بيبينيرو "أنت أكيد من عالم ثاني". طبق الحلو ببساطة عبارة عن كاس فيه بسكويت بنكهة القرفة وفوقه جبنة ماسكربوني هايلة بقوامها الكريمي خفيف. كل اللي فات ده مع بودرة كاكاو عمل طبق حلو ولا أروع. خلصنا سهرتنا الصيفية الممتعة بعصير ليمون نعناع (34 جنيه) معمول باتقان وتوازن بين الطعم المسكر واللاذع.

صحيح البداية كانت مربكة شوية، لكن من ساعة دخولنا للمطعم لغاية ما مشينا بجد استمتعنا بكل لحظة هناك. بيبينيرو بأكلاته الممتازة والخدمة الهايلة والنظافة الواضحة أكيد رفع رأس الطلاينة في مصر.